ᠵᠤᠬᠢᠶᠠᠭᠴᠢ:
ᠴᠠᠭ:2018-12-14
ᠥᠵᠡᠭᠰᠡᠨ : ℃
ᠢᠷᠡᠯᠲᠡ:
ᠮᠣᠩᠭᠣᠯ ᠬᠦᠮᠦᠨ ᠦ ᠦᠨᠡᠨᠴᠢ ᠬᠠᠨᠢ ᠬᠣᠲᠠᠴᠢ ᠨᠣᠬᠠᠢ
ᠡᠷᠲᠡ ᠢᠵᠠᠭᠤᠷ ᠤᠨ ᠬᠠᠳᠠᠨ ᠵᠢᠷᠤᠭ ᠤᠨ ᠰᠦᠷᠦᠭᠯᠡᠯ ᠂ ᠮᠣᠩᠭᠣᠯᠴᠤᠳ ᠤᠨ ᠶᠢᠰᠦᠨ ᠲᠡᠭᠷᠢ ᠶᠢᠨ ᠰᠢᠲᠦᠭᠡᠨ ᠂ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠲᠡᠦᠭᠡᠨ ᠤᠷᠲᠤ ᠡᠪᠬᠡᠮᠡᠯ ᠵᠡᠷᠭᠡ ᠳᠦ ᠨᠢᠭᠡᠨ ᠲᠥᠷᠥᠯ ᠦᠨ ᠠᠮᠢᠲᠠᠨ ᠮᠣᠩᠭᠣᠯ ᠬᠦᠮᠦᠨ ᠦ ᠰᠡᠭᠦᠳᠡᠷ ᠰᠢᠭ ᠳᠠᠭᠠᠯᠳᠤᠨ ᠶᠠᠪᠤᠵᠤ ᠪᠠᠶᠢᠬᠤ ᠨᠢ ᠢᠯᠡᠷᠡᠳᠡᠭ ᠃ ᠲᠡᠷᠡ ᠪᠣᠯ ᠮᠣᠩᠭᠣᠯᠴᠤᠳ ᠤᠨ ᠠᠮᠢᠳᠤᠷᠠᠯ ᠤᠨ ᠲᠣᠳᠤᠨᠤ ᠬᠠᠨᠢ ᠬᠣᠲᠠᠴᠢ ᠨᠣᠬᠠᠢ ᠪᠣᠯᠣᠨᠠ ᠃ ᠮᠣᠩᠭᠣᠯᠴᠤᠳ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢ ᠭᠠᠷᠰᠢᠭᠤᠯᠬᠤ ᠠᠴᠠ ᠬᠣᠯᠠ ᠡᠮᠦᠨᠡ ᠨᠣᠬᠠᠢ ᠶᠢ ᠭᠠᠷᠰᠢᠭᠤᠯᠤᠨ ᠲᠡᠵᠢᠭᠡᠵᠦ ᠭᠡᠷ ᠦᠨ ᠲᠡᠵᠢᠭᠡᠪᠦᠷᠢ ᠪᠡᠨ ᠪᠤᠯᠭᠠᠭᠰᠠᠨ ᠪᠠᠶᠢᠵᠠᠢ ᠃
ᠨᠣᠬᠠᠢ ᠶᠢᠨ ᠡᠪᠦᠭᠡ ᠳᠡᠭᠡᠳᠦᠰ ᠨᠢ ᠴᠢᠨ᠋ᠸᠠ ᠶᠢᠨ ᠲᠦᠷᠦᠯ ᠪᠣᠯᠬᠤ ᠬᠡᠭᠡᠷᠡ ᠶᠢᠨ ᠨᠣᠬᠠᠢ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠠᠮᠢᠳᠤ ᠪᠤᠳᠠᠰ ᠤᠨ ᠰᠣᠳᠣᠯᠭᠠᠲᠠᠳ ᠨᠢᠭᠡᠨᠲᠡ ᠰᠣᠳᠣᠯᠣᠨ ᠢᠯᠡᠷᠡᠭᠦᠯᠵᠠᠢ ᠃ ᠬᠠᠭᠤᠴᠢᠨ ᠴᠢᠯᠠᠭᠤᠨ ᠵᠡᠪᠰᠡᠭ ᠦᠨ ᠥᠶᠡ ᠳᠦ ᠬᠦᠮᠦᠨ ᠴᠢᠨ᠋ᠸᠠ ᠬᠣᠶᠠᠷ ᠴᠦᠮ ᠭᠠᠪᠰᠢᠭᠠᠢ ᠠᠩᠴᠢᠨ ᠪᠠᠶᠢᠭᠰᠠᠨ ᠪᠦᠭᠡᠳ ᠬᠠᠷᠢᠯᠴᠠᠨ ᠲᠦᠰᠢᠭᠯᠡᠬᠦ ᠪᠠᠶᠢᠭᠠᠯᠢ ᠶᠢᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠶᠢᠵᠠᠢ ᠃ ᠴᠢᠨ᠋ᠸᠠ ᠬᠡᠳᠦᠶᠢᠪᠡᠷ ᠪᠡᠶᠡ ᠪᠢᠯᠳᠠᠷ ᠢᠶᠠᠷ ᠪᠠᠭᠠ ᠪᠠᠶᠢᠭᠰᠠᠨ ᠴᠦ ᠲᠡᠳᠡᠭᠡᠷ ᠬᠡᠳᠡᠷ ᠲᠣᠭᠰᠢᠨ ᠠᠮᠢᠲᠠᠨ ᠤᠷᠤᠭᠤ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠯᠲᠠ ᠲᠠᠢ ᠂ ᠵᠣᠷᠢᠯᠭᠠ ᠲᠠᠢ ᠂ ᠪᠦᠯᠬᠦᠮᠳᠡᠯ ᠲᠠᠢ ᠳᠠᠭᠠᠷᠢᠯᠲᠠ ᠬᠢᠵᠦ ᠪᠠᠶᠢᠳᠠᠭ ᠵᠡᠷᠭᠡ ᠡᠴᠡ ᠨᠢ ᠠᠩᠴᠢᠳ ᠴᠢᠨ᠋ᠸᠠ ᠠᠴᠠ ᠣᠯᠠᠨ ᠵᠦᠢᠯ ᠦᠨ ᠠᠩ ᠠᠩᠨᠠᠬᠤ ᠠᠷᠭᠠ ᠰᠠᠮᠪᠠᠭᠠ ᠶᠢ ᠣᠯᠵᠤ ᠰᠤᠷᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠪᠠᠰᠠ ᠴᠢᠨ᠋ᠸᠠ ᠶᠢᠨ ᠦᠨᠦᠷᠯᠡᠬᠦ ᠂ ᠮᠦᠷᠳᠡᠬᠦ ᠳᠦ ᠪᠡᠨ ᠮᠠᠰᠢ ᠴᠢᠳᠠᠮᠠᠭᠠᠢ ᠪᠠᠶᠢᠳᠠᠭ ᠢ ᠠᠵᠢᠵᠤ ᠮᠡᠳᠡᠭᠡᠳ ᠠᠩ ᠠᠩᠨᠠᠬᠤ ᠳᠤ ᠪᠠᠨ ᠲᠤᠰᠠᠯᠠᠭᠴᠢ ᠪᠠᠨ ᠪᠤᠯᠭᠠᠬᠤ ᠠᠷᠭᠠ ᠵᠠᠮ ᠢ ᠬᠠᠶᠢᠵᠤ ᠡᠬᠢᠯᠡᠵᠡᠢ ᠃ ᠲᠡᠭᠡᠭᠡᠳ ᠬᠡᠭᠡᠷᠡ ᠶᠢᠨ ᠨᠣᠬᠠᠢ ᠶᠢᠨ ᠪᠡᠯᠲᠡᠷᠭᠡ ᠶᠢ ᠳᠠᠰᠬᠠᠨ ᠲᠡᠵᠢᠭᠡᠬᠦ ᠣᠷᠣᠯᠳᠤᠯᠭᠠ ᠬᠢᠭᠰᠡᠨ ᠨᠢ ᠬᠡᠭᠡᠷᠡ ᠶᠢᠨ ᠠᠮᠢᠲᠠᠨ ᠢ ᠭᠠᠷᠰᠢᠭᠤᠯᠬᠤ ᠠᠵᠢᠯᠯᠠᠭᠠ ᠶᠢᠨ ᠡᠬᠢᠯᠡᠯᠲᠡ ᠪᠣᠯᠪᠠ ᠃ ᠣᠯᠠᠨ ᠵᠠᠭᠤᠨ ᠵᠢᠯ ᠦᠨ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠰᠤᠩᠭᠤᠯᠲᠠ ᠬᠢᠬᠦ ᠪᠠᠷ ᠳᠠᠮᠵᠢᠭᠠᠳ ᠶᠠᠭᠤᠨ ᠤ ᠤᠷᠢᠳ ᠠᠪᠠ ᠶᠢᠨ ᠨᠣᠬᠠᠢ ᠶᠢᠨ ᠡᠭᠦᠯᠳᠡᠷ ᠢ ᠪᠣᠶᠢᠵᠢᠭᠤᠯᠤᠨ ᠭᠠᠷᠭᠠᠵᠤ ᠂ ᠳᠠᠷᠠᠭᠠ ᠨᠢ ᠬᠣᠨᠢ ᠢᠮᠠᠭᠠ ᠶᠢ ᠭᠠᠷᠰᠢᠭᠤᠯᠬᠤ ᠶᠢ ᠳᠠᠭᠠᠯᠳᠤᠨ ᠬᠣᠨᠢᠴᠢ ᠨᠣᠬᠠᠢ ᠂ ᠬᠣᠲᠠᠴᠢ ᠨᠣᠬᠠᠢ ᠶᠢ ᠰᠤᠷᠭᠠᠨ ᠳᠠᠰᠬᠠᠭᠰᠠᠨ ᠪᠠᠶᠢᠨᠠ ᠃
ᠨᠣᠬᠠᠢ ᠪᠣᠯ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠦ ᠦᠨᠡᠨᠴᠢ ᠰᠢᠳᠤᠷᠭᠤ ᠲᠣᠳᠤᠨᠤ ᠬᠠᠨᠢ ᠨᠢ ᠶᠤᠮ ᠃ ᠪᠠᠰᠠ ᠴᠦ ᠮᠣᠩᠭᠣᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠢᠷᠭᠡᠨᠰᠢᠯ ᠳᠦ 《 ᠨᠣᠬᠠᠢ 》 ᠭᠡᠬᠦ ᠦᠭᠡ ᠪᠡᠷ ᠠᠨᠳᠠ ᠨᠠᠶᠢᠵᠠ ᠶᠢᠨ ᠨᠦᠬᠦᠷᠯᠡᠯ ᠂ ᠡᠵᠡᠳ ᠰᠠᠶᠢᠳ ᠤᠨ ᠴᠢᠩ ᠦᠨᠡᠨᠴᠢ ᠂ ᠥᠨᠢᠳᠡ ᠬᠤᠪᠢᠷᠠᠰᠢ ᠦᠭᠡᠢ ᠢᠲᠡᠭᠡᠯ ᠵᠣᠷᠢᠭ ᠤᠨ ᠪᠡᠯᠭᠡ ᠲᠡᠮᠲᠡᠭ ᠪᠤᠯᠭᠠᠳᠠᠭ ᠃ ᠵᠢᠱᠢᠶᠡᠯᠡᠪᠡᠯ ᠄ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ ᠪᠠᠶᠢᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ ᠤᠯᠤᠰ ᠪᠠᠶᠢᠭᠤᠯᠬᠤ ᠳᠤ ᠵᠢᠳᠭᠥᠯ ᠦᠵᠡᠭᠦᠯᠦᠭᠰᠡᠨ ᠭᠠᠪᠢᠶᠠᠲᠤ ᠠᠨᠳᠠ ᠵᠡᠪᠡ ᠂ ᠰᠦᠪᠡᠭᠡᠳᠡᠢ ᠂ ᠵᠡᠯᠮᠡ ᠂ ᠬᠤᠪᠢᠯᠠᠢ ᠨᠠᠷ ᠢ ᠲᠥᠮᠡᠨ ᠦ ᠨᠣᠶᠠᠨ ᠂ ᠮᠢᠩᠭᠠᠨ ᠤ ᠨᠣᠶᠠᠨ ᠡᠷᠭᠦᠮᠵᠢᠯᠡᠵᠦ ᠂ 《 ᠳᠥᠷᠪᠡᠨ ᠨᠣᠬᠠᠢ 》 ᠬᠡᠮᠡᠨ ᠲᠣᠳᠣᠨᠣᠴᠢᠯᠠᠨ ᠳᠠᠭᠤᠳᠠᠭᠰᠠᠨ ᠪᠠᠶᠢᠨᠠ ᠃ ᠤᠴᠢᠷ ᠨᠢ ᠲᠡᠳᠡ ᠳᠥᠷᠪᠡ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠳᠤ ᠲᠤᠶᠢᠯ ᠤᠨ ᠥᠨᠡᠨᠴᠢ ᠰᠢᠳᠤᠷᠭᠤ ᠪᠠᠶᠢᠳᠠᠭ ᠮᠥᠷᠲᠡᠭᠡᠨ ᠬᠠᠨᠳᠤᠭᠰᠠᠨ ᠵᠦᠭ ᠲᠦ ᠪᠡᠨ ᠳᠠᠶᠢᠰᠤᠨ ᠦᠭᠡᠢ ᠡᠷᠡᠯᠬᠡᠭ ᠪᠠᠭᠠᠲᠤᠷᠯᠢᠭ ᠬᠦᠮᠦᠰ ᠂ ᠶᠡᠬᠡ ᠮᠣᠩᠭᠣᠯ ᠤᠨ ᠨᠢᠭᠡᠳᠦᠯ ᠳᠦ ᠪᠠᠯᠠᠷᠠᠰᠢ ᠦᠭᠡᠢ ᠭᠠᠪᠢᠶᠠ ᠵᠢᠳᠭᠥᠯ ᠦᠵᠡᠭᠦᠯᠦᠭᠰᠡᠨ ᠵᠠᠩᠵᠤᠨ ᠨᠠᠷ ᠪᠣᠯᠣᠨᠠ ᠃
ᠨᠣᠬᠠᠢ ᠪᠣᠯ ᠬᠠᠶᠢᠷᠠ ᠬᠣᠷᠣᠰᠣᠯ ᠮᠠᠰᠢ ᠲᠣᠳᠣᠷᠬᠠᠢ ᠠᠮᠢᠲᠠᠨ ᠶᠤᠮ ᠂ ᠲᠡᠷᠡ ᠨᠢ ᠡᠵᠡᠨ ᠳᠦ ᠪᠡᠨ ᠡᠶᠡᠯᠳᠡᠭ ᠨᠣᠮᠣᠬᠠᠨ ᠂ ᠥᠨᠡᠨᠴᠢ ᠰᠢᠳᠤᠷᠭᠤ ᠪᠠᠶᠢᠳᠠᠭ ᠴᠦ ᠳᠠᠶᠢᠰᠤᠨ ᠡᠲᠡᠭᠡᠳ ᠲᠦ ᠲᠤᠶᠢᠯ ᠤᠨ ᠠᠷᠲᠠᠭ ᠲᠣᠭᠰᠢᠨ ᠬᠠᠨᠳᠤᠳᠠᠭ ᠃ ᠢᠯᠠᠩᠭᠤᠶᠠ ᠡᠵᠡᠨ ᠪᠣᠯᠣᠨ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠶᠢᠨ ᠲᠥᠯᠥᠭᠡ ᠠᠮᠢ ᠪᠡᠶᠡ ᠪᠡᠨ ᠬᠠᠶᠢᠬᠤᠷᠤᠯ ᠦᠭᠡᠢ ᠲᠡᠮᠡᠴᠡᠳᠡᠭ ᠶᠤᠮ ᠃ ᠨᠣᠬᠠᠢ ᠬᠡᠵᠢᠶᠡᠳᠡ ᠡᠵᠡᠨ ᠡᠴᠡ ᠪᠡᠨ ᠳᠡᠷᠰᠯᠡᠳᠡᠭ ᠦᠭᠡᠢ ᠂ ᠡᠨᠡ ᠲᠤᠬᠠᠢ ᠡᠷᠲᠡᠨ ᠦ ᠨᠣᠮ ᠪᠢᠴᠢᠭ ᠲᠦ ᠄ 《 ᠨᠣᠬᠠᠢ ᠮᠡᠲᠦ ᠨᠦᠬᠦᠷ ᠢ ᠣᠯᠬᠤᠶᠠ ᠪᠡᠷᠬᠡ ᠂ ᠨᠣᠬᠠᠢ ᠠᠨᠤ ᠦᠭᠡᠭᠦᠦ ᠬᠦᠮᠦᠨ ᠳ᠋ᠤᠷ ᠲᠡᠵᠢᠭᠡᠭᠳᠡᠪᠡᠰᠦ ᠪᠠᠶᠠᠨ ᠬᠦᠮᠦᠨ ᠢ ᠥᠯᠥ ᠳᠠᠭᠠᠮᠤᠢ ᠃ ᠬᠠᠷᠠᠴᠤ ᠬᠦᠮᠦᠨ ᠳ᠋ᠤᠷ ᠠᠰᠠᠷᠠᠭᠳᠠᠪᠠᠰᠤ ᠬᠠᠭᠠᠨ ᠬᠦᠮᠦᠨ ᠢ ᠥᠯᠥ ᠳᠠᠠᠭᠠᠮᠤᠢ 》 ᠭᠡᠵᠦ ᠲᠡᠮᠲᠡᠭᠯᠡᠭᠰᠡᠨ ᠪᠠᠶᠢᠳᠠᠭ ᠃
ᠤᠯᠠᠮᠵᠢᠯᠠᠯᠲᠤ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠳᠤ ᠨᠣᠬᠠᠢ ᠶᠢ ᠬᠣᠶᠠᠷ ᠵᠦᠢᠯ ᠢᠶᠡᠷ ᠳᠠᠰᠬᠠᠨ ᠲᠡᠵᠢᠭᠡᠳᠡᠭ ᠃ ᠲᠡᠷᠡ ᠨᠢ ᠠᠪᠠ ᠶᠢᠨ ᠨᠣᠬᠠᠢ ᠪᠣᠯᠣᠨ ᠬᠣᠲᠠᠴᠢ ᠨᠣᠬᠠᠢ ᠪᠣᠯᠣᠨᠠ ᠃ ᠠᠪᠠ ᠶᠢᠨ ᠨᠣᠬᠠᠢ ᠶᠢᠨ ᠴᠡᠭᠡᠵᠢ ᠨᠢ ᠥᠷᠭᠡᠨ ᠂ ᠬᠥᠯ ᠨᠢ ᠤᠷᠲᠤ ᠂ ᠲᠠᠪᠠᠭ ᠨᠢ ᠪᠠᠭᠠ ᠂ ᠭᠦᠶᠦᠳᠡᠯ ᠰᠠᠶᠢᠲᠠᠢ ᠂ ᠬᠤᠷᠴᠠ ᠱᠠᠯᠠᠮᠠᠭᠠᠢ ᠳᠠᠭᠠᠷᠢᠯᠲᠠ ᠬᠢᠳᠡᠭ ᠃ ᠲᠠᠯᠠ ᠨᠤᠲᠤᠭ ᠲᠤ ᠨᠢᠭᠡᠨ ᠰᠠᠶᠢᠨ ᠠᠪᠠ ᠶᠢᠨ ᠨᠣᠬᠠᠢ ᠲᠠᠢ ᠪᠠᠶᠢᠬᠤ ᠨᠢ ᠠᠩᠴᠢᠨ ᠬᠦᠮᠦᠨ ᠦ ᠣᠮᠣᠭᠰᠢᠯ ᠶᠤᠮ ᠃ ᠡᠶᠢᠮᠦ ᠡᠴᠡ 《 ᠰᠠᠶᠢᠨ ᠠᠪᠠ ᠶᠢᠨ ᠨᠣᠬᠠᠢ ᠶᠢ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠪᠠᠷ ᠰᠣᠯᠢᠳᠠᠭ ᠦᠭᠡᠢ 》 ᠭᠡᠳᠡᠭ ᠃ ᠬᠣᠲᠠᠴᠢ ᠨᠣᠬᠠᠢ ᠶᠢᠨ ᠰᠣᠨᠣᠷ ᠰᠠᠶᠢᠨ ᠂ ᠰᠡᠷᠡᠮᠵᠢ ᠥᠨᠳᠥᠷ ᠂ ᠡᠩ ᠦᠨ ᠥᠶᠡ ᠳᠦ ᠬᠣᠨᠢᠨ ᠰᠥᠷᠥᠭ ᠦᠨ ᠢᠶᠡᠨ ᠬᠠᠵᠠᠭᠤ ᠬᠠᠪᠢ ᠪᠠᠷ ᠪᠠᠶᠢᠵᠤ ᠂ ᠨᠡᠩ ᠴᠦ ᠴᠠᠰᠤ ᠰᠢᠭᠤᠷᠭᠠᠨ ᠲᠠᠢ ᠡᠪᠦᠯ ᠦᠨ ᠥᠳᠡᠰᠢ ᠪᠣᠯᠪᠠᠯ ᠳᠡᠭᠡᠳᠦ ᠬᠡᠮᠵᠢᠶᠡᠨ ᠦ ᠰᠣᠨᠣᠷ ᠰᠡᠷᠡᠮᠵᠢ ᠪᠡᠷ ᠬᠣᠨᠢᠨ ᠰᠥᠷᠥᠭ ᠢᠶᠡᠨ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠳᠠᠭ ᠃ ᠡᠶᠢᠮᠦ ᠡᠴᠡ ᠮᠣᠩᠭᠣᠯᠴᠤᠳ 《 ᠨᠣᠬᠠᠢ ᠰᠠᠶᠢᠲᠤ ᠶᠢᠨ ᠬᠣᠲᠠ ᠪᠠᠷᠳᠠᠮ 》 ᠭᠡᠵᠦ ᠬᠡᠯᠡᠯᠴᠡᠳᠡᠭ ᠃
ᠮᠣᠩᠭᠣᠯᠴᠤᠳ ᠨᠣᠬᠠᠢ ᠲᠡᠵᠢᠭᠡᠬᠦ ᠳᠦ ᠲᠥᠷᠥᠯ ᠵᠦᠢᠯ ᠪᠣᠯᠣᠨ ᠤᠳᠤᠮ ᠤᠭᠰᠠᠭᠠ ᠶᠢ ᠨᠢ ᠮᠠᠰᠢ ᠠᠩᠬᠠᠷᠳᠠᠭ ᠃ ᠮᠠᠯᠴᠢᠳ ᠶᠡᠷᠦ ᠳᠦ ᠪᠡᠨ ᠬᠠᠷᠠ ᠨᠣᠬᠠᠢ ᠲᠡᠵᠢᠭᠡᠬᠦ ᠳᠤᠷᠠᠲᠠᠢ ᠮᠥᠷᠲᠡᠭᠡᠨ 《 ᠳᠥᠷᠪᠡᠨ ᠨᠢᠳᠦ ᠲᠠᠢ ᠨᠣᠬᠠᠢ 》 ᠶᠢ ᠮᠠᠰᠢ ᠪᠠᠬᠠᠷᠬᠠᠳᠠᠭ ᠂ ᠲᠡᠳᠡᠨ ᠦ ᠦᠵᠡᠬᠦ ᠪᠡᠷ ᠡᠶᠢᠮᠦ ᠨᠣᠬᠠᠢ ᠶᠢᠨ ᠬᠠᠷᠠᠭᠠᠨ ᠰᠡᠷᠡᠯ ᠰᠠᠶᠢᠨ ᠂ ᠡᠵᠡᠨ ᠳᠦ ᠪᠡᠨ ᠦᠨᠡᠨᠴᠢ ᠂ ᠮᠠᠯ ᠳᠤ ᠡᠭᠡᠯᠢᠲᠡᠢ ᠭᠡᠵᠦ ᠦᠵᠡᠳᠡᠭ ᠃ ᠬᠠᠷᠢᠨ ᠴᠢᠨ᠋ᠸᠠ ᠰᠢᠭ᠋ ᠣᠯᠢᠳᠠᠭ ᠨᠣᠬᠠᠢ ᠶᠢ ᠮᠠᠯ ᠰᠦᠷᠦᠭ ᠲᠦ ᠪᠡᠯᠭᠡ ᠳᠡᠮᠪᠡᠷᠢᠯ ᠦᠭᠡᠢ ᠬᠡᠮᠡᠨ ᠦᠵᠡᠵᠦ ᠲᠡᠵᠢᠭᠡᠬᠦ ᠶᠢ ᠮᠠᠰᠢ ᠴᠡᠭᠡᠷᠯᠡᠳᠡᠭ ᠃
ᠮᠣᠩᠭᠣᠯᠴᠤᠳ ᠠᠳᠤᠭᠤ ᠮᠠᠯ ᠢᠶᠠᠨ ᠥᠬᠥᠭᠡᠷᠳᠡᠨ ᠬᠠᠶᠢᠷᠠᠯᠠᠵᠤ ᠨᠡᠷᠡᠯᠡᠨ ᠳᠠᠭᠤᠳᠠᠳᠠᠭ ᠲᠠᠢ ᠪᠠᠨ ᠠᠳᠠᠯᠢ ᠨᠣᠬᠠᠢ ᠳᠤ ᠪᠠᠨ ᠴᠦ ᠪᠡᠯᠭᠡ ᠳᠡᠮᠪᠡᠷᠢᠯ ᠲᠠᠢ ᠰᠠᠶᠢᠬᠠᠨ ᠨᠡᠷᠡ ᠥᠭᠳᠡᠭ ᠂ ᠵᠢᠱᠢᠶᠡᠯᠡᠪᠡᠯ ᠠᠷᠰᠯᠠᠨ ᠂ ᠪᠥᠷᠭᠥᠳ ᠂ ᠬᠠᠷᠴᠠᠭᠠᠢ ᠂ ᠪᠠᠮᠪᠠᠷ ᠭᠡᠬᠦ ᠮᠡᠲᠦ ᠃
ᠮᠣᠷᠢ ᠲᠠᠢ ᠬᠦᠮᠦᠨ ᠮᠠᠯᠴᠢᠨ ᠠᠶᠢᠯ ᠤᠨ ᠮᠣᠷᠢᠨ ᠦ ᠤᠶᠠᠭᠠ ᠶᠢᠨ ᠳᠡᠷᠭᠡᠲᠡ ᠢᠷᠡᠭᠡᠳ ᠬᠠᠮᠤᠭ ᠦᠨ ᠤᠷᠢᠳᠠᠪᠠᠷ ᠵᠠᠪᠠᠯ 《 ᠨᠣᠬᠠᠢ ᠪᠠᠨ ᠬᠣᠷᠢᠭᠠᠷᠠᠢ 》 ᠭᠡᠵᠦ ᠬᠠᠰᠬᠢᠷᠳᠠᠭ ᠂ ᠬᠡᠷᠪᠡ ᠬᠠᠰᠬᠢᠷᠬᠤ ᠦᠭᠡᠢ ᠰᠢᠭᠤᠳ ᠭᠡᠷ ᠲᠦ ᠨᠢ ᠣᠷᠣᠪᠠᠯ ᠭᠡᠷ ᠲᠠᠬᠢ ᠬᠦᠮᠦᠰ ᠲᠡᠭᠦᠨ ᠢ 《 ᠬᠤᠯᠠᠭᠠᠶᠢᠴᠢ 》 ᠬᠡᠮᠡᠨ ᠡᠨᠳᠡᠭᠦᠦ ᠣᠶᠢᠯᠠᠭᠠᠵᠤ ᠮᠡᠳᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠨᠣᠬᠠᠢ ᠳᠤ ᠲᠠᠭᠤᠭᠳᠠᠭᠰᠠᠨ ᠬᠦᠮᠦᠨ ᠢ ᠠᠶᠢᠯ ᠬᠣᠲᠠ ᠶᠢ ᠦᠢᠮᠡᠯᠳᠦᠭᠦᠯᠴᠢᠬᠡᠯᠡ ᠭᠡᠳ ᠬᠦᠮᠦᠰ ᠳᠤᠷᠠ ᠦᠭᠡᠶᠢᠴᠡᠳᠡᠭ ᠪᠠᠶᠢᠨᠠ ᠃
ᠮᠣᠩᠭᠣᠯᠴᠤᠳ ᠤᠨ ᠵᠠᠩ ᠵᠠᠩᠰᠢᠯ ᠳᠤ ᠨᠣᠬᠠᠢ ᠶᠢᠨ ᠲᠤᠬᠠᠢ ᠴᠡᠭᠡᠷ ᠶᠣᠰᠣᠨ ᠨᠡᠯᠢᠶᠡᠳ ᠣᠯᠠᠨ ᠪᠠᠶᠢᠳᠠᠭ ᠃ ᠵᠢᠱᠢᠶᠡᠯᠡᠪᠡᠯ ᠄ ᠨᠣᠬᠠᠢ ᠶᠢ ᠠᠯᠠᠳᠠᠭ ᠦᠭᠡᠢ ᠂ ᠮᠢᠬᠠ ᠶᠢ ᠨᠢ ᠢᠳᠡᠳᠡᠭ ᠦᠭᠡᠢ ᠂ ᠬᠡᠦᠬᠡᠳ ᠦᠳ ᠨᠣᠬᠠᠢ ᠤᠨᠤᠵᠤ ᠨᠠᠭᠠᠳᠤᠳᠠᠭ ᠦᠭᠡᠢ ᠂ ᠨᠣᠬᠠᠢ ᠶᠢᠨ ᠢᠳᠡᠭᠥᠷ ᠳᠡᠭᠡᠭᠦᠷ ᠠᠯᠬᠤᠵᠤ ᠭᠠᠷᠬᠤ ᠪᠤᠶᠤ ᠬᠦᠮᠦᠷᠢᠵᠦ ᠲᠠᠯᠪᠢᠬᠤ ᠶᠢ ᠣᠨᠴᠠ ᠴᠡᠭᠡᠷᠯᠡᠳᠡᠭ ᠃
ᠮᠠᠯᠴᠢᠳ ᠲᠤ ᠠᠪᠴᠤ ᠬᠡᠯᠡᠪᠡᠯ ᠨᠣᠬᠠᠢ ᠪᠠᠨ ᠠᠯᠳᠠᠬᠤ ᠨᠢ ᠮᠠᠰᠢ ᠶᠡᠬᠡ ᠭᠠᠰᠠᠯᠠᠩᠲᠤ ᠶᠠᠪᠤᠳᠠᠯ ᠪᠣᠯᠣᠨᠠ ᠃ ᠮᠣᠩᠭᠣᠯᠴᠤᠳ ᠨᠣᠬᠠᠢ ᠨᠢ ᠦᠬᠦᠪᠡᠯ ᠰᠡᠭᠦᠯ ᠢ ᠨᠢ ᠲᠠᠭᠠᠷᠢᠬᠤ ᠂ ᠠᠮᠠᠨ ᠳᠤ ᠨᠢ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ ᠰᠢᠷᠠ ᠲᠣᠰᠣ ᠲᠠᠢ ᠬᠢᠵᠦ ᠣᠷᠣᠰᠢᠭᠤᠯᠳᠠᠭ ᠂ ᠡᠨᠡ ᠨᠢ ᠳᠠᠷᠠᠭᠠ ᠲᠦᠷᠦᠯ ᠳᠦ ᠪᠡᠨ ᠬᠦᠮᠦᠨ ᠪᠣᠯᠵᠤ ᠲᠦᠷᠦᠬᠦ ᠶᠢ ᠨᠢ ᠪᠡᠯᠭᠡᠳᠡᠵᠦ ᠪᠠᠶᠢᠬᠤ ᠶᠤᠮ ᠭᠡᠨᠡ ᠃
