ᠵᠤᠬᠢᠶᠠᠭᠴᠢ: ᠴᠠᠭ:2018-12-26 ᠥᠵᠡᠭᠰᠡᠨ : ᠢᠷᠡᠯᠲᠡ:
ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ

ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ  1243 ~1502  ᠪᠣᠯ ᠶᠤᠸᠠᠨ ᠤᠯᠤᠰ ᠤᠨ ᠬᠠᠷᠢᠶᠠᠲᠤ ᠤᠯᠤᠰ ᠪᠣᠯᠣᠨ᠎ᠠ ᠂ ᠪᠠᠰᠠ ᠠᠯᠲᠠᠨ ᠣᠷᠳᠣᠳᠤ ᠬᠠᠭᠠᠨᠲᠤ ᠤᠯᠤᠰ ᠪᠤᠶᠤ ᠵᠦᠴᠢ ᠤᠯᠤᠰ ᠭᠡᠳᠡᠭ ᠃ 1225 ᠣᠨ ᠳᠤ ᠴᠢᠩᠭᠢᠰ ᠬᠠᠭᠠᠨ ᠳᠥᠷᠪᠡᠨ ᠬᠦᠪᠡᠭᠦᠳ ᠲᠦ ᠪᠡᠨ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠬᠤᠪᠢᠶᠠᠬᠤ ᠳᠤ ᠠᠬᠠᠮᠠᠳ ᠬᠦᠪᠡᠭᠦᠨ ᠵᠦᠴᠢ ᠳᠤ ᠡᠷᠴᠢᠰ ᠮᠦᠷᠡᠨ ᠡᠴᠡ ᠪᠠᠷᠠᠭᠤᠨᠰᠢ ᠂ ᠬᠤᠷᠧᠽᠮ ᠠᠴᠠ ᠬᠣᠶᠢᠰᠢ ᠪᠠᠨ ᠮᠣᠩᠭᠣᠯ ᠴᠡᠷᠢᠭ ᠦᠨ ᠮᠣᠷᠢᠨ ᠲᠤᠭᠤᠷᠠᠢ ᠬᠦᠷᠦᠭᠰᠡᠨ ᠭᠠᠵᠠᠷ ᠢ ᠬᠤᠪᠢᠶᠠᠨ ᠥᠭᠴᠡᠢ ᠃ ᠵᠦᠴᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠬᠤ ᠳᠤ ᠲᠡᠭᠦᠨ ᠦ ᠪᠤᠳᠠᠲᠠᠢ ᠡᠵᠡᠮᠰᠢᠵᠦ ᠪᠠᠶᠢᠭᠰᠠᠨ ᠭᠠᠵᠠᠷ ᠣᠷᠣᠨ ᠨᠢ ᠦᠷᠡᠯ ᠭᠣᠣᠯ ᠠᠴᠠ ᠵᠡᠭᠦᠨᠰᠢᠬᠢ ᠬᠢᠪᠴᠠᠭ ᠤᠨ ᠲᠠᠯ᠎ᠠ ᠶᠢᠨ ᠵᠡᠭᠦᠨ ᠬᠡᠰᠡᠭ ᠪᠣᠯᠣᠨ ᠠᠮᠤᠳᠠᠷᠢᠶᠠ ᠂ ᠰᠢᠷᠢᠳᠠᠷᠢᠶᠠ ᠬᠣᠶᠠᠷ ᠮᠦᠷᠡᠨ ᠦ ᠳᠣᠣᠷᠠᠳᠤ ᠰᠠᠪᠠ ᠭᠠᠵᠠᠷ ᠤᠨ ᠬᠤᠷᠧᠽᠮ ᠤᠨ ᠨᠤᠲᠤᠭ ᠪᠠᠭᠲᠠᠳᠠᠭ ᠃ 1236 ~1240 ᠣᠨ ᠳᠤ ᠵᠦᠴᠢ ᠶᠢᠨ ᠬᠣᠶᠠᠳᠤᠭᠠᠷ ᠬᠦᠪᠡᠭᠦᠨ ᠪᠠᠲᠤ ᠦᠷᠡᠯ ᠭᠣᠣᠯ ᠠᠴᠠ ᠪᠠᠷᠠᠭᠤᠨᠰᠢ ᠸᠣᠯᠭ᠎ᠠ ᠮᠦᠷᠡᠨ ᠦ ᠰᠠᠪᠠ ᠭᠠᠵᠠᠷ ᠢᠶᠠᠷ ᠨᠤᠲᠤᠭᠯᠠᠵᠤ ᠪᠠᠶᠢᠭᠰᠠᠨ ᠬᠢᠪᠴᠠᠭ ᠂ ᠪᠣᠯᠠᠷ ᠵᠡᠷᠭᠡ ᠤᠭᠰᠠᠭ᠎ᠠ ᠠᠶᠢᠮᠠᠭ ᠢ ᠳᠠᠶᠢᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ ᠪᠦᠭᠡᠳ ᠣᠷᠣᠰ ᠢ ᠳᠠᠶᠢᠯᠠᠵᠤ ᠣᠷᠣᠰ ᠤᠨ ᠡᠯ᠎ᠡ ᠭᠦᠩᠲᠦ ᠤᠯᠤᠰ ᠢ ᠠᠯᠪᠠᠳᠠᠵᠤ ᠪᠠᠶᠢᠭᠠᠳ ᠬᠠᠷᠢᠶᠠᠲᠤ ᠠᠯᠪᠠ ᠪᠠᠶᠢᠭᠤᠯᠪᠠ ᠃ 1243 ᠣᠨ ᠳᠤ ᠪᠠᠲᠤ ᠦᠷᠦᠨᠡᠰᠢ ᠳᠠᠶᠢᠯᠠᠭᠠᠳ ᠸᠣᠯᠭ᠎ᠠ ᠮᠦᠷᠡᠨ ᠦ ᠳᠡᠭᠡᠳᠦ ᠰᠠᠪᠠ ᠣᠷᠣᠨ ᠳᠤ ᠪᠤᠴᠠᠵᠤ ᠢᠷᠡᠭᠡᠳ ᠵᠡᠭᠦᠨᠰᠢ ᠡᠷᠴᠢᠰ ᠮᠦᠷᠡᠨ ᠂ ᠪᠠᠷᠠᠭᠤᠨᠰᠢ ᠣᠷᠣᠰ ᠂ ᠡᠮᠦᠨᠡᠰᠢ ᠪᠠᠯᠬᠠᠱ ᠨᠠᠭᠤᠷ ᠂ ᠺᠠᠰᠫᠢ ᠲᠠᠩᠭᠢᠰ ᠂ ᠬᠠᠷ᠎ᠠ ᠲᠠᠩᠭᠢᠰ ᠂ ᠤᠮᠠᠷᠠᠰᠢ ᠤᠮᠠᠷᠠᠲᠤ ᠲᠦᠢᠯ ᠦᠨ ᠴᠠᠭᠠᠷᠢᠭ ᠣᠷᠴᠢᠮ ᠬᠦᠷᠲᠡᠯᠡᠬᠢ ᠥᠷᠭᠡᠨ ᠠᠭᠤᠳᠠᠮ ᠨᠤᠲᠤᠭ ᠳᠡᠪᠢᠰᠭᠡᠷ ᠲᠠᠢ ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ ᠢ ᠪᠠᠶᠢᠭᠤᠯᠵᠤ ᠂ ᠸᠣᠯᠭ᠎ᠠ ᠮᠦᠷᠡᠨ ᠦ ᠰᠠᠪᠠ ᠳ᠋ᠡᠬᠢ ᠪᠠᠲᠤ ᠶᠢᠨ ᠰᠠᠷᠡᠢ ᠬᠣᠲᠠ  ᠠᠰᠲᠷᠬᠠᠨ ᠣᠷᠴᠢᠮ  ᠳᠤ ᠨᠡᠶᠢᠰᠯᠡᠪᠡ ᠃

ᠪᠠᠲᠤ ᠶᠢᠨ ᠠᠬ᠎ᠠ ᠤᠷᠲᠤ ᠬᠢᠭᠡᠳ ᠲᠡᠭᠦᠨ ᠦ ᠬᠣᠶᠢᠴᠢᠰ ᠨᠢ ᠪᠠᠷᠠᠭᠤᠨ ᠰᠢᠪᠧᠷᠢᠶ᠎ᠠ ᠂ ᠺᠠᠽᠠᠭᠰᠲ᠋ᠠᠨ ᠢ ᠡᠵᠡᠯᠡᠵᠦ ᠴᠠᠭᠠᠨ ᠣᠷᠳᠣᠲᠣ ᠬᠠᠨᠲᠣ ᠤᠯᠤᠰ ᠪᠣᠯᠪᠠ ᠃ ᠭᠥᠶᠥᠭ ᠬᠠᠭᠠᠨ ᠬᠠᠯᠢᠭᠰᠠᠨ ᠤ ᠳᠠᠷᠠᠭ᠎ᠠ ᠂ ᠪᠠᠲᠤ ᠪᠠᠷ ᠮᠦᠩᠭᠡ ᠶᠢ ᠳᠡᠮᠵᠢᠵᠦ ᠬᠠᠭᠠᠨ ᠰᠠᠭᠤᠷᠢᠨ ᠢ ᠡᠵᠡᠯᠡᠭᠦᠯᠵᠦ ᠂ ᠦᠭᠡᠳᠡᠢ ᠂ ᠴᠠᠭᠠᠳᠠᠢ ᠶᠢᠨ ᠰᠢᠰᠲ᠋ᠧᠮ ᠦᠨ ᠬᠦᠴᠦᠨ ᠳᠦ ᠴᠣᠬᠢᠯᠲᠠ ᠥᠭᠴᠦ ᠂ ᠵᠠᠪᠰᠢᠶᠠᠨ ᠢ ᠠᠰᠢᠭᠯᠠᠵᠤ ᠾᠧᠵᠦ᠋ᠩ ᠣᠷᠣᠨ ᠢ ᠡᠵᠡᠯᠡᠪᠡ ᠃ 1255 ᠣᠨ ᠳᠤ ᠪᠠᠲᠤ ᠨᠠᠰᠤ ᠪᠠᠷᠠᠵᠠᠢ ᠃ ᠬᠠᠨ ᠰᠠᠭᠤᠷᠢᠨ ᠢ ᠤᠷᠢᠳ ᠬᠣᠵᠢᠳ ᠪᠠᠲᠤ ᠶᠢᠨ ᠳᠡᠭᠦᠦ ᠪᠡᠷᠬᠡ  1257 ~1266  ᠂ ᠪᠠᠲᠤ ᠶᠢᠨ ᠣᠮᠪᠤᠯᠤ ᠮᠦᠩᠭᠡᠲᠡᠮᠦᠷ ᠂ ᠲᠣᠳᠣᠮᠦ᠋ᠩᠭᠡ  1282 ~1287  ᠂ ᠲᠣᠯᠠᠪᠤᠬ᠎ᠠ  1287 ~1291  ᠂ ᠲᠣᠭᠲᠠᠬᠤ  1291 ~1313  ᠂ ᠲᠣᠭᠲᠠᠬᠤ ᠶᠢᠨ ᠠᠴᠢ ᠬᠦᠪᠡᠭᠦᠨ ᠦᠽᠠᠪᠡᠭ  1313 ~1341  ᠂ ᠦᠽᠠᠪᠡᠭ ᠤᠨ ᠬᠦᠪᠡᠭᠦᠨ ᠵᠠᠨᠢᠪᠡᠭ  ᠵᠠᠨᠢᠪᠠᠭ ᠬᠠᠨ 1342 ~1357  ᠵᠢᠴᠢ ᠣᠮᠪᠣᠯᠣ ᠪᠠᠷᠳᠢᠪᠡᠭ  1357 ~1359  ᠵᠡᠷᠭᠡ ᠬᠦᠮᠦᠰ ᠡᠵᠡᠯᠡᠵᠦ ᠪᠠᠶᠢᠵᠠᠢ ᠃

1357 ᠣᠨ ᠳᠤ ᠵᠠᠨᠢᠪᠡᠭ ᠬᠣᠣᠷᠯᠠᠭᠳᠠᠵᠤ ᠬᠠᠭᠠᠨᠲᠤ ᠲᠦᠷᠥ ᠶᠢᠨ ᠳᠣᠲᠣᠭᠠᠲᠤ ᠶᠢᠨ ᠬᠠᠭᠠᠷᠠᠯ ᠲᠡᠮᠡᠴᠡᠯ ᠡᠭᠦᠰᠪᠡ ᠃ 1357 ~1380 ᠣᠨ ᠤ ᠳᠤ ᠬᠢᠪᠴᠠᠭ ᠬᠠᠭᠠᠨ ᠬᠣᠷᠢ ᠭᠠᠷᠤᠢ ᠰᠣᠯᠢᠭᠳᠠᠪᠠ ᠃ ᠵᠢᠷᠠ ᠠᠴᠠ ᠳᠠᠯᠠᠭᠠᠳ ᠣᠨ ᠤ ᠥᠶ᠎ᠡ ᠳᠦ ᠲᠦᠮᠡᠲᠦ ᠶᠢᠨ ᠨᠣᠶᠠᠨ ᠮᠠᠮᠠᠢᠢ ᠂ ᠮᠠᠨᠤᠤᠯ ᠬᠠᠭᠠᠨ ᠢᠶᠠᠨ ᠡᠵᠡᠮᠳᠡᠨ ᠬᠠᠭᠠᠨᠲᠤ ᠤᠯᠤᠰ ᠤᠨ ᠪᠤᠳᠠᠳᠤ ᠡᠷᠬᠡ ᠶᠢ ᠠᠳᠬᠤᠵᠤ ᠂ ᠸᠣᠯᠭ᠎ᠠ ᠮᠦᠷᠡᠨ ᠡᠴᠡ ᠪᠠᠷᠠᠭᠤᠨᠰᠢᠬᠢ ᠣᠷᠣᠨ ᠢ ᠵᠠᠬᠢᠷᠪᠠ ᠃ 1380 ᠣᠨ ᠳᠤ ᠴᠠᠭᠠᠨ ᠣᠷᠳᠣᠲᠣ ᠬᠠᠨ ᠳᠣᠭᠲᠠᠭᠠᠮᠢᠰᠢ ᠂ ᠮᠠᠮᠠᠢᠢ ᠶᠢ ᠪᠣᠲᠠ ᠴᠣᠬᠢᠭᠠᠳ ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ ᠤᠨ ᠭᠣᠣᠯ ᠨᠤᠲᠤᠭ ᠢ ᠡᠵᠡᠯᠡᠵᠦ ᠬᠢᠪᠴᠠᠭ ᠤᠨ ᠬᠠᠨ ᠪᠣᠯᠪᠠ ᠃ ᠢᠩᠭᠢᠭᠡᠳ ᠬᠢᠪᠴᠠᠭ ᠤᠨ ᠬᠠᠳ ᠨᠢ ᠪᠦᠷ ᠴᠠᠭᠠᠨ ᠣᠷᠳᠣᠲᠣ ᠶᠢᠨ ᠤᠳᠤᠮ ᠤᠭᠰᠠᠭᠠᠲᠠᠨ ᠪᠣᠯᠵᠠᠢ ᠃ 1389 ~1395 ᠣᠨ ᠤ ᠭᠤᠷᠪᠠ ᠤᠳᠠᠭᠠᠨ ᠤ ᠳᠠᠶᠢᠨ ᠢᠶᠠᠷ ᠳᠠᠮᠵᠢᠭᠠᠳ ᠲᠡᠮᠦᠷ ᠬᠠᠭᠠᠨ ᠂ ᠳᠣᠭᠲᠠᠭᠠᠮᠢᠰᠢ ᠶᠢ ᠪᠣᠲᠠ ᠨᠢᠷᠭᠡᠵᠦ ᠸᠣᠯᠭ᠎ᠠ ᠮᠦᠷᠡᠨ ᠦ ᠣᠷᠴᠢᠮ ᠤᠨ ᠮᠠᠰᠢ ᠣᠯᠠᠨ ᠬᠣᠲᠠ ᠶᠢ ᠡᠵᠡᠯᠡᠵᠦ ᠂ ᠺᠷᠠᠶᠢᠮᠢᠶᠠ ᠵᠡᠷᠭᠡ ᠣᠷᠣᠨ ᠤ ᠡᠯ᠎ᠡ ᠬᠣᠲᠠᠳ ᠢ ᠪᠣᠯᠢᠶᠠᠨ ᠠᠪᠤᠪᠠ ᠃

14 ᠳ᠋ᠤᠭᠡᠷ ᠵᠠᠭᠤᠨ ᠤ ᠶᠡᠷᠡᠭᠡᠳ ᠣᠨ ᠤ ᠰᠡᠭᠦᠯᠴᠢ ᠥᠶ᠎ᠡ ᠡᠴᠡ ᠡᠬᠢᠯᠡᠭᠡᠳ ᠴᠠᠭᠠᠨ ᠣᠷᠳᠣᠲᠤ ᠬᠠᠭᠠᠨᠲᠤ ᠤᠯᠤᠰ ᠤᠨ ᠶᠢᠳᠢᠬᠦ ᠂ ᠮᠠᠨᠤᠤᠯ ᠬᠠᠭᠠᠨ ᠢᠶᠠᠨ ᠡᠵᠡᠮᠳᠡᠵᠦ ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ ᠤᠨ ᠶᠡᠬᠡᠩᠭᠢ ᠬᠡᠰᠡᠭ ᠭᠠᠵᠠᠷ ᠣᠷᠣᠨ ᠢ ᠨᠢᠭᠡᠳᠭᠡᠪᠡ ᠃ ᠲᠡᠷᠡ 1339 ᠣᠨ ᠳᠤ ᠯᠢᠲᠸ᠎ᠠ ᠶᠢ ᠴᠣᠬᠢᠨ ᠢᠯᠠᠭᠠᠳ ᠲᠡᠭᠦᠨ ᠦ ᠭᠠᠳᠠᠭᠰᠢ ᠥᠷᠭᠡᠵᠢᠬᠦ ᠶᠢ ᠬᠣᠷᠢᠭᠯᠠᠪᠠ ᠃ 1408 ᠣᠨ ᠳᠤ ᠣᠷᠣᠰ ᠢ ᠳᠣᠪᠲᠣᠯᠵᠤ ᠨᠡᠯᠢᠶᠡᠳ ᠣᠯᠠᠨ ᠬᠣᠲᠠ ᠶᠢ ᠡᠪᠳᠡᠭᠰᠡᠨ ᠪᠣᠯᠪᠠᠴᠤ ᠮᠣᠰᠺᠸᠠ ᠶᠢ ᠡᠵᠡᠯᠡᠵᠦ ᠳᠡᠶᠢᠯᠦᠭᠰᠡᠨ ᠦᠭᠡᠢ ᠃ 1410 ~1412 ᠣᠨ ᠤ ᠳᠣᠲᠤᠭᠠᠳᠤ ᠶᠢᠨ ᠬᠢᠮᠤᠷᠠᠯ ᠳᠤ ᠶᠢᠳᠢᠭᠦ ᠡᠷᠬᠡ ᠪᠡᠨ ᠠᠯᠳᠠᠭᠠᠳ ᠳᠤᠲᠠᠭᠠᠨ ᠶᠠᠪᠤᠪᠠ ᠃

15 ᠳ᠋ᠤᠭᠠᠷ ᠵᠠᠭᠤᠨ ᠤ ᠬᠣᠷᠢᠭᠠᠳ ᠣᠨ ᠤ ᠡᠬᠢᠨ ᠦ ᠥᠶ᠎ᠡ ᠪᠡᠷ ᠰᠢᠪᠧᠷᠢᠶ᠎ᠠ ᠬᠠᠭᠠᠨᠲᠤ ᠤᠯᠤᠰ ᠰᠠᠯᠵᠤ ᠭᠠᠷᠪᠠ ᠃ ᠳᠤᠮᠳᠠᠴᠢ ᠥᠶ᠎ᠡ ᠳᠦ ᠺᠠᠽᠠᠨ ᠬᠠᠭᠠᠨᠲᠤ ᠤᠯᠤᠰ  1445 ~1552  ᠂ ᠺᠷᠠᠶᠢᠮᠢᠶᠠ ᠬᠠᠭᠠᠨᠲᠤ ᠤᠯᠤᠰ  1443 ~1789  ᠂ ᠠᠰᠲᠷᠬᠠᠨ ᠬᠠᠭᠠᠨᠲᠤ ᠤᠯᠤᠰ  1460 ~1556  ᠵᠡᠷᠭᠡ ᠲᠤᠰᠠᠭᠠᠷ ᠳᠣᠭᠲᠠᠨᠢᠭᠰᠠᠨ ᠤᠯᠤᠰ ᠤᠳ ᠰᠠᠯᠵᠤ ᠭᠠᠷᠤᠭᠠᠳ ᠬᠢᠪᠴᠠᠭ ᠬᠠᠭᠠᠨᠲᠤ ᠤᠯᠤᠰ ᠵᠦᠪᠬᠡᠨ ᠵᠢᠭᠠᠬᠠᠨ ᠭᠠᠵᠠᠷ ᠨᠤᠲᠤᠭ ᠦᠯᠡᠳᠡᠵᠦ ᠶᠡᠬᠡ ᠣᠷᠳᠣᠲᠤ ᠬᠠᠭᠠᠨᠲᠤ ᠤᠯᠤᠰ ᠬᠡᠮᠡᠭᠳᠡᠬᠦ ᠪᠣᠯᠪᠠ ᠃ 1502 ᠣᠨ ᠳᠤ ᠶᠡᠬᠡ ᠣᠷᠳᠣᠳᠣ ᠬᠠᠭᠠᠨᠲᠤ ᠤᠯᠤᠰ ᠮᠦᠬᠦᠵᠡᠢ ᠃

 


   :                    
   :           
备案序号:蒙ICP备05003250号 公安备案15010502000173