ᠮᠤᠩᠭᠤᠯᠴᠤᠳ ᠤᠨ ᠭᠠᠤᠯᠢᠨ ᠵᠤᠭᠤᠰᠤᠨ ᠲᠥᠯᠭᠡ ᠥᠵᠠᠯᠭᠡ ᠳᠤ᠂ ᠭᠠᠭᠴᠠ ᠵᠤᠭᠤᠰᠤᠨ ᠲᠥᠯᠭᠡ᠂ ᠭᠤᠷᠪᠠᠨ ᠵᠤᠭᠤᠰᠤᠨ ᠲᠥᠯᠭᠡ᠂ ᠲᠠᠪᠤᠨ ᠵᠤᠭᠤᠰᠤᠨ ᠲᠥᠯᠭᠡ᠂ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠤᠯᠠᠮᠵᠢᠯᠠᠭᠳᠠᠵᠤ ᠪᠠᠶᠢᠬᠰᠠᠨ ᠪᠤᠯᠪᠠᠴᠤ᠂ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠨᠢ ᠨᠠᠯᠢᠶᠠᠳ ᠲᠥᠭᠡᠮᠡᠯ ᠪᠠᠶᠢᠪᠠ᠃ᠲᠥᠯᠭᠡ ᠳᠤ ᠭᠡᠷᠡᠭᠯᠡᠭᠦ ᠭᠠᠤᠯᠢᠨ ᠵᠤᠭᠤᠰᠤᠨ ᠤ ᠨᠢᠭᠡ ᠲᠠᠯ᠎ᠠ ᠳᠤ ᠨᠢ ᠭᠢᠳᠠᠳ ᠥᠰᠥᠭ ᠲᠠᠢ᠂ ᠨᠥᠭᠦᠭᠡ ᠲᠠᠯ᠎ᠠ ᠳᠤ ᠨᠢ ᠮᠠᠨᠵᠤ ᠥᠰᠥᠭ ᠲᠠᠢ᠂ ᠲᠤᠮᠳᠠ ᠪᠠᠨ ᠲᠥᠷᠪᠡᠯᠵᠢᠨ ᠨᠥᠭᠡ ᠲᠠᠢ ᠪᠠᠶᠢᠳᠠᠭ᠃ ᠭᠢᠳᠠᠳ ᠥᠰᠥᠭ ᠲᠠᠢ ᠲᠠᠯ᠎ᠠ ᠶᠢ ᠨᠢ ᠬᠠᠷ᠎ᠠ ᠲᠠᠯ᠎ᠠ᠂ ᠮᠠᠨᠵᠤ ᠥᠰᠥᠭ ᠲᠠᠢ ᠲᠠᠯ᠎ᠠ ᠶᠢ ᠨᠢ ᠴᠠᠭᠠᠨ ᠲᠠᠯ᠎ᠠ ᠭᠡᠳᠡᠭ᠃ ᠢᠢᠮᠥ ᠠᠴᠠ ᠭᠠᠤᠯᠢᠨ ᠵᠤᠭᠤᠰᠤᠨ ᠲᠥᠯᠭᠡ ᠨᠢ ᠴᠠᠭᠠᠨ ᠲᠠᠯ᠎ᠠ ᠪᠠ ᠬᠠᠷ᠎ᠠ ᠲᠠᠯ᠎ᠠ ᠭᠡᠭᠦ ᠬᠤᠶᠠᠷ ᠠᠩᠭᠢ ᠳᠤ ᠬᠤᠪᠢᠶᠠᠭᠳᠠᠳᠠᠭ᠃

ᠭᠠᠤᠯᠢᠨ ᠵᠤᠭᠤᠰᠤᠨ ᠲᠥᠯᠭᠡ ᠶᠢ ᠭᠤᠤᠯᠳᠠᠭᠤ ᠲᠤᠰᠬᠠᠢ ᠪᠤᠯᠪᠠᠰᠤᠷᠠᠯ ᠲᠠᠢ ᠲᠥᠯᠭᠡᠴᠢ᠂ ᠮᠠᠷᠭᠡᠴᠢ ᠰᠢᠨᠵᠢᠳᠡᠭ᠃ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠳᠤ ᠤᠨᠴᠠᠭᠠᠢ ᠲᠠᠮᠳᠡᠭ ᠲᠠᠢ ᠨᠢᠭᠡ ᠵᠤᠭᠤᠰ ᠢᠶᠠᠨ 《ᠲᠥᠷᠥᠭᠦᠴᠢ  ᠶᠢᠨ ᠵᠤᠭᠤᠰ》 ᠭᠡᠳᠡᠭ᠃ ᠲᠥᠯᠭᠡ ᠥᠵᠡᠭᠦ ᠳᠤ ᠪᠠᠨ 《ᠲᠥᠷᠥᠭᠦᠴᠢ ᠶᠢᠨ ᠵᠤᠭᠤᠰᠤᠨ》 ᠳᠤ ᠪᠠᠨ ᠰᠢᠪᠰᠢᠳᠡᠭ ᠪᠤᠯᠬᠤᠷ᠂ ᠪᠠᠰᠠ 《ᠰᠢᠪᠰᠢᠯᠭᠡ ᠶᠢᠨ ᠵᠤᠭᠤᠰ》 ᠭᠡᠳᠡᠭ᠃ᠲᠥᠯᠭᠡ ᠥᠵᠡᠭᠦᠯᠥᠭᠴᠢ ᠬᠠᠳᠠᠭ᠂ ᠰᠠᠭᠠᠯᠢ ᠶᠢᠨ ᠲᠡᠭᠡᠵᠢ ᠶᠢᠨ ᠪᠡᠯᠡᠭ ᠠᠪᠴᠤ᠂ ᠲᠥᠯᠭᠡᠴᠢ ᠳᠤ ᠤᠴᠢᠭᠠᠳ ᠲᠥᠯᠭᠡ ᠥᠵᠡᠭᠦᠯᠭᠦ ᠤᠴᠢᠷ ᠶᠠᠪᠤᠳᠠᠯ ᠢ ᠠᠶᠢᠯᠠᠳᠬᠠᠳᠠᠭ᠃ ᠲᠥᠯᠭᠡᠴᠢ ᠲᠥᠯᠭᠡ ᠥᠵᠡᠭᠦ ᠳᠤ ᠪᠠᠨ ᠭᠠᠷ ᠂ ᠨᠢᠭᠤᠷ ᠢᠶᠠᠨ ᠤᠭᠢᠶᠠᠵᠤ᠂ ᠲᠥᠯᠭᠡ ᠶᠢᠨ ᠭᠠᠤᠯᠢᠨ ᠵᠤᠭᠤᠰ ᠢᠶᠠᠨ ᠠᠷᠴᠠ᠂ ᠭᠥᠵᠢ ᠪᠠᠷ ᠠᠷᠢᠭᠤᠳᠬᠠᠨ᠂ 《 ᠲᠥᠷᠥᠭᠦᠴᠢ ᠶᠢᠨ ᠵᠤᠭᠤᠰ》 ᠪᠤᠶᠤ 《ᠰᠢᠪᠰᠢᠯᠭᠡ ᠶᠢᠨ ᠵᠤᠭᠤᠰᠤᠨ》 ᠳᠤ ᠪᠠᠨ ᠲᠥᠯᠭᠡᠳᠡᠭᠦ ᠤᠴᠢᠷ ᠢᠶᠠᠨ ᠰᠢᠪᠰᠢᠳᠡᠭ᠃ ᠢᠡᠭᠭᠢᠭᠡᠳ ᠲᠥᠯᠭᠡ ᠶᠢᠨ ᠶᠢᠰᠤᠨ ᠵᠤᠭᠤᠰ ᠢᠶᠠᠨ ᠬᠤᠶᠠᠷ ᠠᠯᠠᠭᠠᠨ ᠳᠤ ᠪᠠᠨ ᠪᠢᠳᠡᠭᠦᠯᠡᠵᠥ᠂ ᠭᠤᠷᠪᠠ ᠤᠳᠠᠭ᠎ᠠ ᠰᠢᠪᠰᠢᠵᠤ᠂ ᠲᠠᠭᠢᠨ ᠭᠤᠷᠪᠠ ᠭᠤᠷᠪᠠ ᠪᠠᠷ ᠶᠢᠰᠤ ᠤᠳᠠᠭ᠎ᠠ ᠪᠠᠷᠠᠭᠤᠨ ᠠᠯᠠᠭ᠎ᠠ ᠠᠴᠠ ᠵᠡᠭᠦᠨ ᠠᠯᠠᠭᠠᠨ ᠳᠤ ᠪᠠᠨ ᠭᠥᠶᠥᠯᠭᠡᠨ᠂ ᠶᠢᠰᠥᠳᠡᠭᠢ ᠤᠳᠠᠭ᠎ᠠ ᠪᠠᠭᠤᠭᠰᠠᠨ ᠲᠥᠯᠭᠡ ᠶᠢᠨ ᠵᠤᠭᠤᠰᠤᠨ ᠤ ᠪᠠᠨ ᠬᠠᠷ᠎ᠠ᠂ ᠴᠠᠭᠠᠨ ᠲᠠᠯ᠎ᠠ ᠶᠢ ᠠᠯᠳᠠᠯ ᠥᠭᠡᠢ ᠪᠠᠷ ᠵᠡᠭᠦᠨ ᠠᠯᠠᠭᠠᠨ ᠲᠡᠭᠡᠷ᠎ᠠ ᠪᠠᠨ ᠵᠡᠭᠦᠨ ᠠᠴᠠ ᠪᠠᠷᠠᠭᠤᠨᠰᠢ ᠨᠤᠮᠤ ᠶᠢᠨ ᠭᠡᠯᠪᠡᠷᠢᠳᠠᠢ ᠵᠢᠭᠰᠠᠭᠠᠵᠤ᠂ ᠲᠥᠯᠭᠡ ᠪᠠᠨ ᠰᠢᠨᠵᠢᠳᠡᠭ᠃ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠶᠢᠨ ᠤᠷᠤᠨ ᠪᠠᠶᠢᠷᠢ ᠨᠢ ᠲᠤᠭᠳᠠᠭᠰᠠᠨ ᠨᠠᠷ᠎ᠠ ᠲᠠᠢ ᠪᠠᠶᠢᠳᠠᠭ᠃ ᠲᠤᠬᠠᠢᠢᠯᠠᠪᠠᠯ᠂ ᠵᠡᠭᠦᠨ ᠠᠴᠠ ᠲᠠᠷᠠᠭᠠᠯᠠᠨ ᠠᠭᠤᠯᠠ᠂ ᠭᠡᠷᠢᠶ᠎ᠠ᠂ ᠴᠢᠨ᠋ᠸ᠎ᠠ᠂ ᠨᠠᠷᠠ᠂ ᠰᠠᠷᠠ᠂ ᠤᠡᠭᠭᠤᠴᠠ᠂ ᠠᠷᠰᠯᠠᠨ᠂ ᠪᠤᠮᠪᠤ᠂ ᠰᠥᠮ᠎ᠠ ᠭᠡᠳᠡᠭ ᠪᠠ 《ᠲᠥᠷᠥᠭᠦᠴᠢ ᠶᠢᠨ ᠵᠤᠭᠤᠰ》 ᠪᠤᠶᠤ 《 ᠰᠢᠪᠰᠢᠯᠭᠡ ᠶᠢᠨ ᠵᠤᠭᠤᠰ》 ᠠᠯᠢ ᠤᠷᠤᠨ ᠳᠤ ᠲᠤᠰᠤᠭᠰᠠᠨ ᠪᠤᠯ ᠲᠠᠷᠠ ᠤᠷᠤᠨ ᠠᠴᠠ ᠰᠢᠨᠵᠢᠵᠥ᠂ ᠬᠠᠷ᠎ᠠ᠂ ᠴᠠᠭᠠᠨ ᠲᠠᠯ᠎ᠠ ᠲᠤᠰᠤᠭᠰᠠᠨ ᠪᠠᠶᠢᠳᠠᠯ ᠲᠠᠢ ᠬᠤᠯᠪᠤᠭᠳᠠᠭᠤᠯᠤᠨ ᠲᠥᠯᠭᠡ ᠶᠢᠨ ᠳ᠋ᠥᠩ ᠢ ᠭᠠᠷᠭᠠᠳᠠᠭ ᠪᠠᠶᠢᠨ᠎ᠠ᠃

ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠳᠤ ᠶᠢᠰᠤ ᠶᠢᠰᠤ ᠨᠠᠶᠠᠨ ᠨᠢᠭᠡᠨ ᠰᠢᠨᠵᠢ ᠲᠠᠢ ᠭᠡᠳᠡᠭ᠃ ᠡᠨᠡ ᠨᠢ 《 ᠲᠥᠷᠥᠭᠦᠴᠢ ᠶᠢᠨ ᠵᠤᠭᠤᠰ》 ᠤᠨ ᠪᠡᠭᠤᠭᠰᠠᠨ ᠤᠷᠤᠨ ᠪᠠ ᠬᠠᠷ᠎ᠠ᠂ ᠴᠠᠭᠠᠨ ᠲᠠᠯ᠎ᠠ ᠶᠢᠨ ᠠᠳᠠᠯᠢ ᠪᠤᠰᠤ ᠪᠠᠶᠢᠳᠠᠯ  ᠠᠴᠠ ᠪᠤᠯᠤᠭᠰᠠᠨ ᠪᠥᠭᠡᠳ ᠲᠡᠳᠡᠭᠡᠷ ᠨᠢ ᠲᠤᠰ ᠲᠤᠰ ᠤᠨ ᠨᠠᠷᠠᠶᠢᠳᠤᠯ ᠲᠠᠢ ᠪᠠᠶᠢᠳᠠᠭ᠃ ᠲᠤᠬᠠᠢᠢᠯᠠᠪᠠᠯ᠂ 《ᠴᠠᠭᠠᠨ ᠠᠭᠤᠯᠠ ᠲᠥᠷᠪᠡᠨ ᠭᠥᠯ ᠲᠠᠢ》᠂ 《ᠴᠠᠭᠠᠨ ᠴᠢᠨ᠋ᠸ᠎ᠠ ᠲᠥᠷᠪᠡᠨ ᠪᠠᠭᠤᠳᠠᠯ ᠲᠠᠢ》᠂ 《ᠬᠠᠷ᠎ᠠ ᠠᠷᠰᠯᠠᠨ ᠤ ᠬᠠᠷ᠎ᠠ ᠰᠢᠨᠵᠢ》 ᠭᠡᠭᠦ ᠮᠠᠳᠤ᠃ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠶᠢᠨ ᠡᠯ᠎ᠠ ᠪᠠᠭᠤᠳᠠᠯ ᠤᠨ ᠲᠤᠬᠠᠢ ᠯ᠊ • ᠬᠤᠷᠴᠠᠪᠠᠭᠠᠳᠤᠷ᠂ ᠴ᠊ •ᠥᠵᠥᠮ᠎ᠠ ᠨᠠᠷ ᠤᠨ ᠵᠤᠭᠢᠶᠠᠭᠰᠠᠨ 《ᠮᠤᠩᠭᠤᠯ ᠤᠨ ᠪᠥᠭᠡ ᠮᠥᠷᠭᠦᠯ ᠤᠨ ᠲᠠᠶᠢᠯᠭ᠎ᠠ ᠲᠠᠭᠢᠯᠭ᠎ᠠ ᠶᠢᠨ ᠰᠤᠶᠤᠯ》 ᠨᠤᠮ ᠳᠤ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠢ ᠥᠨᠳᠤᠰᠤᠯᠠᠪᠠᠯ᠂ ᠴᠠᠭᠠᠨ ᠠᠭᠤᠯᠠ ᠲᠥᠷᠥᠭᠦᠴᠢ᠂ ᠬᠠᠷ᠎ᠠ ᠭᠡᠷᠢᠶ᠎ᠠ᠂ ᠬᠠᠷ᠎ᠠ ᠴᠢᠨ᠋ᠸ᠎ᠠ᠂ ᠴᠠᠭᠠᠨ ᠨᠠᠷᠠ᠂ ᠬᠠᠷ᠎ᠠ ᠰᠠᠷᠠ᠂ ᠴᠠᠭᠠᠨ ᠤᠡᠭᠭᠤᠴᠠ᠂ ᠬᠠᠷ᠎ᠠ ᠠᠷᠰᠯᠠᠨ᠂ ᠴᠠᠭᠠᠨ ᠪᠤᠮᠪᠤ᠂ ᠴᠠᠭᠠᠨ ᠰᠥᠮ᠎ᠠ ᠲᠤᠰᠪᠠᠯ 《ᠴᠠᠭᠠᠨ ᠠᠭᠤᠯᠠ ᠲᠥᠷᠪᠡᠨ ᠭᠥᠯ ᠲᠠᠢ》 ᠭᠡᠳᠡᠭ᠃ ᠭᠡᠷᠪᠠ ᠡᠷᠢᠯ ᠰᠤᠷᠠᠭ ᠲᠤ ᠶᠠᠪᠤᠪᠠᠯ᠂ ᠰᠤᠷᠠᠭᠯᠠᠭᠰᠠᠨ ᠶᠠᠭᠤᠮ᠎ᠠ ᠨᠢ ᠥᠨᠳᠤᠷ ᠭᠠᠵᠠᠷ ᠲᠤ ᠪᠠᠶᠢᠨ᠎ᠠ᠃ ᠭᠡᠷᠪᠠ ᠭᠥᠮᠥᠨ᠂ ᠠᠮᠢᠳᠠᠨ ᠤ ᠲᠤᠬᠠᠢ ᠴᠢᠮᠡᠭᠡ ᠰᠤᠷᠠᠭ ᠭᠥᠰᠡᠭᠰᠡᠨ ᠪᠤᠯ ᠥᠨᠳᠤᠷ ᠨᠠᠰᠤᠳᠠᠨ ᠠᠴᠠ ᠮᠡᠳᠡᠭᠡᠯᠡᠨ᠎ᠠ᠃ ᠭᠡᠷᠪᠠ ᠭᠡᠷᠡᠭ ᠶᠠᠪᠤᠳᠠᠯ ᠤᠨ ᠪᠥᠳᠥᠭᠦ ᠡᠰᠡᠭᠦ ᠶᠢ ᠰᠢᠨᠵᠢᠯᠡᠭᠰᠡᠨ ᠪᠤᠯ ᠭᠡᠷᠡᠭ ᠶᠠᠪᠤᠳᠠᠯ ᠨᠢ ᠤᠳᠠᠭᠠᠨ ᠳᠤ ᠪᠠᠨ ᠪᠥᠳᠥᠭᠦ ᠮᠠᠭᠠᠳ᠂ ᠨᠠᠯᠢᠶᠠᠳ ᠰᠠᠭᠠᠳ ᠲᠠᠢ᠂ ᠤᠴᠢᠷ  ᠨᠢ ᠨᠠᠷᠠ᠂ ᠤᠡᠭᠭᠤᠴᠠ᠂ ᠪᠤᠮᠪᠤ᠂ ᠰᠥᠮ᠎ᠠ ᠳᠤ ᠪᠥᠷ ᠭᠥᠯ ᠲᠠᠢ ᠪᠠᠶᠢᠨ᠎ᠠ᠃ ᠭᠡᠷᠪᠠ ᠠᠯᠳᠠᠭᠰᠠᠨ ᠮᠠᠯ ᠤᠨ ᠢᠶᠠᠨ ᠥᠭᠦᠭᠰᠡᠨ ᠠᠮᠢᠳᠤ ᠶᠢ ᠰᠢᠨᠵᠢᠯᠡᠭᠰᠡᠨ ᠪᠤᠯ ᠠᠮᠢᠳᠤ ᠪᠠᠶᠢᠨ᠎ᠠ᠂ ᠭᠡᠳᠠᠯ᠎ᠠ ᠨᠠᠯᠢᠶᠠᠳ ᠡᠷᠢᠯ ᠭᠢᠵᠥ ᠪᠠᠶᠢᠭᠠᠳ ᠤᠯᠤᠨ᠎ᠠ ᠭᠡᠭᠦ ᠮᠠᠳᠤ ᠪᠠᠷ ᠰᠢᠨᠵᠢᠳᠡᠭ᠃

ᠴᠠᠭᠠᠨ ᠴᠢᠨ᠋ᠸ᠎ᠠ ᠲᠥᠷᠥᠭᠦᠴᠢ᠂ ᠴᠠᠭᠠᠨ ᠨᠠᠷᠠ᠂ ᠬᠠᠷ᠎ᠠ ᠰᠠᠷᠠ᠂ ᠴᠠᠭᠠᠨ ᠤᠡᠭᠭᠤᠴᠠ᠂ ᠬᠠᠷ᠎ᠠ ᠠᠷᠰᠯᠠᠨ᠂ ᠴᠠᠭᠠᠨ ᠪᠤᠮᠪᠤ᠂ ᠬᠠᠷ᠎ᠠ ᠰᠥᠮ᠎ᠠ᠂ ᠬᠠᠷ᠎ᠠ ᠠᠭᠤᠯᠠ᠂ ᠴᠠᠭᠠᠨ ᠭᠡᠷᠢᠶ᠎ᠠ ᠲᠤᠰᠪᠠᠯ᠂ 《ᠴᠠᠭᠠᠨ ᠴᠢᠨ᠋ᠸ᠎ᠠ ᠲᠥᠷᠪᠡᠨ ᠪᠠᠭᠤᠳᠠᠯ ᠲᠠᠢ》 ᠭᠡᠳᠡᠭ᠃ ᠭᠡᠷᠪᠠ ᠡᠷᠢᠯ ᠰᠤᠷᠠᠭ ᠲᠤ ᠶᠠᠪᠤᠪᠠᠯ᠂ ᠰᠤᠷᠠᠭ ᠴᠢᠮᠡᠭᠡ ᠤᠯᠵᠤ ᠰᠤᠨᠤᠰᠬᠤ ᠪᠤᠶᠤ ᠡᠷᠢᠭ᠍ᠰᠡᠨ ᠵᠥᠢᠯ ᠢᠶᠠᠨ ᠤᠯᠤᠨ᠎ᠠ᠃ ᠭᠡᠷᠪᠠ ᠠᠩ ᠭᠥᠷᠥᠭᠡ ᠳᠤ ᠶᠠᠪᠤᠪᠠᠯ᠂ ᠠᠪᠠ ᠭᠠᠨᠵᠤᠭ᠎ᠠ ᠲᠠᠢ ᠪᠠᠶᠢᠨ᠎ᠠ᠃ ᠭᠡᠷᠪᠠ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠶᠠᠪᠤᠪᠠᠯ᠂ ᠲᠠᠶᠢᠨ ᠳᠤ ᠢᠯᠠᠯᠳᠠ ᠤᠯᠤᠨ᠎ᠠ᠃ ᠡᠨᠡ ᠲᠥᠯᠭᠡ ᠶᠢ ᠪᠠᠰᠠ 《ᠲᠠᠪᠤᠨ ᠴᠠᠭᠠᠨ ᠴᠢᠨ᠋ᠸ᠎ᠠ》 ᠭᠡᠳᠡᠭ᠃ ᠤᠴᠢᠷ ᠶᠠᠪᠤᠳᠠᠯ ᠪᠥᠭᠦᠨ ᠠᠯᠠᠭᠠᠨ ᠤ ᠲᠤᠳᠤᠷ᠎ᠠ ᠪᠠᠶᠢᠬᠤ ᠲᠤᠯᠠ ᠤᠨᠴᠠ ᠰᠠᠶᠢᠨ ᠲᠥᠯᠭᠡ ᠪᠤᠯᠤᠨ᠎ᠠ᠃ ᠭᠡᠷᠪᠠ ᠭᠤᠷᠪᠠ ᠪᠤᠶᠤ ᠲᠤᠯᠤᠭᠠᠨ ᠬᠠᠷ᠎ᠠ ᠴᠢᠨ᠋ᠸ᠎ᠠ ᠪᠠᠭᠤᠭᠰᠠᠨ ᠪᠤᠯ ᠮᠠᠭᠤ ᠲᠥᠯᠭᠡ ᠪᠤᠯᠤᠨ᠎ᠠ᠃ᠬᠠᠷ᠎ᠠ ᠠᠷᠰᠯᠠᠨ ᠲᠥᠷᠥᠭᠦᠴᠢ᠂ ᠴᠠᠭᠠᠨ ᠪᠤᠮᠪᠤ᠂ ᠴᠠᠭᠠᠨ ᠰᠥᠮ᠎ᠠ᠂ ᠬᠠᠷ᠎ᠠ ᠠᠭᠤᠯᠠ᠂ ᠴᠠᠭᠠᠨ ᠭᠡᠷᠢᠶ᠎ᠠ᠂ ᠴᠠᠭᠠᠨ ᠴᠢᠨ᠋ᠸ᠎ᠠ᠂ ᠬᠠᠷ᠎ᠠ ᠨᠠᠷᠠ᠂ ᠴᠠᠭᠠᠨ ᠰᠠᠷᠠ᠂ ᠴᠠᠭᠠᠨ ᠤᠡᠭᠭᠤᠴᠠ ᠲᠤᠰᠪᠠᠯ᠂ 《ᠬᠠᠷ᠎ᠠ ᠠᠷᠰᠯᠠᠨ ᠤ ᠬᠠᠷ᠎ᠠ ᠰᠢᠨᠵᠢ》 ᠭᠡᠳᠡᠭ᠃ ᠭᠡᠷᠪᠠ ᠮᠠᠯ ᠤᠨ ᠡᠷᠢᠯ ᠳᠤ ᠶᠠᠪᠤᠪᠠᠯ᠂ ᠠᠯᠳᠠᠭᠰᠠᠨ ᠮᠠᠯ ᠤᠯᠳᠠᠬᠤ ᠥᠭᠡᠢ᠃ ᠠᠩ ᠭᠥᠷᠥᠭᠡ  ᠳᠤ ᠶᠠᠪᠤᠪᠠᠯ᠂ ᠭᠠᠨᠵᠤᠭ᠎ᠠ ᠬᠤᠭᠤᠰᠤᠨ᠃ ᠭᠡᠷᠡᠭ ᠤᠴᠢᠷ ᠲᠤᠩ ᠪᠥᠳᠥᠮᠵᠢ ᠥᠭᠡᠢ ᠲᠥᠯᠭᠡ ᠪᠤᠯᠤᠨ᠎ᠠ᠃ ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠶᠢᠨ ᠪᠠᠭᠤᠴᠠ ᠳᠤ ᠠᠷᠰᠯᠠᠨ ᠤ ᠪᠠᠭᠤᠴᠠ ᠪᠤᠯ ᠬᠠᠮᠤᠭ ᠤᠨ ᠮᠠᠭᠤ ᠪᠠᠭᠤᠴᠠ ᠭᠡᠳᠡᠭ᠃

ᠶᠢᠰᠤᠨ ᠵᠤᠭᠤᠰᠤᠨ ᠲᠥᠯᠭᠡ ᠰᠢᠨᠵᠢᠭᠦ ᠳᠤ᠂ ᠲᠥᠯᠭᠡᠴᠢ ᠲᠥᠯᠭᠡ ᠶᠢᠨ ᠵᠤᠭᠤᠰ ᠢᠶᠠᠨ ᠰᠢᠪᠰᠢᠵᠥ ᠪᠠᠷᠠᠭᠠᠳ ᠤᠨᠠᠭᠠᠪᠠᠯ᠂ ᠲᠥᠯᠭᠡ ᠲᠥᠭᠡᠷᠢᠭᠦ ᠭᠡᠳᠡᠭ ᠪᠠ ᠶᠢᠰᠤᠨ ᠬᠠᠷ᠎ᠠ ᠠᠷᠰᠯᠠᠨ ᠲᠥᠷᠥᠭᠦᠴᠢ ᠲᠠᠢ ᠶᠢᠰᠤᠨ ᠬᠠᠷ᠎ᠠ ᠪᠠᠭᠤᠴᠠ ᠪᠠᠭᠤᠪᠠᠯ᠂ ᠲᠥᠯᠭᠡ ᠶᠢ ᠥᠷᠭᠦᠯᠵᠢᠯᠡᠭᠦᠯᠵᠥ ᠰᠢᠨᠵᠢᠭᠦ ᠥᠭᠡᠢ ᠵᠠᠷᠭᠡ ᠶᠤᠰᠤ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃