ᠵᠤᠬᠢᠶᠠᠭᠴᠢ:
ᠴᠠᠭ:2019-06-19
ᠥᠵᠡᠭᠰᠡᠨ : ℃
ᠢᠷᠡᠯᠲᠡ:
ᠮᠣᠩᠭᠣᠯ ( ᠨᠢᠭᠡ )
ᠦᠨᠳᠦᠰᠦᠨ ᠳᠤ ᠂ ᠤᠮᠠᠷᠠᠲᠤ ᠦᠨᠳᠦᠰᠦᠲᠡᠨ ᠦ ᠲᠥᠷᠥᠯ ᠤᠭᠰᠠᠭᠠ ᠨᠢ ᠨᠢᠭᠡ ᠡᠷᠡ ᠨᠢᠭᠡ ᠡᠮᠡ ᠶᠢᠨ ᠳᠦᠷᠢᠮᠲᠦ ᠡᠴᠢᠭᠡᠴᠢᠯᠡᠯ ᠦᠨ ᠭᠡᠷ ᠪᠦᠯᠢ ᠪᠡᠷ ᠭᠣᠣᠯ ᠪᠦᠷᠢᠯᠳᠦᠬᠦᠨ ᠨᠢᠭᠡᠴᠢ ᠪᠣᠯᠭᠠᠵᠤ ᠪᠠᠶᠢᠪᠠ ᠃ ᠴᠢᠰᠤᠨ ᠤᠳᠤᠮ ᠤᠨ ᠬᠣᠯᠪᠣᠭᠠᠰᠤ ᠪᠠᠷ ᠬᠣᠯᠪᠣᠭᠰᠠᠨ ᠭᠡᠷ ᠪᠦᠯᠢ ᠨᠤᠭᠦᠳ ᠨᠢ ᠨᠢᠭᠡᠨ ᠲᠦᠷᠦᠯ ᠤᠭᠰᠠᠭᠠ ᠪᠣᠯᠵᠤ ᠪᠦᠷᠢᠯᠳᠦᠳᠡᠭ ᠃ ᠲᠦᠷᠦᠯ ᠤᠭᠰᠠᠭᠠ ᠨᠢ ᠡᠷᠡᠭᠲᠡᠢᠴᠦᠳ ᠦᠨ ᠴᠢᠰᠤᠨ ᠤᠳᠤᠮ ᠤᠨ ᠬᠣᠯᠪᠣᠭᠠ ᠪᠠᠷ ᠬᠣᠯᠪᠣᠭᠠᠰᠤ ᠪᠣᠯᠭᠠᠨ ᠂ ᠴᠢᠰᠤᠨ ᠲᠥᠷᠥᠯ ᠦᠨ ᠬᠠᠷᠢᠴᠠᠭᠠ ᠪᠠᠷ ᠭᠣᠣᠯᠳᠠᠯᠭᠠ ᠪᠣᠯᠭᠠᠨ ᠣᠷᠣᠭ ᠲᠥᠷᠥᠯ ᠦᠨ ᠬᠠᠷᠢᠴᠠᠭᠠ ᠶᠢ ᠳᠠᠭᠠᠯᠲᠠ ᠪᠠᠢᠷᠢᠨ ᠳᠤ ᠲᠠᠯᠪᠢᠳᠠᠭ ᠃ ᠲᠦᠷᠦᠯ ᠤᠭᠰᠠᠭᠠ ᠨᠢ ᠬᠠᠮᠲᠤ ᠶᠢᠨ ᠠᠮᠢᠳᠤᠷᠠᠯ ᠢᠶᠠᠨ ᠪᠠᠲᠤᠯᠠᠬᠤ ᠡᠭᠦᠷᠭᠡ ᠲᠡᠶ ᠂ ᠨᠠᠰᠤᠲᠠᠨ ᠢᠶᠠᠨ ᠠᠰᠠᠷᠠᠨ ᠲᠡᠵᠢᠭᠡᠬᠦ ᠂ ᠦᠷᠡ ᠬᠡᠦᠬᠡᠳ ᠲᠦᠷᠦᠵᠦ ᠪᠣᠶᠢᠵᠢᠭᠤᠯᠬᠤ ᠂ ᠦᠶᠡ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠶᠢ ᠪᠠᠲᠤᠯᠠᠬᠤ ᠪᠣᠯ ᠲᠡᠭᠦᠨ ᠦ ᠦᠨᠳᠦᠰᠦᠨ ᠴᠢᠳᠠᠪᠤᠷᠢ ᠪᠣᠯᠤᠨᠠ ᠃ ᠦᠷᠡ ᠬᠡᠦᠬᠡᠳ ᠪᠠᠶᠢᠳᠠᠯ ᠤᠨ ᠳᠣᠣᠷᠠ ᠂ ᠬᠦᠷᠭᠡᠨ ᠣᠷᠣᠬᠤ᠂ ᠬᠡᠦᠬᠡᠳ ᠡᠷᠭᠦᠨ ᠲᠡᠵᠢᠭᠡᠬᠦ ᠂ ᠬᠦᠦ ᠲᠠᠨᠢᠵᠤ ᠪᠡᠯᠭᠡᠳᠡᠯ ᠦᠨ ᠴᠢᠨᠠᠷᠲᠠᠶ ᠲᠥᠷᠥᠯ ᠤᠭᠰᠠᠭᠠ ᠶᠢᠨ ᠬᠣᠯᠪᠣᠭᠠᠰᠤ ᠪᠣᠯᠬᠤ ᠵᠡᠷᠭᠡ ᠠᠷᠭᠠ ᠵᠠᠮ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠲᠥᠷᠥᠯ ᠤᠭᠰᠠᠭᠠ ᠪᠠᠨ ᠳᠣᠷᠣᠶᠢᠲᠠᠭᠤᠯᠬᠤ ᠦᠭᠡᠢ ᠪᠠᠶᠢᠵᠤ ᠪᠣᠯᠤᠨᠠ ᠃ ᠭᠡᠷ ᠪᠦᠯᠢ ᠶᠢᠨ ᠬᠥᠷᠥᠩᠭᠡ ᠶᠢ ᠵᠠᠯᠭᠠᠮᠵᠢᠯᠠᠬᠤ ᠳᠦᠷᠢᠮ ᠨᠢ ᠡᠴᠢᠭᠡᠴᠢᠯᠡᠯ ᠦᠨ ᠶᠣᠰᠣ ᠶᠢ ᠵᠢᠷᠤᠮᠯᠠᠨ ᠂ ᠬᠦᠦ ᠨᠢ ᠵᠦᠢ ᠶᠣᠰᠣᠨ ᠤ ᠥᠮᠴᠢ ᠵᠠᠯᠭᠠᠮᠵᠢᠯᠠᠭᠴᠢ ᠪᠣᠯᠳᠠᠭ ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠲᠥᠷᠥᠯ ᠤᠭᠰᠠᠭᠠ ᠶᠢᠨ ᠪᠦᠲᠦᠴᠡ ᠶᠢᠨ ᠣᠨᠴᠠᠯᠢᠭ ᠢ ᠳᠣᠣᠷᠠᠬᠢ ᠮᠡᠲᠦ ᠬᠡᠳᠦᠨ ᠲᠠᠯᠠ ᠪᠠᠷ ᠪᠣᠯᠤᠨᠠ᠃
ᠨᠢᠭᠡ᠂ ᠭᠠᠵᠠᠷ ᠣᠷᠣᠨ ᠬᠠᠷᠢᠴᠠᠭᠠ ᠳᠡᠭᠡᠷᠡ ᠰᠠᠭᠤᠷᠢᠯᠠᠭᠰᠠᠨ ᠴᠢᠰᠤᠨ ᠲᠥᠷᠥᠯ ᠬᠠᠷᠢᠴᠠᠭᠠ ᠨᠢ ᠣᠷᠣᠭ ᠲᠥᠷᠥᠯ ᠬᠠᠷᠢᠴᠠᠭᠠ ᠨᠠᠩ ᠪᠠᠲᠤ ᠪᠡᠬᠢ
ᠲᠥᠷᠥᠯ ᠤᠭᠰᠠᠭᠠ ᠶᠢᠨ ᠪᠦᠲᠦᠴᠡ ᠶᠢᠨ ᠬᠡᠯᠪᠡᠷᠢ ᠨᠢ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠨᠢᠭᠡ ᠵᠦᠢᠯ ᠦᠨ ᠤᠷᠤᠭ ᠤᠨ ᠵᠠᠩᠰᠢᠯ ᠲᠠᠢ ᠶᠡᠬᠡ ᠬᠣᠯᠪᠣᠭᠠ ᠲᠠᠶ ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠡᠷᠲᠡᠨ ᠡᠴᠡ ᠠᠪᠤᠭᠠᠳ ᠬᠠᠷᠢ ᠣᠪᠣᠭ ᠤᠨ ᠬᠢᠨ ᠲᠠᠢ ᠣᠷᠣᠭᠴᠠᠭᠠᠬᠤ ᠵᠠᠩᠰᠢᠯ ᠲᠠᠢ ᠂ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠪᠠᠨ ᠡᠷᠬᠡᠪᠰᠢ ᠠᠳᠠᠯᠢ ᠪᠤᠰᠤ ᠬᠣᠶᠠᠷ ᠂ ᠲᠥᠷᠥᠯ ᠤᠭᠰᠠᠭᠠ ᠶᠢᠨ ᠬᠥᠮᠥᠨ ᠬᠡᠷᠡᠭᠲᠡᠶ ᠪᠠᠶᠢᠳᠠᠭ ᠃ 《 ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ 》 ᠤ ᠡᠬᠢᠯᠡᠯᠲᠡ ᠳᠦ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠪᠦᠷᠲᠡ ᠴᠢᠨ᠋ᠸᠠ᠂ ᠭᠣᠸᠠ ᠮᠠᠷᠠᠯ ᠲᠠᠩᠬᠢᠰ ᠢ ᠭᠡᠲᠦᠯᠵᠦ ᠂ ᠣᠨᠣᠨ ᠮᠦᠷᠡᠨ ᠡᠴᠡ ᠡᠬᠢ ᠠᠪᠤᠭᠰᠠᠨ ᠪᠣᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶᠢᠨ ᠬᠣᠷᠮᠣᠶ ᠳᠤ ᠢᠷᠡᠭᠰᠡᠨ ᠳᠣᠮᠣᠭ ᠶᠠᠷᠢᠶᠠ ᠪᠣᠯ ᠳᠠᠷᠤᠶ ᠪᠠᠯᠠᠷ ᠡᠷᠲᠡᠨ ᠦ ᠦᠶᠡ ᠶᠢᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠣᠪᠣᠭ ᠤᠨ ᠭᠠᠳᠠᠨᠠᠬᠢ ᠤᠷᠤᠭ ᠢ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠳᠤᠷᠠᠳᠬᠠᠯ ᠪᠣᠯᠤᠨᠠ ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠠᠯᠤᠰ ᠬᠣᠯᠠ ᠠᠴᠠ ᠂ ᠪᠤᠰᠤᠳ ᠬᠢᠨ ᠲᠠᠢ ᠣᠷᠣᠭᠴᠠᠭᠠᠬᠤ ᠢ ᠡᠷᠬᠢᠮᠯᠡᠵᠦ ᠂ ᠵᠠᠷᠢᠮ ᠳᠡᠭᠡᠲᠦ ᠳᠠᠪᠬᠤᠷᠭᠠᠲᠠᠨ ᠤ ᠲᠥᠷᠥᠯ ᠤᠭᠰᠠᠭᠠ ᠨᠢ ᠦᠶᠡ ᠤᠯᠠᠷᠢᠨ ᠣᠨᠴᠠ ᠲᠣᠭᠲᠠᠭᠰᠠᠨ ᠣᠪᠣᠭ ᠠᠢᠮᠠᠭ ᠠᠴᠠ ᠡᠬᠡᠨᠡᠷ ᠠᠪᠬᠤ ᠵᠤᠷᠰᠢᠯ ᠲᠠᠶ ᠪᠥᠭᠡᠳ ᠡᠭᠦᠨ ᠢᠶᠡᠷ ᠬᠣᠯᠪᠣᠭᠠᠰᠤ ᠪᠣᠯᠭᠠᠨ ᠤᠯᠤᠰ ᠲᠥᠷᠥ ᠶᠢᠨ ᠬᠣᠯᠪᠣᠭᠠᠨ ᠤ ᠬᠠᠷᠢᠴᠠᠭᠠ ᠪᠠᠨ ᠪᠠᠲᠤᠯᠠᠳᠠᠭ ᠃ ᠣᠷᠣᠭ ᠤᠨ ᠬᠠᠷᠢᠴᠠᠭᠠ ᠶᠢᠨ ᠭᠠᠵᠠᠷ ᠵᠦᠢ ᠶᠢᠨ ᠣᠷᠣᠨ ᠵᠠᠶ ᠶᠢᠨ ᠲᠠᠯᠠ ᠪᠠᠷ ᠬᠢ ᠲᠤᠰᠠᠭᠠᠷᠯᠠᠯ ᠨᠢ ᠴᠢᠰᠤᠨ ᠤᠳᠤᠮ ᠤᠨ ᠬᠠᠷᠢᠴᠠᠭᠠ ᠶᠢ ᠴᠢᠩᠭᠠᠷᠠᠭᠤᠯᠬᠤ ᠶᠢᠨ ᠤᠯᠠᠮ ᠢᠶᠠᠷ ᠲᠥᠷᠥᠯ ᠤᠭᠰᠠᠭᠠ ᠶᠢᠨ ᠬᠠᠷᠢᠴᠠᠩᠭᠤᠶ ᠪᠡᠶᠡ ᠪᠡᠨ ᠳᠠᠭᠠᠭᠠᠬᠤ ᠴᠢᠨᠠᠷ ᠢ ᠠᠬᠢᠭᠤᠯᠵᠤ ᠂ ᠡᠴᠢᠭᠡᠯᠡᠯ ᠦᠨ ᠳᠦᠷᠢᠮ ᠢ ᠨᠠᠩ ᠪᠠᠲᠤᠳᠬᠠᠭᠰᠠᠨ ᠃
