ᠵᠤᠬᠢᠶᠠᠭᠴᠢ:
ᠴᠠᠭ:2019-08-23
ᠥᠵᠡᠭᠰᠡᠨ : ℃
ᠢᠷᠡᠯᠲᠡ:
ᠮᠣᠩᠭᠣᠯᠴᠤᠳ ᠤᠨ ᠠᠶᠠᠨ ᠵᠠᠮ ᠤᠨ ᠴᠡᠭᠡᠷ ᠶᠣᠰᠣᠨ
ᠠᠶᠢᠯᠴᠢᠯᠠᠬᠤ ᠪᠣᠶᠣ ᠬᠣᠯᠠ ᠶᠢᠨ ᠠᠶᠠᠨ ᠳᠤ ᠮᠣᠷᠳᠠᠬᠤ ᠳᠠᠭᠠᠨ ᠡᠳᠦᠷ ᠦᠵᠡᠵᠦ ᠵᠦᠭ ᠴᠢᠭ ᠰᠣᠩᠭᠤᠳᠠᠭ ᠃ ᠶᠡᠷᠦᠩᠬᠡᠢ ᠳᠡᠬᠡᠨ ᠰᠢᠨᠡ ᠶᠢᠨ ᠬᠣᠶᠠᠷ ᠂ ᠰᠢᠨᠡ ᠶᠢᠨ ᠨᠠᠢᠮᠠᠨ ᠂ ᠠᠷᠪᠠᠨ ᠳᠥᠷᠪᠡᠨ ᠂ ᠬᠣᠷᠢᠨ ᠂ ᠬᠣᠷᠢᠨ ᠵᠢᠷᠭᠤᠭᠠᠨ ᠢ ᠠᠴᠠ ᠡᠳᠦᠷ ᠭᠡᠵᠦ ᠭᠠᠳᠠᠭᠰᠢ ᠭᠠᠷᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠃ ᠪᠠᠰᠠ ᠄ 《 ᠵᠦᠭ ᠦᠨ ᠮᠠᠭᠤ ᠵᠡᠭᠦᠨ ᠬᠣᠶᠢᠲᠤ ᠵᠦᠭ 》 ᠭᠡᠳᠡᠭ ᠲᠤᠯᠠ ᠵᠡᠭᠦᠨ ᠬᠣᠶᠢᠰᠢ ᠮᠦᠷ ᠭᠠᠷᠭᠠᠳᠠᠭ ᠦᠭᠡᠢ ᠃ ᠠᠶᠢᠯᠴᠢᠯᠠᠬᠤ ᠪᠣᠶᠣ ᠠᠶᠠᠨ ᠵᠠᠮ ᠳᠤ ᠶᠠᠪᠤᠬᠤ ᠶᠢᠨ ᠡᠮᠦᠨᠡ ᠬᠡᠷᠡᠭᠦᠯ ᠬᠢᠬᠦ ᠂ ᠬᠠᠷᠢᠶᠠᠵᠤ ᠵᠦᠭᠡᠬᠦ ᠂ ᠤᠬᠢᠯᠠᠬᠤ ᠂ ᠪᠣᠰᠤᠳ ᠲᠠᠢ ᠡᠶᠡ ᠡᠪᠳᠡᠷᠡᠬᠦ ᠶᠢ ᠴᠡᠭᠡᠷᠯᠡᠳᠡᠭ ᠃ ᠭᠠᠳᠠᠭᠰᠢ ᠭᠠᠷᠬᠤ ᠦᠶᠡ ᠳᠦ ᠭᠡᠷ ᠦᠨ ᠬᠦᠮᠦᠰ ᠨᠢ ᠦᠰᠦ ᠭᠡᠵᠢᠭᠡ ᠪᠡᠨ ᠰᠤᠯᠠ ᠲᠠᠯᠪᠢᠬᠤ ᠪᠣᠶᠣ ᠱᠦᠭᠦᠷᠳᠡᠵᠦ ᠰᠠᠮᠨᠠᠬᠤ ᠂ ᠦᠢᠯᠡ ᠤᠲᠠᠰᠤ ᠬᠦᠳᠡᠯᠭᠡᠬᠦ ᠵᠡᠷᠭᠡ ᠶᠢ ᠴᠡᠭᠡᠷᠯᠡᠳᠡᠭ ᠃
ᠵᠠᠮ ᠵᠠᠭᠤᠷᠠ ᠪᠠᠨ ᠬᠦᠮᠦᠨ ᠲᠠᠢ ᠠᠭᠤᠯᠵᠠᠪᠠᠯ ᠲᠠᠨᠢᠬᠤ ᠡᠰᠡᠬᠦ ᠶᠢ ᠢᠯᠭᠠᠯ ᠦᠭᠡᠢ ᠴᠦᠮ ᠮᠡᠨᠳᠦ ᠮᠡᠳᠡᠵᠦ ᠨᠡᠷᠡ ᠣᠪᠣᠭ ᠂ ᠨᠤᠲᠤᠭ ᠤᠰᠤ ᠪᠠᠨ ᠠᠰᠠᠭᠤᠯᠴᠠᠨ ᠥᠩᠭᠡᠷᠡᠳᠡᠭ ᠂ ᠪᠡᠯᠴᠢᠵᠦ ᠪᠠᠶᠢᠭᠠ ᠮᠠᠯ ᠤᠨ ᠡᠮᠦᠨᠡᠭᠦᠷ ᠭᠠᠷᠬᠤ ᠂ ᠰᠦᠷᠦᠭ ᠦᠨ ᠳᠤᠮᠳᠠᠭᠤᠷ ᠥᠩᠭᠡᠷᠡᠬᠦ ᠂ ᠬᠡᠪᠲᠡᠵᠦ ᠪᠠᠶᠢᠭᠠ ᠮᠠᠯ ᠢ ᠥᠷᠭᠦᠭᠡᠨ ᠪᠣᠰᠬᠠᠬᠤ ᠶᠢ ᠴᠡᠭᠡᠷᠯᠡᠵᠦ ᠬᠣᠯᠠᠭᠤᠷ ᠲᠣᠭᠤᠷᠢᠵᠤ ᠶᠠᠪᠤᠳᠠᠭ ᠃
ᠵᠠᠮᠨᠠᠬᠤ ᠵᠠᠭᠤᠷᠠ ᠦᠨᠡᠭᠡ ᠲᠠᠣᠯᠠᠢ ᠵᠡᠷᠭᠡ ᠠᠷᠢᠶᠠᠲᠠᠨ ᠠᠮᠢᠲᠠᠨ ᠡᠩᠭᠡᠷ ᠦᠨ ᠠᠩᠭᠠᠷᠬᠠᠢ ᠪᠠᠷ ᠰᠢᠷᠭᠤᠵᠤ ᠣᠷᠣᠬᠤ ᠪᠠ ᠭᠠᠷᠬᠤ ᠵᠦᠭ ᠢᠶᠡᠷ ᠠᠶᠠᠨ ᠵᠠᠮ ᠤᠨ ᠰᠢᠭᠤᠳ ᠰᠢᠯᠤᠭᠤᠨ ᠂ ᠵᠣᠷᠢᠭᠰᠠᠨ ᠶᠠᠪᠤᠳᠠᠯ ᠤᠨ ᠪᠦᠲᠦᠮᠵᠢᠲᠡᠢ ᠡᠰᠡᠬᠦ ᠶᠢ ᠰᠢᠨᠵᠢᠵᠦ ᠵᠥᠩᠨᠡᠳᠡᠭ ᠃ ᠵᠠᠮ ᠳᠤ ᠤᠰᠤ ᠂ ᠠᠷᠭᠠᠯ ᠲᠦᠯᠡᠭᠡ ᠲᠡᠭᠡᠭᠡᠭᠰᠡᠨ ᠬᠦᠮᠦᠨ ᠳᠣᠬᠢᠶᠠᠯᠳᠤᠬᠤ ᠶᠢ ᠪᠡᠯᠭᠡᠰᠢᠶᠡᠵᠦ ᠂ ᠲᠦᠯᠡᠭᠡᠨ ᠦ ᠮᠦᠴᠢᠷ ᠡᠴᠡ ᠨᠢ ᠬᠤᠭᠤᠴᠢᠵᠤ ᠡᠪᠦᠷᠯᠡᠬᠦ ᠪᠣᠶᠣ ᠤᠰᠤᠨ ᠳ᠋ᠦ᠋ᠨᠢ ᠢᠲᠡᠮ ᠬᠤᠷᠤᠭᠤ ᠪᠠᠨ ᠳᠦᠷᠦᠵᠦ ᠠᠮᠰᠠᠳᠠᠭ ᠶᠣᠰᠣ ᠲᠠᠢ ᠃ ᠵᠠᠮ ᠳᠤ ᠬᠤᠢ ᠰᠠᠯᠬᠢᠨ ᠳᠤ ᠳᠠᠭᠠᠷᠢᠭᠳᠠᠪᠠᠯ 《 ᠵᠠᠮ ᠳᠡᠭᠡᠷᠡ ᠴᠢᠨᠢ ᠡᠷᠢᠶᠠᠨ ᠮᠤᠭᠠᠢ ᠪᠠᠶᠢᠨᠠ ᠂ ᠲᠦᠢ ᠲᠦᠢ 》 ᠭᠡᠵᠦ ᠨᠣᠯᠮᠤᠳᠠᠭ ᠃
ᠠᠶᠤᠩᠭᠠᠲᠤ ᠪᠣᠷᠣᠭᠠᠨ ᠲᠠᠢ ᠦᠶᠡᠰ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠶᠠᠪᠤᠬᠤ ᠂ ᠤᠨᠤᠭᠠ ᠲᠠᠢ ᠶᠠᠪᠤᠬᠤ ᠂ ᠥᠨᠥᠴᠢᠨ ᠮᠣᠳᠣᠨ ᠤ ᠳᠣᠣᠷᠠ ᠪᠣᠷᠣᠭᠠᠨ ᠳᠠᠯᠳᠠᠯᠠᠬᠤ ᠂ ᠲᠡᠮᠦᠷ ᠰᠣᠷᠢᠨᠵᠢᠨ ᠮᠡᠲᠦ ᠶᠢ ᠠᠪᠴᠤ ᠶᠠᠪᠤᠬᠤ ᠂ ᠴᠠᠭᠠᠨ ᠪᠣᠶᠣ ᠡᠷᠢᠶᠡᠨ ᠮᠠᠷᠢᠶᠠᠨ ᠬᠣᠪᠴᠠᠰᠤ ᠲᠠᠢ ᠭᠠᠳᠠᠨᠠ ᠭᠠᠷᠬᠤ ᠂ ᠭᠦᠶᠦᠵᠦ ᠤᠷᠤᠯᠳᠤᠬᠤ ᠂ ᠠᠰᠬᠠ ᠥᠨᠳᠥᠷ ᠭᠠᠵᠠᠷ ᠢᠶᠠᠷ ᠶᠠᠪᠤᠬᠤ ᠵᠡᠷᠭᠡ ᠶᠢ ᠴᠡᠭᠡᠷᠯᠡᠳᠡᠭ ᠃ ᠬᠠᠪᠤᠷ ᠨᠠᠮᠤᠷ ᠤᠨ ᠤᠯᠠᠷᠢᠯ ᠳᠤ ᠬᠡᠭᠡᠷᠡ ᠭᠠᠳᠠᠨᠠ ᠶᠠᠪᠤᠬᠤ ᠳᠠᠭᠠᠨ ᠲᠠᠮᠠᠬᠢ ᠲᠠᠲᠠᠬᠤ ᠶᠢ ᠴᠡᠭᠡᠷᠯᠡᠵᠦ ᠂ ᠲᠣᠭᠤᠭᠠᠯᠠᠬᠤ ᠳᠠᠭᠠᠨ ᠭᠠᠯ ᠠᠯᠳᠠᠬᠤ ᠶᠢ ᠬᠢᠴᠢᠶᠡᠵᠦ ᠂ ᠬᠦᠳᠡᠯᠵᠦ ᠶᠠᠪᠤᠬᠤ ᠳᠠᠭᠠᠨ ᠭᠠᠯ ᠢᠶᠠᠨ ᠰᠠᠶᠢᠨ ᠤᠨᠲᠠᠷᠠᠭᠠᠳᠠᠭ ᠃
ᠰᠦᠨᠢ ᠣᠷᠣᠢ ᠵᠠᠮ ᠶᠠᠪᠤᠬᠤ ᠳᠠᠭᠠᠨ ᠡᠷᠭᠢᠵᠦ ᠬᠠᠷᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠂ ᠤᠴᠢᠷ ᠨᠢ ᠬᠦᠮᠦᠨ ᠤ ᠮᠦᠷᠦᠨ ᠳᠡᠭᠡᠷᠡ ᠰᠦᠷ ᠰᠦᠯᠲᠡ ᠶᠢᠨ ᠵᠤᠯᠠ ᠪᠠᠶᠢᠵᠤ ᠂ ᠡᠷᠭᠢᠵᠦ ᠬᠠᠷᠠᠬᠤ ᠳᠤ ᠡᠨᠡ ᠬᠦ ᠵᠤᠯᠠ ᠨᠢ ᠤᠨᠲᠠᠷᠠᠳᠠᠭ ᠬᠡᠮᠡᠨ ᠲᠣᠯᠣᠭᠠᠢ ᠳᠠᠭᠠᠨ ᠬᠤᠪᠴᠠᠰᠤ ᠨᠦᠮᠦᠷᠦᠨ ᠶᠠᠪᠤᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠂ ᠶᠠᠯᠠᠲᠠᠨ ᠬᠦᠮᠦᠨ ᠢ ᠢᠩᠭᠢᠵᠦ ᠠᠪᠴᠤ ᠶᠠᠪᠤᠳᠠᠭ ᠃ ᠠᠶᠢᠯ ᠡᠷᠦᠬᠡ ᠶᠢᠨ ᠡᠭᠦᠳᠡ ᠴᠣᠩᠬᠣ ᠪᠠᠷ ᠦᠩᠭᠡᠶᠢᠵᠦ ᠥᠩᠭᠡᠷᠡᠬᠦ ᠶᠢ ᠴᠡᠭᠡᠷᠯᠡᠳᠡᠭ ᠃ ᠬᠠᠳᠠᠪᠴᠢᠨ ᠳᠡᠭᠡᠷᠡ ᠦᠰᠦᠭᠡᠶᠢᠯᠳᠡᠨ ᠵᠣᠭᠰᠤᠳᠠᠭ ᠦᠭᠡᠢ ᠂ ᠭᠠᠯ ᠳᠡᠭᠡᠭᠦᠷ ᠠᠯᠬᠤᠳᠠᠭ ᠦᠭᠡᠢ ᠂ ᠳᠡᠭᠡᠰᠦ ᠴᠢᠷᠴᠤ ᠶᠠᠪᠤᠳᠠᠭ ᠦᠭᠡᠢ ᠂ ᠤᠴᠢᠷ ᠶᠠᠪᠤᠳᠠᠯ ᠤᠳᠠᠭᠠᠰᠢᠷᠠᠨᠠ ᠭᠡᠳᠡᠭ ᠃ ᠨᠠᠭᠤᠷ ᠪᠣᠶᠣ ᠭᠣᠣᠯ ᠮᠦᠷᠡᠨ ᠦ ᠤᠰᠤᠨ ᠳᠤ ᠠᠮᠠ ᠠᠯᠳᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠂ ᠤᠰᠤᠴᠢ ᠪᠠᠶᠢᠭᠰᠠᠨ ᠴᠤ ᠪᠡᠯᠭᠡ ᠲᠠᠢ ᠦᠭᠡ ᠬᠡᠯᠡᠵᠦ ᠭᠠᠷᠳᠠᠭ ᠃ ᠰᠢᠪᠠᠷ ᠨᠠᠮᠤᠭ ᠲᠠᠢ ᠭᠠᠵᠠᠷ ᠭᠠᠭᠴᠠᠭᠠᠷ ᠶᠠᠪᠤᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠃
