ᠵᠤᠬᠢᠶᠠᠭᠴᠢ:
ᠴᠠᠭ:2019-06-06
ᠥᠵᠡᠭᠰᠡᠨ : ℃
ᠢᠷᠡᠯᠲᠡ:
ᠲᠠᠪᠤᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠲᠠᠪᠤᠨ
ᠪᠢᠯᠢᠭ ᠦᠨ ᠤᠯᠠᠷᠢᠯ ᠤᠨ ᠲᠠᠪᠤᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠲᠠᠪᠤᠨ ᠢ ᠮᠣᠩᠭᠣᠯᠴᠤᠳ ᠣᠲᠠᠴᠢ ᠪᠣᠷᠬᠠᠨ ᠤ ᠮᠡᠨᠳᠦᠯᠡᠭᠰᠡᠨ ᠡᠳᠦᠷ ᠬᠡᠮᠡᠨ ᠬᠦᠨᠳᠦᠳᠭᠡᠨ ᠪᠡᠯᠭᠡᠯᠡᠳᠡᠭ᠃
ᠣᠲᠠᠴᠢ ᠪᠤᠷᠬᠠᠨ ᠪᠣᠯ ᠡᠮ ᠡᠮᠨᠡᠯᠭᠡ ᠶᠢᠨ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠪᠠᠢᠵᠤ᠂ ᠵᠢᠯ ᠪᠦᠷᠢ ᠶᠢᠨ ᠲᠠᠪᠤᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠲᠠᠪᠤᠨ ᠤ ᠦᠣᠷ ᠢᠶᠠᠷ ᠶᠢᠷᠲᠢᠨᠴᠦ ᠳᠦ ᠵᠠᠷᠯᠠᠨ ᠪᠠᠭᠤᠵᠤ᠂ ᠷᠠᠰᠢᠶᠠᠨ ᠡᠮ ᠢᠶᠡᠨ ᠰᠠᠴᠤᠨ᠂ ᠡᠪᠡᠰᠦ ᠤᠷᠭᠤᠮᠠᠯ᠂ ᠬᠦᠮᠦᠨ ᠠᠮᠢᠲᠠᠨ ᠢ ᠷᠠᠰᠢᠶᠠᠯᠠᠳᠠᠭ ᠭᠡᠨᠡ᠃ ᠡᠢᠮᠦ ᠡᠴᠡ ᠲᠠᠪᠤᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠲᠠᠪᠤᠨ ᠤ ᠥᠷᠯᠥᠭᠡ ᠬᠦᠮᠦᠨ ᠪᠦᠷᠢ ᠷᠠᠰᠢᠶᠠᠨ ᠣᠯᠬᠤ ᠪᠠᠷ ᠡᠷᠲᠡ ᠪᠤᠰᠳᠠᠭ᠃ ᠨᠠᠷᠠ ᠲᠤᠰᠤᠮᠠᠭᠴᠠ ᠡᠮᠲᠦ ᠷᠠᠰᠢᠶᠠᠨ ᠨᠠᠷᠠᠨ ᠤ ᠭᠡᠷᠡᠯ ᠳᠦ ᠠᠭᠤᠷᠰᠢᠴᠢᠬᠠᠳᠠᠭ ᠭᠡᠨᠡ᠃ ᠡᠨᠡ ᠡᠳᠦᠷ ᠦᠲᠡᠯᠦᠭᠡ ᠵᠠᠯᠠᠭᠤ ᠭᠡᠰᠡᠨ ᠦᠭᠡᠢ ᠳᠣᠣᠭᠠᠷᠬᠤ ᠦᠭᠡᠢ ᠪᠡᠷ ᠦᠣᠷ ᠤᠨ ᠬᠠᠷᠠᠩᠭᠤᠢ ᠪᠠᠷ ᠪᠣᠰᠴᠤ᠂ ᠤᠰᠤᠨ ᠳᠤ ᠰᠡᠭᠦᠳᠡᠷ ᠢᠶᠡᠨ ᠳᠤᠰᠬᠠᠨᠠ ᠂ ᠢᠩᠭᠢᠪᠡᠯ ᠪᠡᠶᠡ ᠳᠡᠭᠡᠷᠡᠬᠢ ᠭᠬᠢᠷ ᠪᠣᠷᠲᠠᠭ ᠠᠷᠢᠯᠤᠨᠠ ᠭᠡᠳᠡᠭ᠃ ᠳᠠᠬᠢᠨ ᠬᠤᠳᠳᠤᠭ ᠪᠣᠶᠣ ᠭᠣᠣᠯ ᠤᠨ ᠤᠰᠤᠨ ᠠᠴᠠ ᠠᠪᠤᠭᠰᠠᠨ ᠳᠡᠭᠦᠵᠢᠩ ᠤᠰᠤ ᠪᠠᠷ ᠨᠢᠭᠤᠷ ᠭᠠᠷ ᠢᠶᠠᠨ ᠤᠬᠢᠶᠠᠵᠤ᠂ ᠠᠮᠠ ᠪᠠᠨ ᠵᠠᠶᠢᠯᠤᠨᠠ᠃ ᠳᠡᠭᠦᠵᠢᠩ ᠤᠰᠤ ᠭᠡᠳᠡᠭ ᠨᠢ ᠭᠠᠵᠠᠷ ᠬᠦᠷᠭᠡᠭᠰᠡᠨ ᠦᠭᠡᠢ ᠤᠰᠤ ᠶᠢ ᠵᠢᠭᠠᠵᠤ ᠪᠣᠢ᠃ ᠳᠡᠭᠦᠵᠢᠩ ᠤᠰᠤ ᠪᠠᠨ ᠭᠡᠷ ᠲᠦ ᠪᠡᠨ ᠠᠪᠠᠴᠢᠵᠤ᠂ ᠨᠠᠰᠤᠲᠠᠢᠴᠤᠳ ᠤᠨ ᠢᠶᠠᠨ ᠨᠢᠭᠤᠷ ᠭᠠᠷ ᠢ ᠨᠢ ᠤᠬᠢᠶᠠᠯᠭᠠᠳᠠᠭ᠃ ᠲᠡᠭᠡᠪᠡᠯ ᠨᠢᠭᠡ ᠵᠢᠯ ᠨᠢᠳᠤᠨ ᠤ ᠡᠪᠡᠳᠴᠢᠨ᠂ ᠠᠷᠠᠰᠤᠨ ᠤ ᠡᠪᠡᠳᠴᠢᠨ ᠳᠦ ᠨᠡᠷᠪᠡᠭᠳᠡᠬᠦ ᠦᠭᠡᠢ ᠭᠡᠳᠡᠭ᠃ ᠮᠦᠨ ᠡᠨᠡ ᠡᠳᠦᠷ ᠨᠠᠷᠠ ᠪᠢᠲᠡᠭᠦᠦ ᠪᠡᠷ ᠬᠡᠭᠡᠷᠡ ᠭᠠᠷᠴᠤ ᠠᠬᠢ ᠰᠣᠢᠬᠠ ᠡᠪᠡᠰᠦ ᠲᠡᠭᠦᠵᠦ ᠴᠢᠬᠢᠨ ᠳᠦ ᠪᠡᠨ ᠵᠡᠭᠦᠨᠡ ᠂ ᠢᠩᠭᠢᠪᠡᠯ ᠴᠢᠬᠢᠨ ᠦ ᠡᠪᠡᠳᠴᠢᠨ ᠡᠴᠡ ᠰᠡᠷᠭᠡᠢᠯᠡᠵᠦ᠂ ᠰᠣᠨᠣᠷ ᠰᠣᠷᠭᠣᠭ ᠪᠣᠯᠣᠨᠠ ᠭᠡᠳᠡᠭ᠃ ᠨᠠᠷᠠ ᠪᠢᠲᠡᠭᠦᠦ ᠪᠡᠷ ᠲᠡᠭᠦᠭᠰᠡᠨ ᠠᠬᠢ᠂ ᠰᠣᠢᠬᠠ᠂ ᠲᠤᠭᠤᠯ ᠡᠪᠡᠰᠦ ᠶᠢ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠤ ᠡᠭᠦᠳᠡ ᠴᠣᠩᠬᠤ᠂ ᠠᠪᠳᠠᠷᠠ ᠬᠣᠷᠭᠣ ᠶᠢᠨ ᠵᠠᠪᠰᠠᠷ ᠲᠤ ᠬᠠᠪᠴᠢᠭᠤᠯᠪᠠᠯ ᠬᠣᠷᠣᠬᠠᠢ ᠰᠢᠪᠠᠵᠢ ᠶᠢ ᠰᠡᠷᠭᠡᠢᠯᠡᠨᠡ ᠭᠡᠳᠡᠭ᠃ ᠲᠠᠪᠤᠨ ᠰᠠᠷᠠ ᠶᠢᠨ ᠰᠢᠨᠡ ᠶᠢᠨ ᠲᠠᠪᠤᠨ ᠤ ᠦᠣᠷ ᠤᠨ ᠭᠡᠭᠡ ᠪᠡᠷ ᠠᠭᠤᠯᠠ ᠠᠪᠠᠷᠢᠪᠠᠯ ᠬᠡᠢᠮᠤᠷᠢ ᠳᠡᠭᠳᠡᠵᠦ᠂ ᠥᠭᠡᠳᠡ ᠡᠰᠡᠷᠡᠭ᠂ ᠦᠯᠵᠡᠢ ᠮᠦᠷ ᠲᠠᠢ ᠶᠠᠪᠤᠵᠤ ᠤᠷᠲᠤ ᠨᠠᠰᠤᠯᠠᠨᠠ ᠭᠡᠳᠡᠭ᠃ ᠡᠮᠴᠢ ᠰᠤᠷᠬᠤ ᠬᠦᠮᠦᠨ ᠡᠨᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠡᠮᠴᠢ ᠰᠤᠷᠪᠠᠯ ᠨᠡᠷᠡᠲᠦ ᠡᠮᠴᠢ ᠪᠣᠯᠵᠤ ᠡᠮ ᠨᠢ ᠡᠪᠡᠳᠴᠢᠨ ᠳᠦ ᠰᠠᠢᠨ ᠭᠦᠶᠦᠨᠡ ᠭᠡᠳᠡᠭ᠃
