ᠲᠡᠦᠭᠡ ᠭᠠᠵᠠᠷ ᠵᠦᠢ ᠶᠢᠨ ᠵᠣᠬᠢᠶᠠᠯ ᠃ ᠴᠢᠩ ᠤᠯᠤᠰ ᠤᠨ ᠵᠠᠩ ᠮᠦ ( ᠤᠭ ᠤᠨ ᠨᠡᠷ᠎ᠡ ᠶᠢᠩ ᠰᠢᠶᠠᠨ ᠂ ᠡᠷᠭᠦᠭᠳᠡᠭᠰᠡᠨ ᠨᠡᠷ᠎ᠡ ᠱᠢ ᠵᠧᠦ ᠂ ᠱᠠᠨ ᠰᠢ ᠮᠤᠵᠢ ᠶᠢᠨ ᠫᠢᠩ ᠳ᠋ᠢᠩ ᠦᠨ ᠬᠦᠮᠦᠨ ᠂ 1805 ~1849 ) ᠵᠣᠬᠢᠶᠠᠵᠤ ᠂ ᠾᠧ ᠴᠢᠦ ᠲᠣᠤ ᠬᠠᠷᠭᠤᠭᠤᠯᠤᠨ ᠨᠦᠬᠦᠪᠦᠷᠢᠯᠡᠪᠡ ᠃ 16 ᠪᠤᠳᠢ ᠃ ᠲᠡᠦᠭᠡ ᠶᠢᠨ ᠣᠶᠢᠯᠠᠯᠭ᠎ᠠ ᠶᠢᠨ ᠬᠡᠯᠪᠡᠷᠢ ᠪᠡᠷ ᠨᠠᠶᠢᠷᠠᠭᠤᠯᠵᠤ ᠂ ᠴᠢᠩ ᠤᠯᠤᠰ ᠤᠨ ᠮᠣᠩᠭᠣᠯ ᠵᠠᠰᠠᠭ ᠤᠨ ᠪᠠᠶᠢᠷᠢᠯᠠᠵᠤ ᠪᠦᠬᠦᠢ ᠭᠠᠵᠠᠷ ᠣᠷᠣᠨ ᠂ ᠲᠡᠦᠭᠡ ᠂ ᠡᠷᠲᠡᠨ ᠦ ᠪᠠᠭᠤᠷᠢ ᠂ ᠠᠭᠤᠯᠠ ᠤᠰᠤ ᠂ ᠵᠠᠩ ᠠᠭᠠᠯᠢ ᠵᠡᠷᠭᠡ ᠶᠢ ᠬᠤᠪᠢᠶᠠᠷᠢᠯᠠᠨ ᠲᠡᠮᠲᠡᠭᠯᠡᠵᠦ ᠂ ᠢᠯᠠᠩᠭᠤᠶ᠎ᠠ ᠶᠤᠸᠠᠨ ᠤᠯᠤᠰ ᠮᠦᠬᠦᠭᠰᠡᠨ ᠡᠴᠡ ᠬᠣᠶᠢᠰᠢᠬᠢ ᠡᠯ᠎ᠡ ᠠᠶᠢᠮᠠᠭ ᠤᠨ ᠬᠤᠪᠢᠷᠠᠯᠲᠠ ᠶᠢ ᠴᠢᠬᠤᠯᠠᠴᠢᠯᠠᠨ ᠪᠢᠴᠢᠪᠡ ᠃ ᠪᠢᠴᠢᠬᠦ ᠳ᠋ᠡᠭᠡᠨ ᠴᠢᠭᠤᠯᠭᠠᠨ ᠬᠤᠰᠢᠭᠤ ᠪᠠᠷ ᠨᠢᠭᠡᠴᠢ ᠪᠤᠯᠭᠠᠵᠤ ᠂ ᠥᠪᠥᠷ ᠮᠣᠩᠭᠣᠯ ᠤᠨ 24 ᠠᠶᠢᠮᠠᠭ ᠢ 6 ᠪᠤᠳᠢ ᠳᠤ ᠪᠠᠭᠲᠠᠭᠠᠵᠤ ᠂ ᠠᠷᠤ ᠮᠣᠩᠭᠣᠯ ᠤᠨ ᠬᠠᠯᠬ᠎ᠠ 4 ᠠᠶᠢᠮᠠᠭ ᠢ 4 ᠪᠤᠳᠢ ᠳᠤ ᠪᠠᠭᠲᠠᠭᠠᠵᠤ ᠂ ᠣᠶᠢᠷᠠᠳ ᠮᠣᠩᠭᠣᠯ ᠪᠠ ᠰᠢᠨ᠎ᠡ ᠬᠠᠭᠤᠴᠢᠨ ᠲᠣᠷᠭᠣᠳ ᠠᠶᠢᠮᠠᠭ ᠢ 3 ᠪᠤᠳᠢ ᠳᠤ ᠪᠠᠭᠲᠠᠭᠠᠵᠠᠢ ᠃ ᠡᠯ᠎ᠡ ᠠᠶᠢᠮᠠᠭ ᠢ ᠴᠥᠮ ᠶᠡᠷᠦᠩᠬᠡᠶᠢᠯᠡᠨ ᠦᠭᠦᠯᠡᠵᠦ ᠂ ᠥᠪᠡᠷ ᠢᠶᠡᠨ ᠪᠠᠰᠠ ᠲᠠᠶᠢᠯᠪᠤᠷᠢ ᠬᠠᠳᠠᠵᠠᠢ ᠃ ᠪᠠᠶᠢᠴᠠᠭᠠᠨ ᠨᠣᠲᠠᠯᠠᠯᠲᠠ ᠨᠢ ᠨᠠᠷᠢᠨ ᠲᠣᠳᠣᠷᠬᠠᠢ ᠲᠤᠯᠠ ᠯᠢᠶᠣᠤ ᠤᠯᠤᠰ ᠂ ᠠᠯᠲᠠᠨ ᠤᠯᠤᠰ ᠂ ᠶᠤᠸᠠᠨ ᠤᠯᠤᠰ ᠤᠨ ᠭᠤᠷᠪᠠᠨ ᠲᠥᠷᠥ ᠶᠢᠨ ᠳᠣᠭᠲᠠᠭᠳᠠᠭᠰᠠᠨ ᠲᠡᠦᠭᠡ ᠶᠢ ᠨᠦᠬᠦᠵᠦ ᠴᠢᠳᠠᠬᠤ ᠪᠦᠭᠡᠳ ᠲᠤᠬᠠᠢ ᠶᠢᠨ ᠥᠶ᠎ᠡ ᠶᠢᠨ ᠬᠢᠯᠢ ᠬᠢᠵᠠᠭᠠᠷ ᠣᠷᠣᠨ ᠤ ᠪᠠᠶᠢᠳᠠᠯ ᠢ ᠣᠶᠢᠯᠠᠭᠠᠬᠤ ᠳᠤ ᠶᠡᠬᠡ ᠳᠥᠭᠥᠮ ᠦᠵᠡᠭᠦᠯᠦᠭᠰᠡᠨ ᠶᠤᠮ ᠃ ᠵᠣᠬᠢᠶᠠᠭᠴᠢ ᠡᠬᠡ ᠨᠤᠤᠷᠠᠭ ᠢᠶᠠᠨ ᠪᠢᠴᠢᠵᠦ ᠪᠠᠷᠠᠭᠠᠳᠤᠢ ᠪᠠᠷ ᠡᠷᠲᠡ ᠨᠠᠰᠤ ᠪᠠᠷᠠᠵᠠᠢ ᠃ ᠰᠡᠭᠦᠯᠡᠷ ᠨᠠᠶᠢᠵᠠ ᠨᠢ ᠾᠧ ᠴᠢᠦ ᠲᠣᠤ ᠬᠠᠷᠭᠤᠭᠤᠯᠵᠤ ᠲᠠᠶᠢᠯᠪᠤᠷᠢ ᠬᠢᠭᠰᠡᠨ ᠪᠦᠭᠡᠳ ᠨᠠᠶᠢᠷᠠᠭᠤᠯᠤᠨ ᠪᠢᠴᠢᠵᠦ ᠪᠠᠷᠠᠭᠠᠳᠤᠢ 4 ᠪᠤᠳᠢ ᠶᠢ ᠨᠢ ᠨᠦᠬᠦᠨ ᠪᠢᠴᠢᠵᠦ ᠲᠡᠭᠦᠰᠭᠡᠵᠡᠢ ᠃ ᠨᠡᠶᠢᠲᠡ ᠳᠠᠶᠠᠭᠠᠷ ᠬᠡᠷᠡᠭᠯᠡᠵᠦ ᠪᠦᠬᠦᠢ ᠪᠠᠷ ᠬᠡᠪᠯᠡᠯ ᠪᠣᠯ ᠲᠦᠭᠡᠮᠡᠯ ᠡᠯᠪᠡᠭᠲᠦ ᠶᠢᠨ ᠵᠢᠷᠭᠤᠳᠤᠭᠠᠷ ᠣᠨ (1867 ) ᠳᠤ ᠬᠡᠪᠯᠡᠭᠦᠯᠦᠭᠰᠡᠨ ᠮᠣᠳᠣᠨ ᠪᠠᠷ ᠪᠣᠯᠣᠨ᠎ᠠ ᠃ ᠶᠠᠫᠤᠨ ᠣᠷᠴᠢᠭᠤᠯᠭ᠎ᠠ ᠶᠢᠨ ᠳᠡᠪᠲᠡᠷ ᠪᠣᠢ ᠃ 1991 ᠣᠨ ᠳᠤ ᠱᠠᠨ ᠰᠢ ᠮᠤᠵᠢ ᠶᠢᠨ ᠠᠷᠠᠳ ᠤᠨ ᠬᠡᠪᠯᠡᠯ ᠦᠨ ᠬᠣᠷᠢᠶ᠎ᠠ ᠵᠠᠩ ᠵᠧᠩ ᠮᠢᠩ ᠂ ᠰᠦᠩ ᠵᠢᠦᠢ ᠴᠧᠩ ᠦᠨ ᠴᠡᠭ ᠲᠡᠮᠲᠡᠭ ᠲᠠᠯᠪᠢᠭᠰᠠᠨ ᠬᠠᠷᠭᠤᠭᠤᠯᠤᠯ ᠲᠠᠶᠢᠯᠪᠤᠷᠢ ᠳᠡᠪᠲᠡᠷ ᠢ ᠬᠡᠪᠯᠡᠭᠦᠯᠪᠡ ᠃ ᠨᠠᠮᠶᠤᠨ ᠊ ᠪᠠᠨᠽᠠᠷᠬᠠᠴᠠ ᠮᠣᠩᠭᠣᠯᠴᠢᠯᠠᠵᠤ ᠂ 《 ᠮᠣᠩᠭᠣᠯ ᠤᠨ ᠬᠤᠰᠢᠭᠤ ᠨᠤᠲᠤᠭ ᠤᠨ ᠲᠡᠮᠲᠡᠭᠯᠡᠯ 》 ( ᠳᠡᠭᠡᠳᠦ ᠂ ᠳᠤᠮᠳᠠ ᠂ ᠳᠣᠣᠷᠠᠳᠤ ) ᠭᠡᠬᠦ ᠨᠡᠷ᠎ᠡ ᠪᠡᠷ 1988 ᠣᠨ ᠳᠤ ᠦᠨᠳᠦᠰᠦᠲᠡᠨ ᠦ ᠬᠡᠪᠯᠡᠯ ᠦᠨ ᠬᠣᠷᠢᠶ᠎ᠠ ᠠᠴᠠ ᠬᠡᠪᠯᠡᠭᠦᠯᠪᠡ ᠃