ᠵᠤᠬᠢᠶᠠᠭᠴᠢ:
ᠴᠠᠭ:2021-11-05
ᠥᠵᠡᠭᠰᠡᠨ : ℃
ᠢᠷᠡᠯᠲᠡ: ᠢᠷᠡᠯᠲᠡ᠄ ᠥᠪᠥᠷ ᠮᠣᠩᠭᠣᠯ ᠤᠨ ᠣᠷᠣᠨ ᠨᠤᠲᠤᠭ ᠤᠨ ᠣᠢᠯᠠᠯᠭᠠ ᠶᠢᠨ ᠣᠯᠠᠨ ᠨᠡᠢᠲᠡ ᠶᠢᠨ ᠲᠠᠪᠴᠠᠩ
ᠬᠣᠷᠢᠨᠭᠡᠷ ᠤᠨ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠪᠤᠩᠬᠤᠨ ᠤ ᠬᠠᠨᠠ ᠶᠢᠨ ᠵᠢᠷᠤᠭ
ᠬᠣᠷᠢᠨᠭᠡᠷ ᠤᠨ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠪᠤᠩᠬᠤᠨ ᠤ ᠬᠠᠨᠠ ᠶᠢᠨ ᠵᠢᠷᠤᠭ᠂ 1971 ᠣᠨ ᠳᠤ ᠭᠠᠵᠠᠷ ᠳᠣᠣᠷᠠ ᠠᠴᠠ ᠣᠯᠳᠠᠭᠰᠠᠨ᠂ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨ ᠠᠴᠠ ᠨᠠᠰᠢᠭᠢ ᠨᠡᠯᠢᠶᠡᠳ ᠶᠡᠬᠡ ᠢᠯᠡᠷᠡᠭᠦᠯᠦᠯᠲᠡ ᠦᠨ ᠨᠢᠭᠡ ᠪᠣᠯᠣᠨᠠ᠃
ᠬᠠᠨ ᠤᠯᠤᠰ ᠤᠨ ᠦᠶᠡ ᠪᠣᠯ ᠳᠤᠮᠳᠠᠳᠤ ᠤᠯᠤᠰ ᠤᠨ ᠵᠢᠷᠤᠬᠤ ᠤᠷᠠᠯᠢᠭ ᠤᠨ ᠠᠩᠬᠠᠨ ᠤ ᠬᠥᠭᠵᠢᠯᠲᠡ ᠶᠢᠨ ᠱᠠᠲᠤ ᠦᠶᠡ ᠪᠣᠯᠣᠨᠠ᠃ ᠵᠢᠷᠤᠭᠴᠢᠳ ᠠᠮᠢᠳᠤᠷᠠᠯ ᠳᠤ ᠪᠣᠯᠣᠭᠰᠠᠨ ᠲᠠᠨᠢᠯᠲᠠ ᠪᠠ ᠣᠢᠯᠠᠭᠠᠯᠲᠠ ᠳᠤ ᠪᠠᠨ ᠰᠠᠭᠤᠷᠢᠯᠠᠵᠤ᠂ ᠬᠥᠮᠥᠰ ᠦᠨ ᠬᠥᠳᠡᠯᠪᠦᠷᠢ ᠤᠨ ᠣᠨᠴᠠᠯᠢᠭ ᠢ ᠪᠦᠷᠢᠨ ᠢᠯᠡᠷᠡᠭᠦᠯᠵᠦ᠂ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠨᠡᠢᠭᠡᠮ ᠠᠮᠢᠳᠤᠷᠠᠯ ᠤᠨ ᠰᠡᠳᠬᠢᠯ ᠬᠥᠳᠡᠯᠭᠡᠮᠡ ᠦᠵᠡᠭᠳᠡᠯ ᠢ ᠲᠣᠳᠣᠷᠠᠭᠤᠯᠤᠭᠰᠠᠨ ᠨᠢ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠬᠠᠨᠠ ᠶᠢᠨ ᠵᠢᠷᠤᠭ ᠤᠨ ᠰᠣᠳᠣᠨ ᠪᠦᠲᠦᠭᠡᠯ ᠦᠨ ᠨᠢᠭᠡᠨ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ᠃
ᠲᠤᠰ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠪᠤᠩᠬᠤᠨ ᠨᠢ ᠲᠣᠭᠣᠰᠬᠠ ᠪᠠᠷ ᠪᠠᠷᠢᠭᠰᠠᠨ ᠣᠯᠠᠨ ᠥᠷᠥᠭᠡᠲᠦ ᠪᠤᠩᠬᠤᠨ ᠪᠣᠯᠣᠨᠠ᠂ ᠡᠮᠦᠨᠡ᠂ ᠳᠤᠮᠳᠠᠳᠤ᠂ ᠬᠣᠢᠲᠤ ᠭᠤᠷᠪᠠᠨ ᠥᠷᠭᠥᠭᠡ ᠬᠤᠪᠢᠶᠠᠵᠤ᠂ ᠪᠠᠰᠠ ᠬᠠᠵᠠᠭᠤ ᠶᠢᠨ ᠭᠡᠷ ᠲᠠᠢ᠃ ᠪᠦᠬᠦ ᠤᠷᠲᠤ ᠨᠢ 20 ᠮᠧᠲᠷ᠃ ᠪᠤᠩᠬᠤᠨ ᠤ ᠣᠷᠣᠢ᠂ ᠬᠠᠨᠠ᠂ ᠱᠠᠯᠠᠯᠠᠭᠰᠠᠨ ᠵᠢᠮ ᠦᠨ ᠬᠣᠶᠠᠷ ᠲᠠᠯᠠ ᠪᠠᠷ ᠴᠥᠮ ᠵᠢᠷᠤᠭ ᠲᠠᠢ᠂ ᠨᠡᠢᠲᠡ 57 ᠵᠢᠷᠤᠭ᠃ ᠵᠢᠷᠤᠭ ᠤᠨᠪᠢᠴᠢᠯᠭᠡ 250 ᠭᠠᠷᠤᠢ᠃ ᠬᠠᠨᠠ ᠶᠢᠨ ᠵᠢᠷᠤᠭ ᠤᠨ ᠬᠡᠪᠴᠢᠶᠡ ᠶᠡᠬᠡ᠂ ᠠᠤᠭᠠ ᠰᠦᠷᠯᠢᠭ᠃ ᠠᠭᠤᠯᠭᠠ ᠠᠷᠪᠢᠨ᠂ ᠨᠡᠯᠢᠶᠡᠳ ᠭᠦᠢᠴᠡᠳ ᠵᠢᠷᠤᠭᠰᠠᠨ᠂ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠦᠨᠳᠦᠰᠦᠲᠡᠨ ᠦ ᠬᠠᠷᠢᠴᠠᠭᠠ᠂ ᠳᠠᠪᠬᠤᠷᠭᠠ ᠶᠢᠨ ᠬᠠᠷᠢᠴᠠᠭᠠ ᠪᠠ ᠨᠡᠢᠭᠡᠮ ᠦᠨ ᠪᠠᠢᠳᠠᠯ᠂ ᠠᠮᠢᠳᠤᠷᠠᠯ ᠪᠠ ᠠᠷᠠᠳ ᠤᠨ ᠵᠠᠩ ᠦᠢᠯᠡ ᠪᠠ ᠵᠠᠩ ᠠᠭᠠᠯᠢ ᠶᠢ ᠨᠠᠷᠢᠨ ᠲᠤᠰᠬᠠᠭᠰᠠᠨ ᠠᠴᠠ ᠲᠡᠦᠬᠡ ᠶᠢᠨ ᠦᠨᠡ ᠥᠷᠲᠡᠭ ᠪᠠ ᠤᠷᠠᠯᠢᠭ ᠤᠨ ᠦᠨᠡ ᠥᠷᠲᠡᠭ ᠲᠠᠢ ᠶᠤᠮ᠃
ᠬᠠᠨᠠ ᠶᠢᠨ ᠵᠢᠷᠤᠭ ᠤᠨ ᠠᠭᠤᠯᠭᠠ ᠠᠴᠠ ᠮᠡᠳᠡᠵᠦ ᠪᠣᠯᠬᠤ ᠨᠢ᠂ ᠪᠤᠩᠬᠤᠨ ᠤ ᠡᠵᠡᠨ ᠨᠢ ᠦᠬᠠᠨ ᠳᠡᠰᠯᠡᠭᠴᠢ ᠪᠣᠯᠣᠨᠠ᠃ ᠪᠤᠩᠬᠤᠨ ᠳᠣᠲᠣᠷᠠᠬᠢ ᠬᠣᠢᠲᠤ ᠥᠷᠭᠥᠭᠡ ᠳᠦ ᠭᠠᠵᠠᠷ ᠲᠠᠷᠢᠶᠠᠯᠠᠩ ᠤᠨ ᠵᠢᠷᠤᠭ ᠵᠢᠷᠤᠭᠰᠠᠨ ᠪᠠᠢᠵᠤ᠂ ᠵᠡᠭᠦᠨ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠭᠠᠵᠠᠷ ᠲᠠᠷᠢᠶᠠᠯᠠᠩ ᠤᠨ ᠳᠦᠷᠰᠦ ᠶᠢ ᠲᠤᠰᠬᠠᠵᠠᠢ᠃ ᠲᠤᠰ ᠭᠠᠵᠠᠷ ᠲᠠᠷᠢᠶᠠᠯᠠᠩ ᠤᠨ ᠵᠢᠷᠤᠭ ᠨᠢ ᠵᠡᠭᠦᠨ ᠬᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠨᠡᠢᠭᠡᠮ ᠠᠵᠤ ᠠᠬᠤᠢ ᠶᠢ ᠰᠤᠳᠤᠯᠬᠤ ᠳᠤ ᠣᠯᠳᠠᠰᠢ ᠦᠭᠡᠢ ᠮᠠᠲ᠋ᠧᠷᠢᠶᠠᠯ ᠪᠣᠯᠣᠭᠰᠠᠨ ᠪᠠᠢᠨᠠ᠃ ᠬᠣᠢᠲᠤ ᠥᠷᠭᠥᠭᠡ ᠳᠦ ᠪᠠᠰᠠ ᠨᠢᠭᠡᠨ ᠪᠤᠩᠬᠤᠨ ᠤ ᠡᠵᠡᠨ ᠦ ᠭᠡᠷ ᠦᠨ ᠠᠮᠢᠳᠤᠷᠠᠯ ᠤᠨ ᠪᠠᠢᠳᠠᠯ ᠤᠨ ᠵᠢᠷᠤᠭ ᠪᠠᠢᠳᠠᠭ᠂ ᠭᠠᠳᠠᠭᠠ ᠨᠢ ᠬᠣᠲᠠ ᠶᠢᠨ ᠬᠡᠷᠡᠮ ᠢᠶᠡᠷ ᠬᠦᠷᠢᠶᠡᠯᠡᠭᠳᠡᠨ᠂ ᠬᠣᠲᠠ ᠶᠢᠨ ᠳᠣᠲᠣᠷᠠ ᠪᠤᠩᠬᠤᠨ ᠤ ᠡᠵᠡᠨ ᠦ ᠣᠷᠣᠨ ᠰᠠᠭᠤᠴᠠ ᠶᠢ ᠲᠣᠪᠣᠢᠯᠭᠠᠵᠤ᠂ ᠨᠢᠭᠡ ᠭᠡᠷ ᠪᠦᠯᠢ ᠬᠠᠮᠲᠦ ᠰᠠᠭᠤᠵᠤ᠂ ᠠᠰᠠᠷᠠᠭᠴᠢ ᠰᠢᠪᠡᠭᠴᠢᠨ ᠬᠠᠵᠠᠭᠤ ᠪᠠᠷ ᠨᠢ ᠵᠣᠭᠰᠣᠵᠤ᠂ ᠰᠤᠯᠠ ᠰᠡᠯᠡᠭᠦᠦ ᠮᠥᠯᠵᠢᠯ ᠦᠨ ᠠᠮᠢᠳᠤᠷᠠᠯ ᠤᠨ ᠪᠠᠢᠳᠠᠯ ᠲᠠᠢ ᠪᠠᠢᠳᠠᠭ᠃
