ᠦᠭᠡᠳᠡᠢ ᠬᠠᠭᠠᠨᠲᠤ ᠤᠯᠤᠰ ᠪᠣᠯ ᠦᠭᠡᠳᠡᠢ ᠶᠢᠨ ᠬᠣᠶᠢᠴᠢᠰ ᠬᠠᠶᠢᠲᠤ ᠶᠢᠨ ᠪᠠᠶᠢᠭᠤᠯᠤᠭᠰᠠᠨ ᠮᠣᠩᠭᠣᠯ ᠬᠠᠭᠠᠨᠲᠤ ᠤᠯᠤᠰ ᠪᠣᠯᠣᠨ᠎ᠠ ᠃ ᠴᠢᠩᠭᠢᠰ ᠬᠠᠭᠠᠨ ᠬᠦᠪᠡᠭᠦᠳ ᠲᠦ ᠪᠡᠨ ᠭᠠᠵᠠᠷ ᠨᠤᠲᠤᠭ ᠬᠣᠪᠢᠶᠠᠬᠤ ᠳᠤ ᠭᠤᠳᠠᠭᠠᠷ ᠬᠦᠪᠡᠭᠦᠨ ᠦᠭᠡᠳᠡᠢ ᠡᠮᠢᠯ  ᠣᠳᠣ ᠶᠢᠨ ᠰᠢᠨᠵᠢᠶᠠᠩ ᠤᠨ ᠡᠮᠢᠯ ᠰᠢᠶᠠᠨ  ᠬᠢᠭᠡᠳ ᠬᠣᠪᠤᠭ  ᠣᠳᠣ ᠶᠢᠨ ᠰᠢᠨᠵᠢᠶᠠᠩ ᠤᠨ ᠬᠣᠪᠣᠭᠰᠠᠶᠢᠷ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠰᠢᠶᠠᠨ  ᠣᠷᠣᠨ ᠢ ᠣᠯᠵᠠᠢ ᠃ ᠥᠭᠡᠳᠡᠢ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠪᠠᠶᠢᠭ᠎ᠠ ᠦᠶ᠎ᠡ ᠳᠦ ᠡᠮᠢᠯ ᠣᠷᠣᠨ ᠲᠡᠭᠦᠨ ᠦ ᠠᠬᠠᠮᠠᠳ ᠬᠦᠪᠡᠭᠦᠨ ᠭᠦᠶᠦᠭ ᠦᠨ ᠡᠷᠭᠦᠮᠵᠢᠯᠡᠯ ᠦᠨ ᠭᠠᠵᠠᠷ ᠪᠠᠶᠢᠵᠤ ᠂ ᠬᠣᠶᠠᠳᠤᠭᠠᠷ ᠬᠦᠪᠡᠭᠦᠨ ᠭᠦᠳᠡᠨ ᠾᠧᠰᠢ ᠣᠷᠴᠢᠮ ᠣᠷᠣᠨ ᠢ ᠵᠠᠬᠢᠷᠴᠤ ᠪᠠᠶᠢᠵᠠᠢ ᠃ 1268 ᠣᠨ ᠳᠤ ᠬᠠᠶᠢᠲᠤ ᠴᠡᠷᠢᠭ ᠳᠠᠶᠢᠴᠢᠯᠠᠨ ᠵᠡᠭᠦᠨᠰᠢ ᠣᠷᠣᠵᠤ ᠶᠤᠸᠠᠨ ᠤᠯᠤᠰ ᠤᠨ ᠬᠢᠵᠠᠭᠠᠷ ᠢ ᠳᠡᠪᠴᠢᠯᠡᠪᠡ ᠃ ᠲᠡᠷᠡ ᠴᠠᠭᠠᠳᠠᠢ ᠬᠠᠭᠠᠨᠲᠤ ᠤᠯᠤᠰ ᠤᠨ ᠪᠡᠯᠡ ᠲᠠᠢ ᠳᠠᠶᠢᠳᠤᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠲᠡᠭᠦᠨ ᠲᠠᠢ ᠬᠣᠯᠪᠤᠭᠠᠯᠠᠨ ᠢᠯᠢ ᠭᠣᠣᠯ ᠤᠨ ᠬᠦᠨᠳᠡᠢ ᠪᠣᠯᠣᠨ ᠺᠠᠱᠭᠠᠷ ᠣᠷᠣᠨ ᠢ ᠡᠵᠡᠯᠡᠵᠦ ᠦᠭᠡᠳᠡᠢ ᠂ ᠴᠠᠭᠠᠳᠠᠢ ᠂ ᠵᠦᠴᠢ ᠭᠤᠷᠪᠠᠨ ᠤᠳᠤᠮ ᠤᠨ ᠣᠯᠠᠨ ᠲᠦᠷᠦᠯ ᠦᠨ ᠨᠣᠶᠠᠳ ᠢ ᠬᠤᠷᠢᠶᠠᠨ ᠴᠣᠭᠯᠠᠭᠤᠯᠵᠤ ᠲᠡᠯᠡᠰ ᠭᠣᠣᠯ ᠤᠨ ᠬᠦᠪᠡᠭᠡᠨ᠎ᠡ ᠶᠡᠬᠡ ᠬᠤᠷᠠᠯᠳᠠᠢ  1269 ᠣᠨ ᠪᠤᠶᠤ 1267 ᠣᠨ  ᠬᠤᠷᠠᠯᠳᠤᠭᠤᠯᠪᠠ ᠃ ᠪᠡᠯᠡ ᠦᠬᠦᠭᠰᠡᠨ ᠦ ᠬᠣᠶᠢᠨ᠎ᠠ ᠴᠠᠭᠠᠳᠠᠢ ᠬᠠᠭᠠᠨᠳᠤ ᠤᠯᠤᠰ ᠬᠡᠷᠡᠭ ᠳᠡᠭᠡᠷ᠎ᠡ ᠪᠡᠨ ᠬᠠᠶᠢᠲᠤ ᠶᠢᠨ ᠳᠠᠭᠠᠯᠲᠠ ᠪᠣᠯᠵᠤ ᠂ ᠴᠠᠭᠠᠳᠠᠢ ᠬᠠᠭᠠᠨᠲᠤ ᠤᠯᠤᠰ ᠤᠨ ᠲᠦᠷᠦᠭᠦᠦ ᠲᠤᠸ᠎ᠠ ᠬᠠᠶᠢᠲᠤ ᠶᠢ ᠪᠣᠷᠪᠢᠳᠠᠨ ᠳᠠᠭᠠᠵᠤ ᠶᠤᠸᠠᠨ ᠤᠯᠤᠰ ᠤᠨ ᠪᠠᠷᠠᠭᠤᠨ ᠬᠣᠶᠢᠲᠤ ᠬᠢᠯᠢ ᠬᠢᠵᠠᠭᠠᠷ ᠲᠤ ᠣᠯᠠᠨᠲᠠ ᠳᠦᠷᠢᠨ ᠣᠷᠣᠪᠠ ᠃ ᠬᠠᠶᠢᠲᠤ ᠶᠢᠨ ᠨᠣᠶᠠᠷᠬᠠᠯ ᠳᠣᠣᠷᠠᠬᠢ ᠦᠭᠡᠳᠡᠢ ᠬᠠᠭᠠᠨᠲᠤ ᠤᠯᠤᠰ ᠤᠨ ᠵᠠᠬᠢᠷᠴᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠣᠷᠣᠨ ᠭᠡᠪᠡᠯ ᠪᠠᠷᠠᠭᠤᠨᠰᠢ ᠺᠠᠱᠭᠠᠷ ᠪᠣᠯᠣᠨ ᠲᠡᠯᠡᠰ ᠲᠠᠩᠭᠢᠰ ᠤᠨ ᠬᠦᠨᠳᠡᠢ ᠂ ᠡᠮᠦᠨᠡᠰᠢ ᠲᠡᠭᠷᠢ ᠠᠭᠤᠯᠠ ᠶᠢᠨ ᠥᠯᠭᠡ ᠶᠢᠨ ᠣᠯᠠᠨ ᠬᠣᠲᠠᠳ ᠂ ᠵᠡᠭᠦᠨᠰᠢ ᠬᠠᠷ᠎ᠠ ᠬᠤᠵᠤᠤ  ᠣᠳᠣ ᠶᠢᠨ ᠰᠢᠨᠵᠢᠶᠠᠩ ᠤᠨ ᠲᠦᠷᠫᠠᠨ  ᠂ ᠬᠣᠶᠢᠰᠢ ᠪᠠᠨ ᠡᠷᠴᠢᠰ ᠮᠦᠷᠡᠨ ᠦ ᠳᠡᠭᠡᠳᠦ ᠰᠠᠪᠠ ᠭᠠᠵᠠᠷ ᠬᠦᠷᠴᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠢᠯᠢ ᠭᠣᠣᠯ ᠪᠣᠯᠣᠨ ᠲᠡᠯᠡᠰ ᠮᠦᠷᠡᠨ ᠦ ᠰᠠᠪᠠ ᠭᠠᠵᠠᠷ ᠢᠶᠠᠷ ᠲᠥᠪ ᠪᠤᠯᠭᠠᠭᠰᠠᠨ ᠳᠤᠮᠳᠠᠳᠤ ᠠᠽᠢᠶ᠎ᠠ ᠶᠢᠨ ᠲᠣᠮᠣ ᠨᠢᠭᠡᠨ ᠬᠦᠴᠦᠨ ᠪᠣᠯᠵᠠᠢ ᠃ 1301 ᠣᠨ ᠳᠤ ᠬᠠᠶᠢᠲᠤ ᠨᠠᠰᠤ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠲᠡᠭᠦᠨ ᠦ ᠬᠦᠪᠡᠭᠦᠨ ᠴᠡᠪᠡᠷ ᠬᠠᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠪᠠ ᠃1309 ᠣᠨ ᠳᠤ ᠴᠡᠪᠡᠷ ᠴᠠᠭᠠᠳᠠᠢ ᠬᠠᠭᠠᠨᠲᠤ ᠤᠯᠤᠰ ᠲᠠᠢ ᠶᠠᠪᠤᠭᠤᠯᠤᠭᠰᠠᠨ ᠳᠣᠲᠣᠭᠠᠳᠤ ᠶᠢᠨ ᠲᠡᠮᠡᠴᠡᠭᠡᠨ ᠳᠦ ᠢᠯᠠᠭᠳᠠᠭᠠᠳ ᠶᠤᠸᠠᠨ ᠤᠯᠤᠰ ᠲᠤ ᠳᠤᠲᠠᠭᠠᠨ ᠣᠴᠢᠪᠠ ᠃ ᠴᠡᠪᠡᠷ ᠦᠨ ᠡᠵᠡᠮᠰᠢᠯ ᠦᠨ ᠭᠠᠵᠠᠷ ᠣᠷᠣᠨ ᠤ ᠶᠡᠬᠡᠩᠭᠢ ᠬᠡᠰᠡᠭ ᠢ ᠰᠠᠶ᠋ᠢᠬᠠᠨ ᠬᠠᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠭᠰᠠᠨ ᠴᠠᠭᠠᠳᠠᠢ ᠬᠠᠭᠠᠨᠲᠤ ᠤᠯᠤᠰ ᠤᠨ ᠬᠠᠨ ᠡᠰᠡᠨᠪᠤᠬ᠎ᠠ ᠡᠵᠡᠯᠡᠵᠦ ᠦᠭᠡᠳᠡᠢ ᠬᠠᠭᠠᠨᠲᠤ ᠤᠯᠤᠰ ᠮᠦᠬᠦᠭᠰᠡᠨ ᠪᠠᠶᠢᠨ᠎ᠠ ᠃