ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠲᠠᠭᠢᠯᠭ᠎ᠠ ᠶᠢ ᠤᠷᠳᠤᠰ ᠤᠨ ᠤᠳᠤᠭ ᠬᠤᠰᠢᠭᠤᠨ ᠤ ᠡᠷᠭᠢᠳᠤ ᠰᠤᠮᠤᠨ ᠤ ᠡᠷᠢᠶᠠᠨ  ᠲᠤᠯᠤᠭᠠᠢ ᠭᠡᠳᠡᠭ ᠭᠠᠵᠠᠷ ᠴᠤᠮᠴᠤᠭ ᠤᠷᠳᠤᠨ ᠳᠤ ᠭᠢᠳᠡᠭ᠃ ᠭᠤᠤᠯ ᠰᠢᠳᠥᠭᠡᠨ ᠨᠢ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ  ᠭᠥᠷᠥᠭ ᠪᠤᠯᠤᠨ ᠨᠤᠮ ᠰᠤᠳᠤᠷ ᠪᠤᠯᠤᠨ᠎ᠠ᠃ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠲᠠᠭᠢᠯᠭ᠎ᠠ ᠨᠢ ᠡᠳᠤᠷ ᠤᠨ ᠲᠠᠭᠢᠯᠭ᠎ᠠ᠂ ᠰᠠᠷ᠎ᠠ  ᠎ ᠶᠢᠨ ᠲᠠᠭᠢᠯᠭ᠎ᠠ ᠭᠡᠵᠥ ᠪᠠᠶᠢᠳᠠᠭ᠃

ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠡᠳᠤᠷ ᠤᠨ ᠲᠠᠭᠢᠯᠭ᠎ᠠ ᠶᠢ ᠪᠠᠰᠠ ᠡᠩ ᠤᠨ ᠲᠠᠭᠢᠯᠭ᠎ᠠ ᠭᠡᠳᠡᠭ᠃ ᠡᠩ ᠤᠨ ᠲᠠᠭᠢᠯᠭ᠎ᠠ ᠎ ᠶᠢ ᠵᠢᠰᠢᠶᠠᠨ ᠳᠤ ᠰᠠᠭᠤᠭᠰᠠᠨ ᠵᠤᠮᠤ ᠶᠠᠮᠤᠳᠤ ᠨᠠᠷ ᠭᠥᠢᠴᠡᠳᠭᠡᠳᠡᠭ᠃ ᠡᠳᠤᠷ ᠪᠥᠷᠢ ᠤᠷᠭᠤᠬᠤ ᠨᠠᠷᠠᠨ ᠠᠴᠠ ᠡᠮᠥᠨ᠎ᠠ ᠪᠤᠰᠴᠤ᠂ ᠴᠤᠮᠴᠤᠭ ᠤᠷᠳᠤᠨ ᠤ ᠭᠠᠳᠠᠨ᠎ᠠ ᠲᠤᠳᠤᠨᠠᠭᠢ ᠶᠢ ᠴᠡᠪᠡᠷᠯᠡᠵᠥ᠂ ᠰᠢᠨ᠎ᠠ ᠭᠠᠯ ᠤᠨ ᠴᠤᠭ ᠢᠶᠠᠷ ᠠᠷᠴᠠ᠂ ᠭᠥᠵᠢ ᠠᠰᠠᠭᠠᠵᠤ ᠰᠠᠩ ᠲᠠᠯᠪᠢᠭᠠᠳ᠂ ᠰᠢᠳᠥᠭᠡᠨ ᠳᠤ ᠪᠠᠨ ᠮᠥᠷᠭᠦᠵᠥ᠂  ᠡᠵᠠᠨ ᠰᠠᠩ  ᠤᠡᠭᠰᠢᠳᠠᠭ ᠃ ᠡᠳᠤᠷ ᠪᠥᠷᠢ ᠶᠢᠨ ᠲᠠᠭᠢᠯᠭ᠎ᠠ ᠳᠤ ᠰᠠᠷᠬᠤᠳ᠂ ᠴᠠᠢ᠂ ᠰᠦ  ᠶᠢ ᠲᠤᠰᠪᠥᠷᠢ ᠭᠤᠷᠪᠠᠨ ᠲᠠᠭᠢᠯ ᠢᠶᠠᠷ ᠶᠢᠰᠤ  ᠡᠷᠭᠦᠳᠡᠭ᠃

ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠠᠷ᠎ᠠ ᠶᠢᠨ ᠲᠠᠭᠢᠯᠭ᠎ᠠ ᠳᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠭᠤᠷᠪᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠨᠢᠭᠡᠨ ᠤ ᠲᠠᠭᠢᠯᠭ᠎ᠠ᠂ ᠲᠥᠷᠪᠡᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ ᠲᠠᠭᠢᠯᠭ᠎ᠠ᠂ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠨᠢᠭᠡᠨ ᠤ ᠲᠠᠭᠢᠯᠭ᠎ᠠ᠂ ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ ᠲᠠᠭᠢᠯᠭ᠎ᠠ᠂ ᠠᠷᠪᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ  ᠬᠤᠶᠠᠷ ᠤᠨ ᠲᠠᠭᠢᠯᠭ᠎ᠠ ᠵᠠᠷᠭᠡ ᠪᠠᠶᠢᠳᠠᠭ᠃

ᠭᠤᠷᠪᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠨᠢᠭᠡᠨ ᠤ ᠲᠠᠭᠢᠯᠭ᠎ᠠ ᠨᠢ ᠴᠠᠭᠠᠨ ᠰᠥᠷᠥᠭ ᠤᠨ ᠲᠠᠭᠢᠯᠭ᠎ᠠ ᠪᠤᠯᠤᠨ᠎ᠠ᠃ ᠲᠤᠰ  ᠡᠳᠤᠷ ᠤᠨ ᠲᠠᠭᠢᠯᠭ᠎ᠠ ᠳᠤ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠭᠥᠷᠥᠭ ᠲᠤ ᠨᠢᠭᠡ ᠵᠤᠯᠠ ᠡᠷᠭᠦᠵᠥ᠂ ᠮᠥᠷᠭᠦᠭᠰᠡᠨ ᠤ ᠲᠠᠷᠠᠭ᠎ᠠ᠂  ᠭᠠᠳᠠᠨ᠎ᠠ ᠰᠢᠷᠡᠭᠡ ᠲᠠᠯᠪᠢᠵᠤ᠂ ᠲᠤᠯᠤᠭ᠎ᠠ ᠲᠤᠯᠤᠭ᠎ᠠ ᠪᠠᠷ ᠭᠤᠷᠪᠠᠨ ᠮᠥᠷ ᠨᠠᠶᠢᠳᠠ ᠬᠤᠷᠢᠨ ᠨᠢᠭᠡᠨ ᠲᠠᠭᠢᠯ ᠳᠤ ᠠᠶᠢᠷᠠᠭ ᠪᠤᠶᠤ  ᠰᠦ ᠭᠢᠵᠥ᠂ ᠭᠤᠷᠪᠠ ᠮᠥᠷᠭᠦᠭᠡᠳ᠂ ᠬᠤᠷᠢᠨ ᠨᠢᠭᠡᠨ ᠲᠠᠭᠢᠯ  ᠰᠦ  ᠶᠢᠨ ᠰᠠᠴᠤᠯᠢ ᠡᠷᠭᠦᠳᠡᠭ᠃ ᠭᠤᠷᠪᠠᠨ ᠮᠥᠷ ᠲᠠᠭᠢᠯ ᠨᠢ ᠭᠤᠷᠪᠠᠨ ᠰᠠᠷ᠎ᠠ ᠶᠢ ᠲᠥᠯᠥᠭᠡᠯᠡᠵᠥ᠂ ᠬᠤᠷᠢᠨ ᠨᠢᠭᠡᠨ ᠲᠠᠭᠢᠯ ᠨᠢ ᠬᠤᠷᠢᠨ ᠨᠢᠭᠡᠨ ᠤ  ᠡᠳᠤᠷ ᠢ ᠲᠥᠯᠥᠭᠡᠯᠡᠨ ᠪᠡᠯᠭᠡᠳᠡᠳᠡᠭ᠃

ᠲᠥᠷᠪᠡᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ ᠲᠠᠭᠢᠯᠭ᠎ᠠ ᠶᠢ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠠᠭᠠᠯᠢ ᠶᠢᠨ ᠲᠠᠭᠢᠯᠭ᠎ᠠ ᠭᠡᠳᠡᠭ᠃ ᠰᠠᠭᠠᠯᠢ ᠶᠢᠨ ᠲᠠᠭᠢᠯᠭ᠎ᠠ ᠨᠢ ᠰᠢᠨ᠎ᠠ ᠰᠠᠭᠠᠯᠢ ᠪᠠᠷ ᠠᠩᠬ᠎ᠠ ᠨᠠᠷᠡᠭᠰᠡᠨ ᠬᠤᠷᠢᠨ ᠨᠢᠭᠡᠨ ᠲᠤᠭᠤᠭᠠᠨ ᠤ ᠰᠠᠷᠬᠤᠳ ᠤᠨ ᠲᠡᠭᠡᠵᠢ ᠪᠠᠷ ᠲᠠᠭᠢᠯ ᠡᠷᠭᠦᠭᠦ ᠶᠢ ᠭᠡᠯᠡᠳᠡᠭ᠃ ᠰᠠᠴᠤᠯᠢ ᠶᠢᠨ ᠲᠠᠭᠢᠯᠭ᠎ᠠ ᠳᠤ ᠲᠠᠶᠢᠰᠢ᠂ ᠵᠠᠰᠠᠭᠤᠯ᠂ ᠢᠷᠥᠭᠡᠯᠴᠢ᠂ ᠴᠡᠷᠭᠢᠴᠢ᠂ ᠮᠠᠩᠯᠠᠢ᠂ ᠭᠠᠯᠴᠢ ᠲᠤᠰᠪᠥᠷᠢ ᠨᠢᠭᠡ ᠭᠥᠮᠥᠨ ᠤᠷᠤᠯᠴᠠᠵᠤ᠂ ᠵᠤᠮᠤ ᠶᠠᠮᠤᠳᠤ᠂ ᠵᠠᠰᠠᠭᠤᠯ᠂ ᠭᠠᠯᠴᠢ ᠭᠤᠷᠪᠠ ᠨᠢ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠢᠳᠥᠭᠡᠨ ᠤ ᠲᠠᠭᠢᠯᠭ᠎ᠠ ᠶᠢᠨ ᠰᠢᠷᠡᠭᠡᠨ ᠲᠡᠭᠡᠷ᠎ᠠ ᠬᠠᠳᠠᠭ ᠨᠢᠨᠳᠠᠷ᠂ ᠵᠤᠯᠠ ᠭᠥᠵᠢ᠂ ᠠᠷᠢᠭᠢ ᠰᠠᠷᠬᠤᠳ ᠢ ᠪᠡᠯᠡᠳᠭᠡᠵᠥ ᠲᠠᠯᠪᠢᠳᠠᠭ᠃ ᠲᠠᠶᠢᠰᠢ ᠲᠠᠭᠠᠳᠬᠠᠯ ᠤᠡᠭᠰᠢᠵᠥ᠂ ᠬᠠᠳᠠᠭ ᠨᠢᠨᠳᠡᠷ ᠂ ᠵᠤᠯᠠ ᠭᠥᠵᠢ ᠡᠷᠭᠦᠵᠥ᠂ ᠤᠯᠠᠨ ᠢᠶᠠᠷ ᠢᠶᠠᠨ ᠮᠥᠷᠭᠦᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠢᠷᠥᠭᠡᠯᠴᠢ ᠠᠴᠠ  ᠪᠥᠭᠡ ᠪᠡᠯᠭᠦᠳᠠᠢ ᠎ ᠶᠢᠨ ᠥᠴᠢᠭ ᠤᠨ ᠰᠤᠳᠤᠷ  ᠎ ᠢ ᠤᠡᠭᠰᠢᠳᠠᠭ᠃ ᠥᠴᠢᠭ ᠤᠡᠭᠰᠢᠵᠤ ᠲᠠᠭᠤᠰᠬᠤ ᠥᠶ᠎ᠠ ᠳᠤ ᠂ ᠴᠡᠷᠭᠢᠴᠢ ᠴᠡᠷᠭᠢ ᠲᠠᠯᠠᠳᠴᠤ ᠂  ᠶᠡᠭᠡ ᠮᠤᠩᠭᠤᠯ  ᠂  ᠪᠠᠭ᠎ᠠ ᠮᠤᠩᠭᠤᠯ  ᠭᠡᠭᠦ ᠠᠷᠪᠠᠨ ᠬᠤᠶᠠᠷ ᠴᠡᠷᠭᠢ ᠶᠢᠨ ᠲᠠᠭᠤᠤ ᠡᠭᠢᠯᠡᠭᠦᠯᠵᠥ᠂ ᠬᠤᠷᠢᠨ ᠨᠢᠭᠡᠨ ᠲᠤᠭᠤᠭᠠᠨ ᠤ ᠰᠠᠷᠬᠤᠳ ᠤᠨ ᠲᠡᠭᠡᠵᠢ ᠪᠠᠷ ᠲᠠᠭᠢᠯᠭ᠎ᠠ ᠡᠷᠭᠦᠵᠥ ᠲᠡᠭᠦᠰᠳᠡᠭ᠃

ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠨᠢᠭᠡᠨ ᠤ ᠲᠠᠭᠢᠯᠭ᠎ᠠ ᠨᠢ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠢᠳᠥᠭᠡᠨ ᠳᠤ ᠤᠭᠤᠷᠠᠭ ᠬᠤᠷᠠᠭᠠᠨ ᠲᠠᠭᠢᠯᠭ᠎ᠠ ᠡᠷᠭᠦᠳᠡᠭ᠃ ᠲᠠᠭᠢᠯᠭ᠎ᠠ ᠶᠢᠨ ᠶᠠᠪᠤᠴᠠ ᠨᠢ ᠲᠥᠷᠪᠡᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ  ᠲᠠᠭᠢᠯᠭ᠎ᠠ ᠲᠠᠢ ᠠᠳᠠᠯᠢ ᠪᠠᠶᠢᠳᠠᠭ᠃

ᠵᠢᠷᠭᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ ᠲᠠᠭᠢᠯᠭ᠎ᠠ ᠳᠤ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠢᠳᠥᠭᠡᠨ ᠳᠤ  ᠬᠤᠷᠢᠨ ᠨᠢᠭᠡᠨ ᠥᠳᠭᠡᠷᠡᠭᠦᠯᠥᠭᠰᠡᠨ ᠰᠠᠭᠠᠯᠢ ᠶᠢᠨ ᠲᠠᠭᠡᠵᠢ ᠪᠡᠯᠡᠭ ᠲᠠᠯᠪᠢᠵᠥ ᠮᠥᠷᠭᠦᠳᠡᠭ᠃ ᠡᠭᠦᠨ ᠢ ᠪᠠᠰᠠ ᠰᠠᠭᠠᠯᠢ ᠥᠳᠭᠡᠷᠡᠭᠦᠯᠭᠦ ᠲᠠᠭᠢᠯᠭ᠎ᠠ ᠭᠡᠳᠡᠭ᠃ ᠲᠠᠭᠢᠯᠭ᠎ᠠ ᠶᠢᠨ ᠶᠠᠪᠤᠴᠠ ᠨᠢ ᠲᠥᠷᠪᠡᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ  ᠲᠠᠭᠢᠯᠭ᠎ᠠ ᠲᠠᠢ ᠠᠳᠠᠯᠢ ᠪᠠᠶᠢᠳᠠᠭ᠃

ᠠᠷᠪᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠬᠤᠶᠠᠷ ᠤᠨ ᠲᠠᠭᠢᠯᠭ᠎ᠠ ᠨᠢ ᠪᠥᠭᠡ ᠪᠡᠯᠭᠦᠳᠠᠢ ᠶᠢᠨ ᠰᠢᠳᠥᠭᠡᠨ ᠢ ᠨᠢᠭᠡ  ᠪᠥᠭᠦᠯᠢ ᠬᠤᠨᠢᠨ ᠥᠳᠭᠡ ᠰᠢᠭᠦᠰᠤ ᠪᠠᠷ ᠲᠠᠭᠢᠵᠥ ᠮᠥᠷᠭᠦᠳᠡᠭ᠃ ᠲᠠᠭᠢᠯᠭ᠎ᠠ ᠶᠢᠨ ᠶᠠᠪᠤᠴᠠ ᠨᠢ ᠲᠥᠷᠪᠡᠨ ᠰᠠᠷ᠎ᠠ  ᠎ ᠶᠢᠨ ᠬᠤᠷᠢᠨ ᠲᠤᠯᠤᠭᠠᠨ ᠤ ᠲᠠᠭᠢᠯᠭ᠎ᠠ ᠲᠠᠢ ᠠᠳᠠᠯᠢ ᠪᠠᠶᠢᠳᠠᠭ᠃