ᠬᠦᠬᠡᠬᠤᠳᠠ  ᠶᠢᠨ 2018 ᠤᠨ  ᠤ 4 ᠳ᠋ᠣᠭᠡᠷ ᠰᠠᠷ᠎ᠠ  ᠶᠢᠨ 2 ᠤᠨ ᠡᠳᠦᠷ  ᠤᠨ ᠴᠠᠬᠢᠯᠭᠠᠨ ᠮᠡᠳᠡᠬᠡ   ᠨᠠᠷᠠᠨᠳᠤᠶᠠᠭ᠎ᠠ ᠪᠣᠯ ᠦᠪᠦᠷ ᠮᠣᠩᠭᠣᠯ ‍ᠤᠨ ᠥᠪᠡᠷᠲᠡᠬᠡᠨ ᠵᠠᠰᠠᠬᠤ ᠤᠷᠤᠨ ᠤ ᠰᠢᠯᠢᠩᠬᠤᠲᠠ ᠶᠢᠨ ᠪᠤᠯᠠᠭᠠᠨ ᠰᠤᠮᠤᠨ ‍ᠤ ᠪᠠᠶᠠᠨᠳᠡᠯᠭᠡᠷ ᠭᠠᠴᠠᠭᠠᠨ ‍ᠤ ᠮᠠᠯᠴᠢᠨ ᠪᠦᠰᠡᠭᠦᠢ ᠶᠤᠮ᠃ ᠰᠡᠬᠦᠯ ᠤᠨ ᠦᠶ᠎ᠠ ᠳᠤ ᠲᠡᠷᠡᠪᠡᠷ ᠳᠡᠭᠡᠰᠦᠨ ᠰᠤᠶᠤᠯ ‍ᠤᠨ ᠬᠤᠯᠪᠤᠭ᠎ᠠ  ᠪᠠᠶᠢᠭᠤᠯᠵᠦ ᠂ ᠤᠯᠠᠨ ᠤᠷᠠᠴᠤᠳ ‍ᠢ ᠵᠤᠯᠭᠠᠭᠤᠯᠤᠭᠠᠳ ᠤᠯᠠᠮᠵᠢᠯᠠᠯᠳᠦ ᠭᠠᠷ ᠤᠷᠠᠯᠠᠯ ‍ᠤᠨ ᠰᠤᠶᠤᠯ ᠢᠶᠡᠨ ᠤᠯᠠᠮᠵᠢᠯᠠᠨ ᠪᠠᠳᠠᠷᠠᠭᠤᠯᠵᠦ ᠶᠠᠪᠤᠨ᠎ᠠ᠃

   ᠨᠠᠷᠠᠨᠳᠤᠶᠠᠭ᠎ᠠ ᠬᠡᠳᠦᠶᠢᠪᠡᠷ  ᠲᠠᠪᠢᠨ ᠨᠠᠰᠤ ᠬᠦᠷᠴᠦ ᠪᠠᠶᠢᠭ᠎ᠠ ᠪᠤᠯᠪᠠᠴᠦ᠂ ᠬᠠᠷᠠᠬᠠᠨ ᠪᠠᠭ᠎ᠠ ᠡᠴᠠ ᠪᠠᠨ ᠳᠡᠭᠡᠰᠦ ᠬᠢᠯᠭᠠᠰᠦ ᠶ᠋ᠢᠨ ᠤᠷᠠᠯᠠᠯ ᠰᠠᠶᠢᠨ ᠤᠷᠤᠯᠳᠤᠳᠠᠭ ᠡᠮᠡᠭᠡ ᠡᠵᠢ ᠪᠤᠯᠤᠨ ᠡᠵᠢ ᠶᠢᠨ ᠢᠶᠡᠨ ᠨᠦᠯᠦᠭᠡᠯᠡᠯ ᠪᠠ ᠦᠪᠡᠷ ‍ᠤᠨ ᠳᠤᠷ᠎ᠠ ᠪᠠᠬ᠎ᠠ ᠳ᠋ᠠᠭᠠᠨ ᠭᠦᠳᠦᠯᠦᠭᠳᠡᠨ᠂ ᠬᠢᠯᠭᠠᠰᠦ ᠨᠤᠤᠰᠦ ᠵᠤᠯᠠᠬᠤ ᠡᠴᠠ ᠠᠪᠤᠭᠠᠳ ᠮᠤᠩ᠋ᠭᠤᠯ ᠭᠡᠷ ‍ᠤᠨ ᠤᠭᠤᠰᠤᠷ ᠪᠦᠰᠡᠯᠡᠭᠦᠷ ᠲᠠᠮᠤᠵᠦ ᠬᠢᠬᠦ᠂ ᠡᠮᠡᠭᠡᠯ ‍ᠤᠨ ᠤᠯᠤᠩ ᠵᠢᠷᠢᠮ᠂ ᠨᠤᠬᠳᠦ ᠪᠤᠷᠠᠨᠳᠠᠭ ᠲᠠᠮᠤᠵᠦ ᠤᠶᠤᠬᠤ ᠵᠡᠷᠭᠡ ᠤᠯᠠᠮᠵᠢᠯᠠᠯᠳᠦ ᠳᠡᠭᠡᠰᠦᠨ ᠦᠢᠯᠡ ᠶ᠋ᠢ ᠪᠦᠷ ᠡᠵᠡᠮᠰᠢᠵᠦ ᠠᠪᠴᠠᠢ᠃ ᠲᠡᠷᠠ ᠳᠡᠭᠡᠰᠦᠨ ᠦᠢᠯᠠ ᠶ᠋ᠢ ᠰᠠᠶᠢᠬᠠᠨ ᠬᠢᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠢᠰᠡᠭᠡᠢ ᠰᠢᠷᠢᠮᠡᠯ᠂ ᠳᠡᠪᠡᠯ  ᠤᠶᠤᠬᠤ ᠳ᠋ᠠᠭᠠᠨ ᠴᠦ ᠰᠠᠶᠢᠨ ᠪᠠᠶᠢᠳᠠᠭ᠃

ᠳᠡᠭᠡᠰᠦᠨ ᠰᠤᠶᠤᠯ ‍ᠤᠨ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠤᠬᠰᠡᠨ ᠳᠤᠬᠠᠢ ᠪᠠᠨ ᠲᠡᠷᠡᠪᠡᠷ᠄ ᠦᠪᠡᠷ ᠢᠶᠡᠨ ᠳᠡᠭᠡᠰᠦᠨ ᠦᠢᠯᠠ᠂ ᠢᠰᠡᠭᠡᠢ ᠰᠢᠷᠡᠮᠡᠯ᠂ ᠤᠶᠤᠳᠠᠯ ᠬᠢᠳᠡᠯ ᠳ᠋ᠥ ᠶᠡᠬᠡ ᠳᠤᠷ᠎ᠠ ᠲᠠᠢ᠂ ᠢᠩᠭᠢᠭᠡᠳ ᠭᠠᠬᠴᠠᠭᠠᠷ ᠭᠡᠷ ᠲᠡᠭᠡᠨ ᠤᠶᠤᠵᠦ ᠬᠢᠭᠡᠳ ᠰᠠᠭᠤᠬᠤ ᠪᠠᠷ ᠳᠡᠭᠡᠰᠦᠨ ᠰᠤᠶᠤᠯ ‍ᠤᠨ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠤᠭᠠᠳ ᠪᠦᠳᠦᠭᠡᠯ ᠢᠶᠡᠨ ᠳᠡᠯᠭᠡᠵᠤ᠂ ᠬᠠᠷᠢᠯᠴᠠᠨ ᠰᠤᠷᠤᠯᠴᠠᠵᠦ᠂ ᠤᠯᠠᠮᠵᠢᠯᠠᠯᠳᠤ ᠰᠤᠶᠤᠯ ᠤᠷᠠᠯᠠᠯ ᠢᠶᠡᠨ ᠦᠷᠭᠡᠨ ᠢᠶᠡᠷ ᠤᠬᠠᠭᠤᠯᠵᠦ᠂ ᠬᠦᠭ᠍ᠵᠢᠭᠦᠯᠦᠨ ᠲᠦᠭᠡᠮᠡᠯᠵᠢᠭᠦᠯᠵᠦ᠂ ᠦᠷ᠎ᠠ ᠬᠤᠶᠢᠴᠢᠰ ᠲᠠᠭᠠᠨ ᠤᠯᠠᠮᠵᠢᠯᠠᠨ ᠦᠯᠡᠳᠡᠭᠡᠶ᠎ᠠ ᠭᠡᠵᠦ ᠪᠤᠳᠤᠬᠰᠡᠨ ᠶᠤᠮ᠃ ᠲᠡᠭᠡᠭᠡᠳ ᠦᠨᠦ ᠵᠢᠯ ‍ᠤᠨ 3 ᠰᠠᠷ᠎ᠠ ᠶ᠋ᠢᠨ ᠳᠤᠮᠳᠠᠴᠢ ᠪᠠᠷ ᠲᠤᠰ ᠬᠤᠯᠪᠤᠭ᠎ᠠ ᠶ᠋ᠢ ᠪᠠᠶᠢᠭᠤᠯᠤᠬᠰᠡᠨ᠂ ᠰᠠᠨᠠᠬᠰᠡᠨ ᠡᠴᠠ ᠭᠠᠳᠠᠭᠤᠷ ᠮᠠᠨ ‍ᠤ ᠠᠶᠢᠮᠠᠭ ‍ᠤᠨ ᠡᠯ᠎ᠠ ᠬᠤᠰᠢᠭᠤᠨ ᠤ ᠭᠠᠷ ᠤᠷᠠᠴᠤᠤᠯ ᠡᠴᠠ ᠭᠠᠳᠠᠨ᠎ᠠ ᠠᠯᠠᠱᠠ᠂ ᠪᠠᠶᠠᠨᠨᠠᠭᠤᠷ᠂ ᠬᠦᠯᠦᠨ ᠪᠤᠶᠢᠷ᠂ ᠲᠦᠩᠯᠢᠶᠤᠤ᠂ ᠤᠯᠠᠭᠠᠨᠬᠠᠳᠠ ᠵᠡᠷᠭᠡ ᠤᠷᠤᠨ ᠳᠠᠶᠠᠭᠠᠷ ᠤᠨ ᠳᠡᠭᠡᠰᠦ᠂ ᠢᠰᠡᠭᠡᠢ ᠰᠢᠷᠢᠮᠡᠯᠴᠢᠨ᠂ ᠮᠠᠯ ‍ᠤᠨ ᠡᠪᠡᠷ᠂ ᠶᠠᠰᠤᠨ ᠰᠡᠶᠢᠯᠪᠦᠷᠢᠴᠢᠨ᠂  ᠭᠡᠷ᠂ ᠮᠤᠳᠤᠨ ᠲᠡᠷᠭᠡ᠂ ᠡᠮᠡᠭᠡᠯ᠂ ᠨᠤᠬᠳᠦ ᠬᠢᠳᠡᠭ ᠮᠤᠳᠤᠨ ᠡᠳ᠋ᠯᠡᠯ᠂ ᠰᠤᠷ ᠡᠳ᠋ᠯᠡᠯ ‍ᠤᠨ ᠤᠷᠠᠴᠤᠳ ᠪᠠ  ᠬᠤᠪᠴᠠᠰᠦ ᠵᠠᠰᠠᠯ ‍ᠤᠨ ᠤᠶᠤᠳᠠᠯᠴᠢᠨ ᠵᠡᠷᠭᠡ ᠮᠤᠩ᠋ᠭᠤᠯ ᠰᠤᠶᠤᠯ᠂ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ᠂ ᠵᠠᠩ ᠦᠢᠯᠠ ᠳ᠋ᠥ ᠬᠤᠯᠪᠤᠬᠳᠠᠬᠤ ᠤᠯᠠᠨ ᠵᠦᠢᠯ ‍ᠢ ᠬᠢᠳᠡᠭ ᠡᠯ᠎ᠠ ᠨᠤᠳᠤᠭ ‍ᠤᠨ ᠤᠷᠠᠴᠤᠳ ᠤᠷᠤᠯᠴᠠᠵᠤ ᠶᠡᠬᠡ ᠬᠦᠭ᠍ᠵᠢᠶᠡᠨ ᠲᠠᠢ ᠪᠠᠶᠢᠨ᠎ᠠ   ᠭᠡᠵᠦ ᠪᠠᠶᠠᠷᠯᠠᠨ ᠶᠡᠷᠢᠨ᠎ᠠ᠃

ᠤᠳᠤᠬᠠᠨ ᠳᠤ᠂ ᠳᠡᠭᠡᠰᠦᠨ ᠰᠤᠶᠤᠯ ‍ᠤᠨ ᠬᠤᠯᠪᠤᠭ᠎ᠠ ᠳ᠋ᠥ ᠤᠯᠠᠨ ᠭᠠᠵᠠᠷ ‍ᠤᠨ ᠵᠠᠯᠠᠭᠤ᠂ ᠢᠳᠡᠷ᠂ ᠦᠳᠡᠯᠦᠭᠡ ᠨᠠᠰᠤᠨ ‍ᠤ ᠭᠤᠷᠪᠠᠨ ᠦᠶ᠎ᠠ ᠶ᠋ᠢᠨ ᠤᠷᠠᠴᠤᠳ ᠦᠪᠡᠷ ᠦᠪᠡᠷᠰᠡᠳ ‍ᠤᠨ ᠢᠶᠡᠨ ᠤᠷᠠᠯᠠᠵᠦ ᠪᠦᠳᠦᠭᠡᠭ᠍ᠰᠡᠨ  ᠭᠡᠷ ‍ᠤᠨ ᠤᠭᠤᠰᠤᠷ ᠪᠦᠰᠡᠯᠡᠭᠦᠷ᠂ ᠲᠤᠭᠤᠷᠢᠭᠤᠯᠭ᠎ᠠ ᠰᠢᠷᠢᠳᠡᠭ᠂ ᠪᠤᠬᠴᠦ ᠰᠠᠪᠠ᠂ ᠡᠪᠡᠷ᠂ ᠶᠠᠰᠤᠨ ᠰᠡᠶᠢᠯᠤᠮᠡᠯ ᠤᠷᠠᠯᠠᠯ᠂ ᠰᠤᠷ ᠡᠳ᠋ᠯᠡᠯ ᠂  ᠭᠡᠷ ᠂ ᠮᠤᠳᠤᠨ ᠲᠡᠷᠭᠡ ᠵᠡᠷᠭᠡ ᠪᠦᠳᠦᠭᠡᠯ ᠢᠶᠡᠨ ᠬᠢᠬᠦ ᠡᠴᠠ ᠭᠠᠳᠠᠨ᠎ᠠ ᠳᠡᠯᠭᠡᠨ ᠦᠵᠡᠭᠦᠯᠵᠦ᠂ ᠰᠠᠨᠠᠭ᠎ᠠ ᠪᠤᠳᠤᠯ ᠢᠶᠡᠨ ᠰᠤᠯᠢᠯᠴᠠᠵᠤ᠂ ᠬᠠᠷᠢᠯᠴᠠᠨ ᠤᠷᠮ᠎ᠠ ᠵᠤᠷᠢᠭ ᠬᠠᠶᠢᠷᠠᠯᠠᠨ ᠵᠤᠷᠢᠬᠵᠢᠭᠤᠯᠵᠦ ᠶᠠᠪᠤᠵᠠᠭᠠᠨ᠎ᠠ᠃ ᠲᠤᠰ ᠬᠤᠯᠪᠤᠭᠠᠨ ‍ᠤ ᠭᠡᠰᠢᠭᠦᠨ ᠪᠤᠯᠬᠤ ᠠᠪᠠᠭ᠎ᠠ ᠬᠤᠰᠢᠭᠤ ᠪᠠᠷ ᠨᠤᠳᠤᠭ ᠲᠠᠢ ᠮᠠᠯᠴᠢᠨ ᠠᠯᠳᠠᠨᠴᠡᠴᠡᠭ᠄ ᠲᠤᠰ ᠬᠤᠯᠪᠤᠭ᠎ᠠ ᠶ᠋ᠢ ᠰᠡᠳᠦᠵᠦ ᠪᠠᠶᠢᠭᠤᠯᠤᠬᠰᠡᠨ ᠨᠠᠷᠠᠨᠳᠤᠶᠠᠭ᠎ᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠵᠦ ᠪᠠᠶᠢᠨ᠎ᠠ᠃ ᠡᠶᠢᠮᠦ ᠰᠠᠶᠢᠬᠠᠨ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠵᠦ᠂ ᠤᠯᠠᠮᠵᠢᠯᠠᠯᠳᠦ ᠦᠢᠯᠡ ᠤᠷᠠᠯᠠᠯ ᠳ᠋ᠠᠭᠠᠨ ᠬᠠᠶᠢᠷ᠎ᠠ ᠪᠠᠬ᠎ᠠ ᠲᠠᠢ᠂ ᠰᠠᠨᠠᠭ᠎ᠠ ᠤᠨᠤᠭ᠎ᠠ ᠨᠢᠭᠡ ᠲᠠᠢ ᠨᠤᠳᠤᠭ ᠨᠤᠲᠤᠭ ‍ᠤᠨ ᠤᠷᠠᠴᠤᠳ ‍ᠢ ᠵᠤᠯᠭᠠᠭᠤᠯᠵᠤ᠂ ᠬᠠᠷᠢᠯᠴᠠᠨ ᠰᠤᠷᠤᠯᠴᠠᠬᠤ ᠰᠠᠶᠢᠬᠠᠨ ᠳᠤᠬᠢᠶᠠᠯ ᠤᠯᠭᠤᠯ᠎ᠠ᠃ ᠮᠠᠨ ‍ᠤ ᠭᠡᠷ ᠢᠶᠡᠷ ᠢᠶᠡᠨ ᠳᠡᠭᠡᠰᠦ᠂ ᠢᠰᠡᠭᠡᠢ᠂  ᠤᠶᠤᠳᠠᠯ᠂ ᠶᠠᠰᠤ᠂ ᠰᠤᠷ᠂ ᠮᠤᠳᠤᠨ ᠦᠢᠯᠡ ᠤᠷᠠᠯᠠᠯ ‍ᠤᠨ ᠪᠦᠳᠦᠭᠡᠭ᠍ᠳᠡᠭᠦᠨ ᠤᠷᠤᠯᠳᠤᠳᠠᠭ ᠶᠤᠮ᠂ ᠤᠳᠤ ᠡᠨᠡᠬᠦ ᠬᠤᠯᠪᠤᠭ᠎ᠠ ᠪᠠᠷ ᠳᠠᠮᠵᠢᠨ ᠤᠷᠠᠯᠠᠯ ᠪᠦᠳᠦᠭᠡᠯ ᠢᠶᠡᠨ ᠳᠡᠯᠭᠡᠨ᠂ ᠤᠯᠠᠮ ᠵᠤᠷᠢᠬᠵᠢᠵᠤ ᠡᠳᠦᠷᠵᠢᠨ ᠪᠠᠶᠠᠷ ᠲᠠᠢ ᠪᠠᠶᠢᠨ᠎ᠠ  ᠭᠡᠯ᠎ᠠ᠃

ᠴᠤᠪᠤᠵᠦ ᠶᠠᠪᠤᠬᠰᠡᠨ ᠪᠠᠷᠰ ᠡᠴᠠ ᠴᠤᠬᠯᠠᠷᠠᠵᠦ ᠰᠠᠭᠤᠬᠰᠡᠨ ᠱᠠᠭᠠᠵᠠᠭᠠᠢ ᠳᠡᠭᠡᠷ᠎ᠡ  ᠭᠡᠳᠡᠭ ᠢᠶᠡᠷ ᠳᠡᠭᠡᠰᠦᠨ ᠰᠤᠶᠤᠯ ‍ᠤᠨ ᠬᠤᠯᠪᠤᠭ᠎ᠠ ᠨᠢ ᠤᠯᠠᠮᠵᠢᠯᠠᠯᠳᠦ ᠦᠪ ᠰᠤᠶᠤᠯ ᠢᠶᠡᠨ ᠦᠪᠯᠡᠨ ᠤᠯᠠᠮᠵᠢᠯᠠᠵᠦ ᠶᠠᠪᠤᠭ᠎ᠠ ᠦᠷᠭᠡᠨ ᠤᠯᠠᠨ ᠭᠠᠷ ᠤᠷᠠᠴᠤᠳ ᠢᠶᠡᠨ ᠨᠢᠭᠡ ᠬᠤᠯᠪᠤᠭᠠᠨ ᠳ᠋ᠥ ᠴᠤᠬᠯᠠᠭᠤᠯᠵᠤ᠂ ᠭᠠᠷ ᠤᠷᠠᠯᠠᠯ ‍ᠤᠨ ᠪᠦᠳᠦᠭᠡᠯ ᠢᠶᠡᠨ ᠳᠡᠯᠭᠡᠨ᠂ ᠬᠠᠷᠢᠯᠴᠠᠨ ᠰᠤᠷᠤᠯᠴᠠᠬᠤ ᠰᠠᠶᠢᠬᠠᠨ ᠳᠠᠪᠴᠠᠩ ᠬᠠᠩ᠋ᠭᠠᠬᠰᠠᠨ ᠢᠶᠡᠷ ᠮᠤᠩ᠋ᠭᠤᠯ ᠦᠨᠳᠦᠰᠦᠳᠡᠨ ‍ᠤ ᠤᠯᠠᠨ ᠰᠠᠶᠢᠬᠠᠨ ᠦᠢᠯᠡ ᠤᠷᠠᠯᠠᠯ᠂ ᠮᠡᠳᠡᠯᠭᠡ ᠮᠡᠷᠭᠡᠵᠢᠯ ‍ᠢ ᠦᠪᠯᠡᠨ ᠤᠯᠠᠮᠵᠢᠯᠠᠯᠵᠦ᠂ ᠬᠦᠭ᠍ᠵᠢᠭᠦᠯᠦᠨ ᠳᠡᠯᠭᠡᠷᠡᠭᠦᠯᠬᠦ ᠳ᠋ᠥ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠭᠦᠯᠵᠦ ᠪᠠᠶᠢᠨ᠎ᠠ᠃

ᠬᠤᠶᠢᠰᠢᠳᠠ ᠶ᠋ᠢᠨ ᠠᠵᠢᠯ ‍ᠤᠨ ᠢᠶᠡᠨ ᠲᠠᠯ᠎ᠠ ᠪᠠᠷ ᠨᠠᠷᠠᠨᠳᠤᠶᠠᠭ᠎ᠠ᠄ ᠳᠠᠷᠠᠭᠠᠴᠢ ᠪᠠᠷ ᠳᠡᠭᠡᠰᠦᠨ ᠦᠢᠯᠠ ᠤᠷᠠᠯᠠᠯ ‍ᠤᠨ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠪᠠ ᠳᠡᠭᠡᠰᠦ᠂ ᠢᠰᠡᠭᠡᠢ᠂ ᠮᠤᠳᠤ᠂ ᠰᠤᠷ᠂ ᠶᠠᠰᠤᠨ ᠤᠷᠠᠯᠠᠯ ‍ᠤᠨ ᠳᠡᠯᠭᠡᠨ ᠦᠵᠡᠭᠦᠯᠤᠯᠭᠡ᠂ ᠪᠤᠷᠤᠯᠠᠭᠤᠯᠭ᠎ᠠ ᠬᠤᠳᠠᠯᠳᠤᠭᠠᠨ ‍ᠤ ᠠᠵᠢᠯᠯᠠᠭ᠎ᠠ ᠦᠷᠨᠢᠭᠦᠯᠵᠦ᠂ ᠮᠤᠩ᠋ᠭᠤᠯᠴᠤᠳ ᠤᠨ ᠢᠶᠡᠨ ᠡᠨᠡ ᠰᠠᠶᠢᠬᠠᠨ ᠤᠷ᠎ᠠ ᠮᠡᠷᠭᠡᠵᠢᠯ ‍ᠢ ᠨᠡᠩ ᠤᠯᠠᠨ ᠬᠦᠮᠦᠰ ᠲᠤ ᠲᠠᠨᠢᠭᠤᠯᠤᠨ᠂ ᠵᠢᠩᠭᠢᠨᠢ ᠦᠨ᠎ᠠ ᠦᠷᠳᠡᠭ ᠲᠤᠨᠢ ᠬᠦᠷᠭᠡᠬᠦ ᠪᠦᠬᠡᠳ ᠤᠷᠬᠢᠬᠳᠠᠬᠤ ᠰᠢᠬᠠᠬᠰᠡᠨ ᠦᠢᠯᠠ ᠤᠷᠠᠯᠠᠯ ᠢᠶᠡᠨ ᠦᠷ᠎ᠠ ᠬᠤᠶᠢᠴᠠᠰ ᠲᠠᠭᠠᠨ ᠦᠪᠯᠡᠨ ᠤᠯᠠᠮᠵᠢᠯᠠᠵᠦ᠂ ᠤᠯᠠᠮ ᠴᠢᠨᠠᠬᠰᠢ ᠳᠡᠯᠭᠡᠷᠡᠭᠦᠯᠦᠨ ᠬᠦᠭ᠍ᠵᠢᠭᠦᠯᠬᠦ ᠰᠠᠨᠠᠭ᠎ᠠ ᠲᠠᠢ ᠬᠡᠵᠡᠢ᠃