ᠠᠳᠠᠯᠢ ᠪᠤᠰᠤ ᠤᠪᠤᠭ ᠤᠨ ᠭᠥᠮᠥᠰ ᠨᠢᠭᠡ ᠨᠢᠭᠡᠨ ᠢᠶᠠᠨ ᠢᠳᠡᠭᠡᠵᠤ ᠨᠠᠶᠢᠳᠠᠬᠰᠠᠨ ᠰᠠᠭᠤᠷᠢᠨ ᠳᠤ ᠬᠠᠷᠢᠯᠴᠠᠨ ᠲᠥᠰᠢᠭ ᠲᠤᠯᠭᠠᠭᠤᠷᠢ ᠪᠤᠯᠵᠤ᠂ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠨᠢᠭᠡᠳᠭᠡᠭᠦ ᠭᠡᠰᠡᠨ ᠵᠤᠷᠢᠯᠭ᠎ᠠ ᠪᠠᠷ ᠵᠤᠭᠢᠬᠤ ᠶᠤᠰᠤᠯᠠᠯ ᠶᠠᠪᠤᠭᠤᠯᠵᠤ ᠠᠨᠳᠠ ᠪᠤᠯᠤᠯᠴᠠᠳᠠᠭ ᠵᠠᠩᠰᠢᠯ᠃ ᠠᠨᠳᠠᠯᠠᠬᠤ ᠶᠤᠰᠤ ᠪᠤᠯ ᠮᠤᠩᠭᠤᠯᠴᠤᠳ ᠤᠨ ᠨᠥᠭᠦᠷᠰᠡᠭ ᠨᠠᠶᠢᠷᠰᠠᠭ ᠰᠠᠳᠭᠢᠯᠭᠡ ᠶᠢᠨ ᠭᠢᠨᠢ ᠥᠪᠡᠷᠮᠢᠴᠠ ᠤᠨᠴᠠᠯᠢᠭ ᠲᠠᠢ ᠠᠵᠢᠯᠯᠠᠭ᠎ᠠ ᠶᠤᠮ᠃ ᠠᠨᠳᠠᠯᠠᠬᠤ ᠶᠤᠰᠤᠨ ᠤ ᠡᠭᠦᠰᠤᠯ ᠨᠢ ᠡᠷᠳᠠ ᠥᠶ᠎ᠠ ᠲᠠᠢ ᠬᠤᠯᠪᠤᠭᠳᠠᠳᠠᠭ᠃ ᠡᠨᠡ ᠲᠤᠬᠠᠢ ᠪ᠊ • ᠶ᠊ • ᠸᠯᠠᠳᠢᠮᠢᠷᠼᠤᠸ᠋ ᠲᠠᠮᠳᠡᠭᠯᠡᠭᠦ ᠳᠤ ᠪᠠᠨ 《ᠡᠷᠳᠠᠨ ᠤ ᠥᠶ᠎ᠠ ᠶᠢᠨ ᠮᠤᠩᠭᠤᠯᠴᠤᠳ ᠤᠨ ᠲᠤᠳᠤᠷ᠎ᠠ ᠬᠠᠷᠠᠭᠳᠠᠬᠤ ᠵᠢᠷᠤᠮ ᠤᠨ ᠠᠬ᠎ᠠ ᠲᠡᠭᠦᠥ ᠪᠠᠷᠢᠯᠳᠤᠬᠤ ᠶᠤᠰᠤ ᠪᠤᠯ ᠤᠪᠤᠭ ᠤᠳ ᠤᠨ ᠬᠤᠭᠤᠷᠤᠨᠳᠤᠭᠢ ᠬᠠᠷᠢᠴᠠᠭᠠᠨ ᠤ ᠭᠡᠪᠴᠢᠶ᠎ᠠ ᠳᠤ ᠪᠠᠭᠳᠠᠨ᠎ᠠ᠃ ᠬᠤᠶᠠᠷ ᠭᠥᠮᠥᠨ ᠲᠠᠩᠭᠠᠷᠢᠭ ᠲᠠᠯᠪᠢᠵᠥ ᠨᠠᠶᠢᠷᠠᠯᠳᠤᠨ᠂ ᠪᠡᠯᠡᠭ ᠰᠤᠯᠢᠯᠴᠠᠪᠠᠯ ᠠᠨᠳᠠ (ᠵᠢᠷᠤᠮ ᠤᠨ ᠠᠬ᠎ᠠ ᠲᠡᠭᠦᠥ) ᠪᠤᠯᠴᠢᠬᠠᠳᠠᠭ᠃ ᠲᠠᠳᠠ ᠭᠡᠳᠦ᠋ᠢᠪᠠᠷ ᠴᠢᠰᠤᠨ ᠲᠥᠷᠥᠯ ᠤᠨ ᠬᠤᠯᠪᠤᠭ᠎ᠠ ᠪᠠᠶᠢᠬᠤ ᠪᠤᠯᠪᠠᠴᠤ ᠶᠠᠷᠤ ᠳᠤ ᠪᠠᠨ ᠠᠳᠠᠯᠢ ᠪᠤᠰᠤ ᠬᠤᠶᠠᠷ ᠤᠪᠤᠭᠳᠠᠨ ᠎ ᠤ ᠭᠥᠮᠥᠰ ᠪᠠᠶᠢᠳᠠᠭ᠃ ᠡᠨᠡ ᠪᠤᠯ ᠡᠷᠳᠠᠨ ᠤ ᠥᠶ᠎ᠠ ᠶᠢᠨ ᠮᠤᠩᠭᠤᠯᠴᠤᠳ ᠤᠨ ᠵᠠᠩᠰᠢᠯ ᠮᠥᠨ》 ᠭᠡᠵᠠᠢ᠃ ᠢᠡᠭᠭᠢᠵᠤ ᠠᠨᠳᠠᠯᠠᠬᠤ ᠶᠢ ᠨᠤᠮ ᠵᠤᠭᠢᠶᠠᠯ ᠳᠤ ᠠᠳᠠᠯᠢ ᠪᠤᠰᠤ ᠪᠠᠷ ᠲᠠᠮᠳᠡᠭᠯᠡᠵᠥ᠂ ᠭᠠᠵᠠᠷ ᠭᠠᠵᠠᠷ ᠶᠠᠩᠵᠤ ᠪᠥᠷᠢ ᠪᠠᠷ ᠨᠠᠷᠠᠯᠡᠳᠡᠭ᠃ ᠲᠤᠬᠠᠢᠢᠯᠠᠪᠠᠯ ᠠᠮᠠᠷᠠᠯᠳᠤᠬᠤ᠂ ᠠᠨᠳᠠᠭᠠᠷᠯᠠᠬᠤ᠂ ᠠᠬ᠎ᠠ ᠲᠡᠭᠦᠥ ᠲᠠᠩᠭᠠᠷᠢᠭ ᠪᠠᠷᠢᠯᠳᠤᠬᠤ᠂ ᠠᠮᠢᠨ ᠲᠠᠩᠭᠠᠷᠢᠭ ᠪᠠᠷᠢᠯᠳᠤᠬᠤ᠂ ᠠᠨᠳᠠᠭᠠᠢᠢᠯᠠᠵᠤ ᠲᠠᠩᠭᠠᠷᠢᠭᠯᠠᠬᠤ᠂ ᠵᠢᠷᠤᠮ ᠤᠨ ᠠᠬ᠎ᠠ ᠲᠡᠭᠦᠥ ᠪᠠᠷᠢᠯᠳᠤᠬᠤ᠂ ᠠᠨᠳᠠ ᠠᠬ᠎ᠠ ᠲᠡᠭᠦᠥ ᠪᠤᠯᠬᠤ᠂ ᠲᠡᠭᠷᠢ ᠳᠤ ᠮᠥᠷᠭᠦᠵᠥ ᠠᠬ᠎ᠠ ᠲᠡᠭᠦᠥ ᠪᠤᠯᠬᠤ᠂ ᠠᠮᠠ ᠪᠠᠷᠢᠬᠤ ᠭᠡᠭᠦ ᠮᠠᠳᠤ᠃ ᠡᠷᠳᠠᠨ ᠤ ᠮᠤᠩᠭᠤᠯᠴᠤᠳ ᠤᠨ ᠠᠨᠳᠠᠯᠠᠬᠤ ᠶᠤᠰᠤᠨ ᠤ ᠲᠤᠬᠠᠢ 《ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ》《ᠵᠢᠩᠭᠠᠷ》  ᠤᠨ ᠵᠠᠷᠭᠡ ᠪᠢᠴᠢᠭ ᠤᠨ ᠪᠠ ᠠᠮᠠᠨ ᠵᠤᠭᠢᠶᠠᠯ ᠤᠨ ᠪᠥᠳᠥᠭᠡᠯ ᠤᠳ ᠲᠤ᠂ 《ᠤᠷᠢᠳᠤᠰ ᠥᠳᠡᠭᠦᠰ ᠤᠨ ᠥᠭᠡ ᠰᠤᠨᠤᠰᠴᠤ᠂ ︿ᠠᠨᠳᠠ ᠭᠥᠮᠥᠨ ᠠᠮᠢᠨ ᠨᠢᠭᠡ ᠥᠯᠥ ᠲᠠᠪᠴᠢᠯᠳᠤᠨ᠂ ᠠᠮᠢᠨ ᠤ ᠠᠷᠠᠴᠢ ᠪᠤᠯᠤᠶᠤ﹀ ᠭᠡᠮᠡᠨ ᠠᠮᠠᠷᠠᠯᠳᠤᠬᠤᠢ ᠶᠤᠰᠤᠨ ᠲᠠᠶᠢᠮᠥ》《ᠡᠷᠳᠠ ᠡᠳᠤᠷ ᠥᠴᠥᠭᠡᠨ ᠴᠠᠭ ᠲᠤ ᠬᠤᠷᠬᠤᠨᠠᠭ ᠵᠤᠪᠤᠷ᠎ᠠ ᠬᠠᠨ ᠠᠨᠳᠠ ᠎ ᠯᠤᠭ᠎ᠠ ᠠᠨᠳᠠ ᠭᠡᠮᠡᠯᠳᠤᠷᠤᠨ᠂ ᠥᠯᠥ ᠰᠢᠩᠭᠡᠭᠦᠢ ᠢᠳᠡᠭᠡ ᠢᠳᠡᠯᠳᠤᠵᠤ᠂ ᠥᠯᠥ ᠤᠮᠠᠷᠳᠠᠬᠤ ᠥᠭᠡᠰ ᠥᠭᠦᠯᠡᠯᠳᠤᠵᠤ ᠂ ᠭᠥᠨᠵᠢᠯᠠ ᠳᠤ ᠪᠠᠨ ᠬᠠᠭᠠᠯᠳᠠᠵᠤ ᠠᠬᠳᠠᠵᠤᠭᠤ‍ᠶ᠎ᠠ》《ᠠᠬ᠎ᠠ ᠲᠡᠭᠦᠥ ᠲᠠᠩᠭᠠᠷᠢᠭ ᠪᠠᠷᠢᠯᠳᠤᠵᠤ᠂ ᠱᠠᠪᠠ ᠶᠢᠨ ᠠᠮᠠ ᠰᠢᠷᠬ᠎ᠠ ᠪᠠᠨ ᠲᠤᠯᠢᠶᠠᠯᠴᠠᠭᠠᠳ᠂ ᠰᠠᠭᠢᠬᠰᠠᠨ ᠰᠢᠳᠥᠭᠡᠨ ᠳᠤ ᠪᠠᠨ ᠮᠥᠷᠭᠦᠭᠡᠳ᠂ ᠠᠮᠢᠨ ᠲᠠᠩᠭᠠᠷᠢᠭ ᠪᠠᠷᠢᠯᠳᠤᠭᠠᠳ》 ᠭᠡᠭᠦ ᠮᠠᠳᠤ ᠪᠠᠷ ᠲᠠᠮᠳᠡᠭᠯᠡᠭᠳᠡᠭᠰᠡᠨ ᠪᠠᠶᠢᠳᠠᠭ᠃ ᠡᠷᠳᠠᠨ ᠤ ᠮᠤᠩᠭᠤᠯᠴᠤᠳ ᠤᠨ ᠠᠨᠳᠠᠯᠠᠬᠤ ᠶᠤᠰᠤᠨ ᠤ ᠡᠭᠦᠰᠥᠯ ᠪᠥᠷᠢᠯᠳᠤᠯ᠂ ᠭᠥᠭᠵᠢᠯ ᠬᠤᠪᠢᠷᠠᠯ ᠤᠨ ᠪᠠᠶᠢᠳᠠᠯ ᠠᠴᠠ ᠥᠵᠡᠭᠦ ᠳᠤ᠂ ᠴᠢᠰᠤᠳᠠᠵᠤ ᠠᠨᠳᠠᠯᠠᠬᠤ ᠂ ᠠᠮᠠᠯᠳᠠᠵᠤ ᠠᠨᠳᠠᠯᠠᠬᠤ᠂ ᠰᠢᠳᠥᠭᠡᠨ ᠳᠤ ᠠᠨᠳᠠᠯᠠᠬᠤ᠂ ᠪᠡᠯᠡᠭ ᠢᠶᠠᠷ ᠠᠨᠳᠠᠯᠠᠬᠤ᠂ ᠲᠤᠰᠠᠯᠠᠵᠤ ᠠᠨᠳᠠᠯᠠᠬᠤ ᠵᠡᠷᠭᠡ ᠠᠳᠠᠯᠢ ᠪᠤᠰᠤ ᠠᠷᠭ᠎ᠠ ᠭᠡᠯᠪᠡᠷᠢ ᠲᠠᠢ ᠪᠠᠶᠢᠬᠰᠠᠨ ᠪᠥᠭᠡᠳ ᠠᠨᠳᠠᠭᠠᠢᠢᠯᠠᠵᠤ ᠲᠠᠩᠭᠠᠷᠢᠭᠯᠠᠬᠤ ᠳᠤ ᠬᠤᠯᠪᠤᠭᠳᠠᠭᠰᠠᠨ ᠠᠨᠳᠠᠭᠠᠢ ᠪᠠᠳᠤᠯᠠᠬᠤ᠂ ᠠᠨᠳᠠᠭᠠᠢ ᠠᠯᠳᠠᠬᠤ᠂ ᠠᠨᠳᠠᠭᠠᠢ ᠨᠡᠭᠡᠭᠦ ᠮᠠᠳᠤ ᠥᠪᠡᠷᠮᠢᠴᠠ ᠤᠨᠴᠠᠭᠠᠢ ᠠᠭᠤᠯᠭ᠎ᠠ ᠪᠠᠷ ᠪᠥᠭᠦᠯᠢ ᠰᠢᠰᠲ᠋ᠧᠮ ᠢᠶᠠᠨ ᠪᠥᠷᠢᠯᠳᠥᠭᠦᠯᠥᠭᠰᠡᠨ ᠶᠤᠮ᠃