ᠵᠤᠬᠢᠶᠠᠭᠴᠢ:
ᠴᠠᠭ:2019-07-15
ᠥᠵᠡᠭᠰᠡᠨ : ℃
ᠢᠷᠡᠯᠲᠡ:
ᠭᠣᠯᠣᠩᠬᠢᠷ ᠠᠪᠤᠭᠤᠯᠬᠤ ᠤᠯᠠᠮᠵᠢᠯᠠᠯᠲᠤ ᠵᠠᠩ ᠦᠢᠯᠡ
ᠲᠥᠯ ᠲᠤᠰᠴᠤ ᠪᠣᠢᠵᠢᠭᠤᠯᠬᠤ ᠶᠠᠪᠤᠴᠠ ᠳᠤ ᠣᠯᠠᠨ ᠵᠦᠢᠯ ᠦᠨ ᠰᠢᠯᠲᠠᠭᠠᠨ ᠠᠴᠠ ᠪᠣᠯᠵᠤ ᠡᠬᠡ ᠮᠠᠯ ᠨᠢ ᠦᠷᠡ ᠲᠥᠯ ᠢᠶᠡᠨ ᠭᠣᠯᠣᠬᠤ ᠶᠠᠪᠤᠳᠠᠯ ᠦᠷᠬᠦᠯᠵᠢ ᠳᠣᠬᠢᠶᠠᠯᠳᠤᠳᠠᠭ᠃ ᠪᠠᠷᠭᠤ ᠪᠦᠰᠡᠭᠦᠢᠴᠦᠳ ᠢᠷᠠᠭᠤ ᠡᠭᠡᠰᠢᠭᠲᠦ ᠤᠶᠠᠬᠠᠨ ᠴᠡᠭᠡᠯ ᠬᠣᠭᠤᠯᠠᠢ ᠪᠠᠷ ᠢᠶᠠᠨ ᠤᠳᠠᠭᠠᠨ ᠵᠢᠯ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠭᠰᠡᠨ 《ᠭᠣᠯᠣᠩᠬᠢᠷ ᠠᠪᠤᠭᠤᠯᠬᠤ ᠳᠠᠭᠤᠤ》 ᠶᠢ ᠠᠶᠠᠯᠠᠭᠤᠯᠤᠨ ᠳᠠᠭᠤᠯᠠᠬᠤ ᠠᠷᠭᠠ ᠪᠠᠷ ᠭᠣᠯᠣᠩᠬᠢᠷ ᠲᠥᠯ ᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠳᠠᠭ᠃ ᠡᠭᠦᠨ ᠳᠦ ᠠᠳᠠᠯᠢ ᠪᠣᠰᠤ ᠲᠦᠷᠦᠯ ᠦᠨ ᠮᠠᠯ ᠤᠨ ᠭᠣᠯᠤᠭᠳᠠᠭᠰᠠᠨ ᠲᠥᠯ ᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ ᠳᠠᠭᠤᠤ᠂ ᠦᠭᠡ ᠠᠶᠠᠯᠭᠤ᠂ ᠠᠷᠭᠠ ᠳᠠᠮ ᠨᠢ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠮᠠᠰᠢ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ᠃
ᠨᠢᠭᠡ᠂ ᠭᠣᠯᠤᠭᠳᠠᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠶᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ᠄ ᠲᠥᠯ ᠢᠶᠡᠨ ᠭᠣᠯᠤᠭᠰᠠᠨ ᠡᠬᠡ ᠶᠢ ᠨᠢ ᠤᠶᠠᠵᠤ ᠲᠣᠱᠠᠬᠤ᠂ ᠡᠬᠡ ᠶᠢᠨ ᠰᠦ ᠶᠢ ᠲᠥᠯ ᠦᠨ ᠬᠢᠨᠢ ᠪᠡᠶᠡ ᠳᠡᠭᠡᠷᠡ ᠲᠦᠷᠬᠢᠵᠦ ᠦᠨᠦᠷᠲᠦᠭᠦᠯᠬᠦ᠂ ᠲᠥᠯ ᠢ ᠨᠢ ᠪᠠᠷᠢᠵᠤ ᠠᠮᠠᠯᠠᠭᠤᠯᠵᠤ ᠬᠦᠬᠦᠭᠦᠯᠬᠦ ᠶᠢᠨ ᠳᠠᠭᠠᠣ ᠳᠠᠭᠤᠤ ᠳᠠᠭᠤᠯᠠᠵᠤ ( ᠲᠣᠢᠭᠯᠠᠵᠤ) ᠤᠶᠠᠷᠠᠭᠤᠯᠬᠤ ᠠᠷᠭᠠ ᠠᠪᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠄
《 ᠬᠦᠢᠲᠡᠨ ᠡᠪᠦᠯ ᠥᠩᠭᠡᠷᠡᠵᠦ᠂ ᠬᠥᠭ ᠦᠨ ᠡᠷᠡᠨ ᠴᠢᠨᠢ ᠬᠦᠷᠦᠯᠡ᠂ ᠲᠣᠢᠭ᠂ ᠲᠣᠢᠭ᠂ ᠲᠣᠢᠭ᠂ ᠴᠠᠭᠠᠨ ᠴᠠᠰᠤ ᠬᠠᠢᠯᠵᠤ᠂ ᠴᠠᠭ ᠡᠷᠡᠨ ᠴᠢᠨᠢ ᠪᠣᠯᠤᠯᠠ᠂ ᠲᠣᠢᠭ᠂ ᠲᠣᠢᠭ᠂ ᠲᠣᠢᠭ᠂ ᠬᠥᠬᠡ ᠨᠣᠭᠤᠭᠠ ᠰᠣᠶᠣᠭᠠᠯᠠᠵᠤ᠂ ᠬᠥᠬᠦᠭᠡ ᠰᠢᠪᠠᠭᠤ ᠳᠣᠩᠭᠤᠳᠤᠯᠠ᠂ ᠲᠣᠢᠭ᠂ ᠲᠣᠢᠭ᠂ ᠲᠣᠢᠭ᠂ ᠬᠥᠬᠥ ᠳᠡᠯᠡᠩ ᠴᠢᠨᠢ ᠴᠢᠨᠤᠨᠠ ᠰᠢᠤ᠂ ᠬᠥᠭᠡᠷᠦᠬᠦᠢ ᠬᠤᠷᠠᠭᠠ ᠪᠠᠨ ᠠᠪᠤᠭᠠᠷᠠᠢ᠂ ᠲᠣᠢᠭ᠂ ᠲᠣᠢᠭ ᠲᠣᠢᠭ︕》 ᠭᠡᠵᠦ ᠤᠷᠲᠤᠯᠠᠭᠤᠯᠤᠨ ᠤᠶᠠᠩᠭᠠᠲᠠᠢ ᠠᠶᠠᠯᠠᠭᠤᠯᠳᠠᠭ᠃ ᠡᠨᠡ ᠲᠣᠢᠭ ᠤᠨ ᠳᠠᠭᠤᠤ ᠶᠢ ᠰᠣᠨᠣᠰᠣᠭᠰᠠᠨ ᠬᠦᠮᠦᠨ ᠦ ᠰᠡᠳᠬᠢᠯ ᠤᠶᠠᠷᠠᠬᠤ ᠶᠢᠨ ᠪᠦᠦ ᠬᠡᠯᠡ᠂ ᠠᠳᠤᠭᠤᠰᠤ ᠮᠠᠯ ᠴᠤ ᠭᠡᠰᠡᠨ ᠵᠢᠷᠦᠬᠡ ᠭᠣᠣᠯ ᠨᠢ ᠡᠮᠲᠡᠷᠡᠵᠦ᠂ ᠭᠣᠯᠤᠵᠤ ᠬᠠᠶᠠᠭᠰᠠᠨ ᠬᠤᠷᠠᠭᠠ ᠪᠠᠨ ᠬᠥᠬᠦᠬᠥᠯᠴᠢᠬᠡᠳᠡᠭ᠃ ᠭᠣᠯᠣᠩᠬᠠᠢ ᠢᠰᠢᠭᠡ ᠶᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ ᠠᠷᠭᠠ ᠨᠢ ᠳᠡᠭᠡᠷᠡᠬᠢ ᠲᠠᠢ ᠠᠳᠠᠯᠢᠪᠲᠤᠷ ᠪᠠᠢᠳᠠᠭ᠃ ᠢᠮᠠᠭᠠ ᠶᠢ ᠲᠣᠢᠭᠯᠠᠬᠤ ᠪᠢᠰᠢ ᠴᠠᠢᠭᠯᠠᠨᠠ᠄
《 ᠥᠨᠳᠥᠷ ᠡᠪᠡᠷ ᠲᠠᠢ ᠴᠠᠭᠠᠨ ᠢᠮᠠᠭᠠ ᠮᠢᠨᠢ᠂ ᠥᠪᠡᠷ ᠦᠨ ᠢᠰᠢᠭᠡ ᠴᠢᠨᠢ ᠮᠦᠨ ᠰᠢᠤ ᠳ᠋ᠠ᠂ ᠴᠠᠢᠭ᠂ ᠴᠠᠢᠭ ᠴᠠᠢᠭ︕ ᠬᠠᠷᠠ ᠠᠯᠠᠭ ᠢᠮᠠᠭᠠ ᠮᠢᠨᠢ᠂ ᠬᠠᠢᠷᠠᠲᠠᠢ ᠢᠰᠢᠭᠡ ᠪᠡᠨ ᠠᠪᠤᠭᠠᠷᠠᠢ᠂ ᠴᠠᠢᠭ᠂ ᠴᠠᠢᠭ᠂ ᠴᠠᠢᠭ︕》 ᠭᠡᠵᠦ ᠠᠶᠠᠯᠭᠤ ᠳᠠᠭᠤᠤ ᠬᠣᠣᠰᠯᠠᠭᠤᠯᠤᠨ ᠢᠰᠢᠭᠡ ᠶᠢ ᠨᠢ ᠬᠥᠬᠥᠭᠦᠯᠵᠦ ᠠᠪᠤᠭᠤᠯᠳᠠᠭ᠂ ᠡᠨᠡ ᠨᠢ ᠦᠨᠡᠬᠡᠷ ᠪᠠᠷᠭᠤᠴᠤᠳ ᠤᠨ ᠭᠣᠯᠣᠭᠳᠠᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠶᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ ᠴᠢᠬᠤᠯᠠ ᠨᠢᠭᠡᠨ ᠤᠯᠠᠮᠵᠢᠯᠠᠯᠲᠤ ᠠᠷᠭᠠ ᠪᠣᠯᠬᠤ ᠶᠤᠮ᠃ ᠭᠣᠯᠣᠩᠬᠢᠷ ᠭᠠᠷᠬᠤ ᠨᠢ ᠭᠣᠣᠯᠳᠠᠭᠤ ᠬᠣᠨᠢ ᠢᠮᠠᠭᠠᠨ ᠳᠤ ᠣᠯᠠᠨ ᠭᠠᠷᠳᠠᠭ ᠃ ᠢᠯᠠᠩᠭᠤᠶᠠ ᠴᠠᠰᠤ ᠪᠣᠷᠣᠭᠠᠨ ᠲᠠᠢ ᠡᠷᠡᠨ ᠳᠦ ᠣᠯᠠᠨ ᠭᠠᠷᠳᠠᠭ ᠃ ᠡᠭᠦᠨ ᠰᠢᠯᠲᠠᠭᠠᠨ ᠨᠢ ᠡᠬᠡ ᠶᠢᠨ ᠬᠢᠨᠢ ᠲᠠᠷᠭᠤ ᠬᠦᠴᠦ ᠮᠠᠭᠤᠲᠠᠭᠰᠠᠨ ᠂ ᠲᠥᠯ ᠢ ᠡᠬᠡ ᠳ᠋ᠦ᠋ᠨᠢ ᠡᠰᠡ ᠳᠣᠯᠢᠶᠠᠯᠭᠠᠭᠰᠠᠨ ᠪᠠ ᠬᠤᠷᠠᠭᠠ ᠢᠰᠢᠭᠡᠨ ᠦ ᠪᠡᠶᠡ ᠳᠦ ᠥᠭᠡᠷᠡ ᠦᠨᠦᠷ ᠬᠠᠯᠳᠠᠭᠰᠠᠨ ᠠᠴᠠ ᠪᠣᠯᠳᠠᠭ ᠃ ᠡᠶᠢᠮᠦᠷᠬᠦᠦ ᠦᠵᠡᠭᠳᠡᠯ ᠵᠤᠰᠠᠭ ᠬᠣᠨᠢᠨ ᠳᠤ ᠣᠯᠠᠨ ᠳᠣᠬᠢᠶᠠᠯᠳᠤᠳᠠᠭ ᠃ ᠭᠣᠯᠣᠩᠬᠢᠷ ᠠᠪᠤᠭᠤᠯᠬᠤ ᠳᠤ ᠲᠣᠶᠢᠭᠯᠠᠵᠤ ᠲᠠᠶᠢᠳᠬᠤᠷᠠᠭᠤᠯᠬᠤ ᠂ ᠳᠠᠭᠤᠯᠠᠵᠤ ᠤᠶᠠᠷᠠᠭᠤᠯᠬᠤ ᠂ ᠬᠤᠷᠠᠭᠠ ᠢᠰᠢᠭᠡ ᠨᠢ ᠡᠬᠡ ᠲᠠᠢ ᠨᠢ ᠲᠤᠰᠬᠠᠢ ᠬᠠᠰᠢᠶᠠᠨ ᠳᠤ ᠬᠣᠷᠢᠬᠤ ( ᠬᠠᠷᠠᠩᠭᠤᠢ ᠭᠡᠷ ᠪᠣᠶᠤ ᠨᠦᠬᠡᠨ ᠳᠦ ᠬᠣᠷᠢᠬᠤ )᠂ ᠨᠣᠬᠠᠢ ᠪᠠᠷ ᠠᠶᠤᠯᠭᠠᠬᠤ ᠂ ᠬᠤᠷᠠᠭᠠ ᠢᠰᠢᠭᠡᠨ ᠦ ᠰᠡᠭᠦᠯ ᠪᠤᠶᠤ ᠪᠡᠶᠡ ᠳᠡᠭᠡᠷᠡ ᠨᠢ ᠬᠤᠵᠢᠷ ᠱᠤ᠋ ᠲᠦᠷᠬᠢᠪᠡᠯ ᠡᠬᠡ ᠨᠢ ᠲᠡᠭᠦᠨ ᠢ ᠲᠣᠯᠢᠶᠠᠬᠤ ᠶᠢᠨ ᠳᠠᠭᠤ ᠲᠥᠯ ᠢᠶᠡᠨ ᠲᠠᠨᠢᠵᠤ ᠠᠪᠳᠠᠭ ᠃ ᠡᠭᠦᠨ ᠳᠦ ᠨᠣᠬᠠᠢ ᠪᠠᠷ ᠠᠶᠤᠯᠭᠠᠬᠤ ᠠᠷᠭᠠ ᠶᠢ ᠬᠡᠷᠡᠭᠯᠡᠬᠦ ᠳ᠋ᠡᠭᠡᠨ ᠭᠣᠯᠣᠭᠳᠠᠭᠰᠠᠨ ᠬᠤᠷᠠᠭᠠ ᠢᠰᠢᠭᠡᠨ ᠦ ᠬᠢᠨᠢ ᠨᠢᠷᠤᠭᠤᠨ ᠳᠡᠭᠡᠷᠡ ᠴᠢᠰᠤ ᠪᠤᠶᠤ ᠮᠢᠬᠠ ᠨᠠᠭᠠᠯᠳᠤᠭᠤᠯᠵᠤ ᠨᠣᠬᠠᠢ ᠪᠠᠷ ᠳᠣᠯᠢᠶᠠᠯᠭᠠᠨᠠ ᠃ ᠡᠭᠦᠨ ᠢ ᠦᠵᠡᠭᠰᠡᠨ ᠡᠬᠡ ᠨᠢ ᠨᠣᠬᠠᠢ ᠠᠴᠠ ᠲᠥᠯ ᠢᠶᠡᠨ ᠬᠠᠷᠠᠮᠨᠠᠨ ᠨᠣᠬᠠᠢ ᠶᠢ ᠮᠦᠷᠭᠦᠨ ᠵᠠᠶᠢᠯᠠᠭᠤᠯᠵᠤ ᠦᠷᠡ ᠲᠥᠯ ᠢᠶᠡᠨ ᠥᠮᠥᠭᠯᠡᠨ ᠴᠡᠭᠡᠵᠢᠨ ᠳᠣᠣᠷᠠ ᠪᠠᠨ ᠬᠠᠰᠢᠭᠠᠳ ᠮᠠᠰᠢ ᠬᠢᠯᠪᠠᠷᠬᠠᠨ ᠬᠥᠬᠦᠭᠦᠯᠴᠢᠳᠡᠭ ᠃
ᠬᠣᠶᠠᠷ ᠂ ᠭᠣᠯᠣᠭᠳᠠᠭᠰᠠᠨ ᠲᠤᠭᠤᠯ ᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ᠄ ᠲᠥᠯᠯᠡᠭᠰᠡᠨ ᠡᠬᠡ ᠶᠢᠨ ᠬᠠᠶᠢᠷᠠ ᠶᠢ ᠨᠡᠮᠡᠭᠳᠡᠭᠦᠯᠬᠦ ᠶᠢᠨ ᠲᠤᠰᠠᠳᠠ ᠲᠤᠭᠤᠯ ᠢ ᠨᠢ ᠭᠠᠷᠤᠭᠰᠠᠨ ᠳᠠᠷᠤᠢ ᠳ᠋ᠦ᠋ᠨᠢ ᠡᠷᠬᠡᠪᠰᠢ ᠡᠬᠡ ᠳ᠋ᠦ᠋ᠨᠢ ᠳᠣᠯᠢᠶᠠᠯᠭᠠᠬᠤ ᠠᠷᠭᠠ ᠶᠢ ᠠᠪᠬᠤ ᠠᠴᠠ ᠭᠠᠳᠠᠨᠠ ᠡᠬᠡ ᠶᠢᠨ ᠬᠢᠨᠢ ᠰᠠᠯᠢᠰᠤ ᠶᠢ ᠲᠦᠷᠬᠢᠨ ᠦᠨᠦᠷᠲᠦᠭᠦᠯᠵᠦ ᠂ ᠡᠬᠡ ᠪᠠ ᠲᠥᠯ ᠦᠨ ᠬᠠᠷᠢᠴᠠᠭᠠ ᠶᠢ ᠨᠢᠭᠲᠠᠷᠠᠭᠤᠯᠵᠤ ᠂ ᠲᠤᠭᠤᠯ ᠢ ᠨᠢ ᠲᠠᠨᠢᠭᠤᠯᠤᠨᠠ ᠃ ᠭᠣᠯᠣᠭᠳᠠᠭᠰᠠᠨ ᠲᠤᠭᠤᠯ ᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ ᠳᠠᠭᠠᠨ᠄
《 ᠨᠠᠷᠢᠨ ᠬᠦᠷᠡᠭᠴᠢ ᠦᠨᠢᠶᠡ ᠮᠢᠨᠢ ᠂ ᠨᠢᠯᠬᠠ ᠲᠤᠭᠤᠯ ᠢᠶᠠᠨ ᠪᠦᠦ ᠭᠣᠯᠣ ᠳ᠋ᠠ ᠃ ᠦᠣᠪ ᠂ ᠦᠣᠪ ᠂ ᠦᠣᠪ ︕ ᠬᠦᠷᠡᠩ ᠠᠯᠠᠭᠴᠢ ᠭᠤᠨᠵᠢ ᠮᠢᠨᠢ ᠂ ᠬᠥᠭᠡᠷᠦᠬᠦᠢ ᠲᠤᠭᠤᠯ ᠢᠶᠠᠨ ᠠᠪᠤᠭᠠᠷᠠᠢ ᠰᠠ ᠂ ᠦᠣᠪ ᠂ ᠦᠣᠪ ᠂ ᠦᠣᠪ ︕ ᠭᠡᠵᠦ ᠦᠨᠢᠶᠡᠨ ᠦ ᠪᠡᠨ ᠥᠩᠭᠡ ᠵᠢᠰᠤᠮ ᠳᠦ ᠨᠡᠶᠢᠴᠡᠭᠦᠯᠦᠨ ᠠᠶᠠᠯᠠᠭᠤᠯᠬᠤ ᠪᠠ ᠰᠦ ᠶᠢ ᠨᠢ ᠰᠠᠭᠠᠵᠤ ᠂ ᠲᠤᠭᠤᠯ ᠤᠨ ᠰᠡᠭᠦᠯ ᠂ ᠵᠣ ᠳᠡᠭᠡᠭᠦᠷ ᠨᠢ ᠲᠦᠷᠬᠢᠬᠦ ᠪᠥᠭᠡᠳ ᠲᠤᠭᠤᠯ ᠢ ᠨᠢ ᠡᠬᠡ ᠳ᠋ᠦ᠋ᠨᠢ ᠠᠮᠠᠯᠠᠭᠤᠯᠵᠤ ᠬᠥᠬᠦᠭᠦᠯᠳᠡᠭ ᠃ ᠬᠠᠷᠢᠨ ᠬᠣᠨᠢ ᠪᠤᠶᠤ ᠦᠨᠢᠶᠡ ᠶᠢᠨ ᠦᠨ ᠲᠥᠯ ᠨᠢ ᠦᠬᠦᠭᠡᠳ ᠥᠭᠡᠷᠡ ᠲᠥᠯ ᠢ ᠠᠪᠤᠭᠤᠯᠤᠶᠠ ᠭᠡᠪᠡᠯ ᠲᠤᠰ ᠲᠥᠯ ᠳ᠋ᠦ᠋ᠨᠢ ᠦᠬᠦᠭᠰᠡᠨ ᠲᠥᠯ ᠦᠨ ᠬᠢᠨᠢ ᠠᠷᠠᠰᠤ ᠶᠢ ᠨᠦᠮᠦᠷᠦᠭᠦᠯᠵᠦ ᠠᠪᠤᠭᠤᠯᠬᠤ ᠠᠷᠭᠠ ᠪᠠᠶᠢᠳᠠᠭ ᠃ ᠡᠨᠡ ᠨᠢ ᠲᠥᠯ ᠢᠶᠡᠨ ᠦᠬᠦᠭᠦᠯᠦᠭᠰᠡᠨ ᠡᠬᠡ ᠮᠠᠯ ᠤᠨ ᠬᠥᠬᠥ ᠲᠡᠯᠡᠩ ᠬᠠᠪᠤᠳᠬᠤ ᠶᠢ ᠬᠣᠷᠢᠭᠯᠠᠨ ᠰᠡᠷᠭᠡᠶᠢᠯᠡᠵᠦ ᠂ ᠥᠭᠡᠷᠡ ᠡᠬᠡ ᠶᠢᠨ ᠲᠥᠯ ᠢ ᠠᠪᠤᠭᠤᠯᠬᠤ ᠶᠢ ᠬᠡᠯᠡᠨᠡ ᠃ ᠡᠭᠦᠨ ᠢ ᠪᠠᠷᠭᠤᠴᠤᠳ ᠳᠡᠯᠡᠭᠡᠯᠡᠬᠦ ( ᠬᠣᠶᠠᠷ ᠡᠬᠡ ᠬᠥᠬᠥᠳᠡᠭ ᠲᠥᠯ ) ᠭᠡᠳᠡᠭ ᠃ ᠳᠡᠯᠡᠭᠡ ᠡᠬᠡ ᠲᠠᠢ ᠲᠥᠯ ᠪᠣᠯ ᠪᠣᠰᠤᠳ ᠲᠥᠯ ᠡᠴᠡ ᠪᠡᠨ ᠨᠡᠩ ᠣᠨᠴᠠᠭᠠᠢ ᠦᠰᠴᠦ ᠪᠣᠶᠢᠵᠢᠳᠠᠭ ᠃
ᠭᠤᠷᠪᠠ ᠂ ᠭᠣᠯᠤᠭᠳᠠᠭᠰᠠᠨ ᠪᠣᠲᠣᠭᠣ ᠶᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ᠄ ᠪᠠᠷᠭᠤ ᠶᠢᠨ ᠨᠠᠰᠤᠲᠠᠳ ᠲᠡᠮᠡᠭᠡ ᠪᠣᠯ ᠬᠦᠮᠦᠨ ᠡᠯᠢᠭᠡ ᠲᠠᠢ ᠂ ᠤᠶᠠᠷᠠᠮᠠᠲᠠᠭᠠᠢ ᠠᠮᠢᠲᠠᠨ ᠭᠡᠳᠡᠭ ᠃ ᠲᠡᠮᠡᠭᠡᠨ ᠦ ᠨᠣᠮᠣᠬᠠᠨ ᠵᠥᠭᠡᠯᠡᠨ ᠵᠠᠩ ᠂ ᠤᠶᠠᠷᠠᠭᠤᠨ ᠰᠡᠳᠬᠢᠯ ᠲᠠᠢ ᠣᠨᠴᠠᠯᠢᠭ ᠢ ᠠᠰᠢᠭᠯᠠᠨ ᠪᠣᠲᠣᠭᠣ ᠪᠠᠨ ᠭᠣᠯᠣᠭᠰᠠᠨ ᠢᠩᠭᠡᠨ ᠦ ᠳᠡᠷᠭᠡᠲᠡ ᠤᠶᠠᠬᠠᠨ ᠢᠷᠠᠭᠤ ᠠᠶᠠᠯᠭᠤ ᠪᠠᠷ ᠤᠷᠲᠤ ᠶᠢᠨ ᠳᠠᠭᠤᠤ ᠳᠠᠭᠤᠯᠠᠬᠤ ᠶᠢᠨ ᠳᠠᠭᠠᠣ ᠬᠤᠭᠤᠷ ᠬᠦᠭᠵᠢᠮ ᠲᠠᠲᠠᠬᠤ ᠯᠢᠩᠪᠤ ᠦᠯᠢᠶᠡᠬᠦ ᠵᠡᠷᠭᠡ ᠪᠡᠷ ᠰᠡᠳᠬᠢᠯ ᠢ ᠨᠢ ᠤᠶᠠᠷᠠᠭᠤᠯᠪᠠᠯ ᠢᠩᠭᠡᠨ ᠦ ᠨᠢᠳᠦᠨ ᠦ ᠬᠢᠨᠢ ᠨᠢᠯᠪᠤᠰᠤ ᠪᠦᠮᠪᠦᠷᠢᠵᠦ ᠂ ᠠᠶᠠᠨᠳᠠᠭᠠᠨ ᠪᠣᠲᠣᠭᠣ ᠪᠠᠨ ᠬᠥᠬᠥᠭᠦᠯᠴᠢᠳᠡᠭ ᠃ ᠪᠠᠰᠠ ᠪᠣᠲᠣᠭᠣ ᠪᠠᠨ ᠭᠣᠯᠣᠭᠰᠠᠨ ᠢᠩᠭᠡ ᠶᠢ ᠪᠣᠲᠣᠭᠣ ᠲᠠᠢ ᠨᠢ ᠬᠠᠮᠲᠤ ᠬᠠᠰᠢᠶᠠᠨ ᠳᠤ ᠬᠣᠷᠢᠵᠤ ᠂ ᠡᠬᠡ ᠶᠢᠨ ᠬᠢᠨᠢ ᠰᠦ ᠶᠢ ᠪᠣᠲᠣᠭᠣ ᠶᠢᠨ ᠬᠢᠨᠢ ᠪᠡᠶᠡ ᠳᠡᠭᠡᠷᠡ ᠲᠦᠷᠬᠢᠬᠦ ᠪᠠ ᠳᠠᠪᠤᠰᠤ ᠲᠠᠢ ᠴᠠᠢ ᠶᠢ ᠪᠡᠶᠡ ᠳᠡᠭᠡᠷᠡ ᠨᠢ ᠰᠠᠴᠤᠬᠤ ᠵᠡᠷᠭᠡ ᠠᠷᠭᠠ ᠶᠢ ᠠᠪᠳᠠᠭ ᠃ ᠬᠡᠷᠪᠡ ᠡᠬᠡ ᠨᠢ ᠭᠣᠯᠣᠭᠠᠳ ᠶᠠᠭ ᠠᠪᠬᠤ ᠦᠭᠡᠢ ᠪᠣᠯ ᠪᠣᠲᠣᠭᠣ ᠶᠢ ᠭᠠᠷ ᠢᠶᠠᠷ ᠲᠡᠵᠢᠭᠡᠵᠦ ᠥᠰᠬᠡᠨᠡ ᠃
ᠳᠥᠷᠪᠡ ᠂ ᠭᠣᠯᠣᠭᠳᠠᠭᠰᠠᠨ ᠤᠨᠠᠭᠠ ᠶᠢ ᠡᠬᠡ ᠳ᠋ᠦ᠋ᠨᠢ ᠠᠪᠤᠭᠤᠯᠬᠤ ᠨᠢ ᠪᠣᠰᠣᠳ ᠮᠠᠯ ᠠᠴᠠ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠪᠠᠶᠢᠳᠠᠭ ᠃ ᠳᠠᠭᠤᠤ ᠳᠠᠭᠤᠯᠠᠵᠤ ᠬᠦᠭᠵᠢᠮ ᠬᠦᠭᠵᠢᠮᠳᠡᠳᠡᠭ ᠦᠭᠡᠢ ᠂ ᠬᠠᠷᠢᠨ ᠤᠨᠠᠭᠠ ᠪᠠᠨ ᠭᠣᠯᠣᠭᠰᠠᠨ ᠭᠡᠭᠦᠦ ᠶᠢ ᠬᠦᠮᠦᠨ ᠠᠮᠢᠲᠠᠨ ᠦᠭᠡᠢ ᠨᠠᠮ ᠰᠡᠯᠡᠭᠦᠦ ᠭᠠᠵᠠᠷ ᠲᠤ ᠠᠪᠠᠴᠢᠵᠤ ᠂ ᠲᠣᠱᠠᠬᠤ ᠪᠤᠶᠤ ᠦᠷᠦᠭᠡᠯᠳᠦᠵᠦ ᠂ ᠨᠢᠳᠦ ᠶᠢ ᠨᠢ ᠪᠦᠲᠡᠭᠡᠭᠡᠳ ᠤᠨᠠᠭᠠ ᠲᠠᠢ ᠨᠢ ᠬᠠᠮᠲᠤ ᠣᠷᠬᠢᠪᠠᠯ ᠤᠨᠠᠭᠠ ᠪᠠᠨ ᠠᠪᠳᠠᠭ ᠃
