ᠵᠤᠬᠢᠶᠠᠭᠴᠢ:
ᠴᠠᠭ:2024-12-06
ᠥᠵᠡᠭᠰᠡᠨ : ℃
ᠢᠷᠡᠯᠲᠡ: ᠳᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶᠡ
ᠲᠡᠮᠡᠭᠡ ᠰᠤᠷᠭᠠᠬᠤ
ᠲᠡᠮᠡᠭᠡ ᠰᠤᠷᠭᠠᠬᠤ ᠪᠣᠯ ᠲᠡᠮᠡᠭᠡᠨ ᠪ᠊ ᠥᠰᠦᠯᠲᠡ ᠪᠤᠶᠢᠵᠢᠯᠳᠠ ᠶᠢᠨ ᠶᠠᠪᠤᠴᠠ ᠳᠤᠮᠳᠠᠬᠢ ᠡᠷᠬᠡᠪᠰᠢ ᠥᠩᠭᠡᠷᠡᠭᠦᠯᠬᠦ ᠨᠢᠭᠡᠨ ᠶᠠᠪᠤᠴᠠ ᠮᠥᠨ᠃ ᠰᠤᠷᠭᠠᠭᠰᠠᠨ ᠦᠭᠡᠢ ᠲᠡᠮᠡᠭᠡᠳ ᠨᠢ ᠶᠠᠮᠠᠷᠴᠤ ᠬᠡᠷᠡᠭᠴᠡᠭᠡ ᠦᠭᠡᠢ ᠵᠡᠷᠯᠢᠭ ᠲᠡᠮᠡᠭᠡ ᠪᠤᠯᠳᠠᠭ᠃ ᠪᠣᠯᠣᠳ ᠤᠨ ᠡᠪᠦᠭᠡ ᠪᠣᠯ ᠬᠤᠯᠠ ᠣᠶᠢᠷᠠ ᠳᠠᠭᠠᠨ ᠠᠯᠳᠠᠷᠲᠠᠢ ᠲᠡᠮᠡᠭᠡ ᠰᠤᠷᠭᠠᠭᠴᠢ ᠪᠠᠶᠢᠵᠤ᠂ ᠶᠠᠮᠠᠷ ᠵᠡᠷᠭᠡ ᠶᠢᠨ ᠬᠡᠴᠡᠭᠦᠦ ᠲᠡᠮᠡᠭᠡ ᠶᠢ ᠴᠤ ᠨᠣᠮᠣᠬᠠᠨ ᠪᠣᠯᠭᠠᠴᠢᠬᠠᠳᠠᠭ ᠡᠷᠳᠡᠮ ᠲᠠᠢ᠃ ᠡᠶᠡᠯᠳᠡᠭ ᠳᠠᠷᠤᠤ ᠵᠠᠩ ᠲᠠᠢ ᠡᠨᠡ ᠨᠠᠰᠤᠲᠠᠨ ᠲᠡᠮᠡᠭᠡ ᠰᠤᠷᠭᠠᠬᠤ ᠳᠠᠭᠠᠨ ᠶᠡᠷᠦ ᠬᠠᠷᠠᠳᠠᠵᠤ ᠵᠣᠳᠣᠳᠠᠭ ᠦᠭᠡᠢ᠃ ᠲᠠᠷᠠ ᠡᠭᠡᠭᠡ ᠯᠠ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠲᠠᠢ ᠭᠡᠯᠡ ᠨᠡᠪᠲᠡᠷᠡᠳᠡᠭ ᠰᠢᠳᠢ ᠲᠠᠢ ᠰᠢᠭ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠪᠠᠷ ᠲᠡᠳᠡᠭᠡᠷ ᠵᠢᠭᠠᠬᠠᠨ ᠠᠮᠢᠲᠠᠳ ᠲᠤ ᠬᠠᠨᠳᠤᠵᠤ᠂ ᠨᠡᠷᠡ ᠪᠠᠷ ᠨᠢ ᠦᠭᠦᠭᠡᠷᠳᠦᠨ ᠳᠠᠭᠤᠳᠠᠵᠤ᠂ ᠥᠨᠢ ᠡᠷᠲᠡᠨ ᠤ ᠦᠯᠢᠭᠡᠷ ᠲᠤᠮᠤᠭ ᠢ ᠶᠠᠷᠢᠵᠤ ᠥᠭᠬᠦ ᠡᠰᠡᠬᠦᠯᠡ ᠤᠷᠳᠤ ᠶᠢᠨ ᠳᠠᠭᠤᠤ ᠳᠠᠭᠤᠯᠠᠵᠤ ᠥᠭᠬᠦ ᠵᠡᠷᠭᠡ ᠪᠠᠷ ᠲᠡᠳᠡᠨᠡᠷ ᠢ ᠲᠠᠶᠢᠪᠤᠰᠢᠷᠠᠭᠤᠯᠵᠤ᠂ ᠦᠰᠦ ᠨᠣᠣᠰᠣ᠂ ᠬᠠᠮᠠᠷ ᠠᠮᠠ ᠶᠢ ᠨᠢ ᠢᠯᠢᠨ᠂ ᠪᠠᠷᠠᠭᠤᠨ ᠡᠪᠦᠳᠦᠭ ᠤᠨ ᠬᠢᠨᠢ ᠳᠣᠣᠭᠤᠷ ᠳᠡᠭᠡᠰᠦ ᠪᠠᠷ ᠤᠶᠠᠵᠤ᠂ ᠨᠦᠭᠦᠭᠡ ᠦᠵᠦᠭᠦᠷ ᠢ ᠨᠢ ᠬᠤᠣᠰ ᠪᠦᠭᠦ ᠶᠢᠨ ᠬᠢᠨᠢ ᠳᠤᠮᠳᠠᠭᠤᠷ ᠲᠠᠲᠠᠭᠠᠳ ᠭᠠᠷ ᠲᠠᠭᠠᠨ ᠣᠷᠢᠶᠠᠭᠠᠳ᠂ ᠳᠡᠭᠡᠰᠦ ᠪᠠᠨ ᠲᠠᠲᠠᠬᠤ᠂ ᠲᠠᠯᠪᠢᠬᠤ ᠪᠠᠷ ᠳᠣᠬᠢᠶᠠ ᠪᠣᠯᠭᠠᠨ ᠲᠡᠮᠡᠭᠡᠳ ᠲᠤ ᠰᠥᠭᠦᠳᠬᠦ᠂ ᠪᠤᠰᠬᠤ ᠲᠠᠭᠢᠨ ᠰᠥᠭᠦᠳᠬᠦ ᠲᠠᠭᠢᠨ ᠪᠤᠰᠬᠤ ᠶᠢ ᠰᠤᠷᠭᠠᠬᠤ ᠪᠠᠷ ᠳᠠᠮᠵᠢᠭᠤᠯᠤᠨ ᠡᠵᠡᠨ ᠨᠢ ᠬᠢᠨᠢ ᠰᠠᠨᠠᠭᠠ ᠶᠢ ᠮᠡᠳᠡᠭᠦᠯᠳᠡᠭ ᠠᠵᠢ᠃ ᠰᠠᠶᠢᠨ ᠰᠤᠷᠭᠠᠭᠰᠠᠨ ᠠᠳᠠᠨ ᠲᠡᠮᠡᠭᠡ ᠡᠵᠡᠨ ᠤ ᠪᠠᠨ ᠰᠠᠨᠠᠭᠠ ᠶᠢ ᠠᠯᠳᠠᠯ ᠦᠭᠡᠢ ᠮᠡᠳᠡᠵᠤ᠂ ᠲᠣᠬᠤᠮ ᠲᠤᠬᠤᠬᠤ ᠪᠠᠷ ᠰᠥᠭᠦᠳᠴᠦ᠂ ᠡᠵᠡᠨ ᠨᠢ ᠮᠣᠷᠳᠠᠭᠰᠠᠨ ᠬᠤᠶᠢᠨᠠ ᠪᠣᠰᠴᠤ ᠠᠶᠠᠯᠠᠨ᠂ ᠵᠣᠷᠢᠭᠰᠠᠨ ᠭᠠᠵᠠᠷ ᠢᠶᠠᠨ ᠬᠦᠷᠬᠦ ᠪᠠᠷ ᠪᠠᠰᠠ ᠰᠥᠭᠦᠳᠴᠦ᠂ ᠡᠵᠡᠨ ᠢᠶᠠᠨ ᠪᠠᠭᠤᠯᠭᠠᠳᠠᠭ᠃ ᠲᠡᠮᠡᠭᠡᠳ ᠢ ᠢᠩᠭᠢᠵᠦ ᠤᠨᠤᠯᠭᠠ ᠭᠦᠯᠯᠡᠭᠡᠨ ᠳᠤ ᠰᠤᠷᠭᠠᠳᠠᠭ ᠶᠤᠮᠰᠠᠨᠵᠠᠢ᠃
ᠠᠯᠠᠱᠠ ᠠᠶᠢᠮᠠᠭ ᠤᠨ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤᠨ ᠪ᠊ ᠤᠮᠠᠷᠠᠲᠤ ᠬᠡᠰᠡᠭ ᠤᠨ ᠰᠤᠮᠤ᠂ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤ᠂ ᠡᠵᠡᠨᠡ ᠬᠤᠰᠢᠭᠤ ᠪᠠᠷ ᠲᠡᠮᠡᠭᠡ ᠡᠯᠪᠡᠭ ᠮᠠᠯᠵᠢᠳᠠᠭ᠃ ᠠᠳᠡ ᠤᠷᠳᠤ ᠤᠳᠠᠭᠠᠨ ᠲᠡᠮᠡᠭᠡ ᠮᠠᠯᠵᠢᠭᠰᠠᠨ ᠲᠡᠦᠬᠡ ᠲᠠᠢ ᠪᠠᠶᠢᠵᠤ᠂ ᠲᠡᠮᠡᠭᠡᠨ ᠰᠣᠶᠣᠯ ᠢ ᠦᠶᠡ ᠤᠯᠠᠷᠢᠨ ᠠᠮᠠ ᠪᠠᠷ ᠤᠯᠠᠮᠵᠢᠯᠠᠭᠰᠠᠨ ᠪᠠᠶᠢᠳᠠᠭ᠃ ᠢᠩᠭᠡ ᠪᠣᠲᠣᠭᠤᠯᠠᠬᠤ ᠨᠢ ᠲᠡᠮᠡᠭᠡᠴᠢᠨ ᠠᠶᠢᠯ ᠳᠤ ᠠᠪᠴᠤ ᠬᠡᠯᠡᠪᠡᠯ ᠲᠣᠮᠣ ᠪᠠᠶᠠᠷ ᠪᠠᠶᠢᠵᠤ᠂ ᠪᠣᠲᠣᠭᠤᠨ ᠪ᠊ ᠲᠤᠭᠠ ᠶᠢᠨ ᠨᠡᠮᠡᠭᠳᠡᠯ ᠨᠢ ᠲᠡᠳᠡᠨᠡᠷ ᠤᠨ ᠡᠳ᠋ ᠬᠥᠷᠥᠩᠭᠡ ᠶᠢᠨ ᠨᠡᠮᠡᠭᠳᠡᠯ᠂ ᠠᠳᠠᠯ ᠠᠮᠢᠳᠤᠷᠠᠯ ᠤᠨ ᠴᠢᠨᠡᠭᠡᠯᠢᠭᠵᠢᠯ ᠢ ᠬᠠᠷᠠᠭᠤᠯᠳᠠᠭ᠃ ᠲᠡᠮᠡᠭᠡᠴᠢᠳ ᠪᠣᠲᠣᠭᠤ ᠪᠠᠨ ᠰᠠᠶᠢᠬᠠᠨ ᠨᠡᠷᠡᠯᠡᠵᠤ ᠪᠡᠯᠭᠡᠰᠢᠶᠡᠨ ᠳᠠᠭᠤᠳᠠᠳᠠᠭ᠃ ᠡᠬᠡ ᠪᠠᠨ ᠲᠠᠭᠠᠵᠤ ᠶᠠᠪᠤᠭᠠᠳ ᠠᠳᠡᠯ ᠣᠰᠣᠯ ᠭᠠᠷᠬᠤ ᠠᠴᠠ ᠬᠢᠴᠢᠶᠡᠵᠦ᠂ ᠪᠣᠲᠣᠭᠤ ᠪᠠᠨ ᠬᠤᠷᠣᠭᠠᠨ ᠳᠤᠨᠢ ᠤᠶᠠᠵᠤ ᠲᠠᠯᠪᠢᠨᠠ᠃ ᠪᠡᠯᠴᠢᠭᠡᠷᠯᠡᠵᠦ ᠶᠠᠪᠤᠭᠰᠠᠨ ᠢᠩᠭᠡ ᠬᠡᠳᠦᠢ ᠬᠤᠯᠠ ᠶᠠᠪᠤᠭᠰᠠᠨ ᠴᠤ ᠬᠡᠵᠢᠶᠡᠳᠡ ᠲᠣᠭᠲᠠᠭᠰᠠᠨ ᠴᠠᠭ ᠲᠠᠭᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠪᠣᠲᠣᠭᠤ ᠪᠠᠨ ᠬᠥᠬᠦᠭᠦᠯᠳᠡᠭ᠃ ᠪᠣᠲᠣᠭᠤ ᠶᠢ ᠦᠷᠭᠦᠯᠵᠢ ᠨᠡᠷᠡᠯᠡᠨ ᠳᠠᠭᠤᠳᠠᠵᠤ᠂ ᠦᠭᠦᠭᠡᠷᠳᠦᠨ ᠬᠠᠶᠢᠷᠠᠯᠠᠵᠤ᠂ ᠬᠠᠮᠲᠤ ᠨᠠᠭᠠᠳᠤᠨ ᠲᠣᠭᠯᠠᠵᠤ᠂ ᠤᠰᠤᠯᠠᠵᠤ ᠡᠪᠡᠰᠦᠯᠡᠬᠦ ᠶᠢᠨ ᠤᠯᠠᠮ ᠠᠴᠠ ᠪᠣᠲᠣᠭᠤ ᠡᠵᠡᠨ ᠳᠡᠭᠡᠨ ᠨᠢᠭᠡᠮᠦᠰᠦᠨ ᠳᠠᠳᠴᠤ᠂ ᠬᠤᠶᠠᠷ ᠭᠤᠷᠪᠠᠨ ᠨᠠᠰᠤᠯᠠᠭᠠᠳ ᠵᠡᠷᠯᠢᠭ ᠴᠢᠨᠠᠷ ᠨᠢ ᠢᠯᠡᠷᠡᠯᠡ ᠴᠤ ᠰᠤᠷᠭᠠᠬᠤ ᠳᠤ ᠲᠠᠶᠢᠮᠦ ᠬᠦᠴᠢᠷ ᠪᠢᠰᠢ ᠪᠤᠯᠳᠠᠭ᠃ ᠲᠡᠮᠡᠭᠡ ᠮᠠᠰᠢ ᠰᠡᠷᠭᠦᠯᠡᠩ ᠠᠮᠢᠳᠠᠨ ᠪᠠᠶᠢᠵᠤ᠂ ᠡᠵᠡᠨ ᠲᠠᠢ ᠪᠠᠨ ᠳᠠᠳᠴᠤ᠂ ᠡᠵᠡᠨ ᠳᠡᠭᠡᠨ ᠠᠯᠢᠪᠠ ᠪᠠᠨ ᠵᠣᠷᠢᠭᠤᠯᠳᠠᠭ᠃
ᠡᠵᠡᠨ ᠤ ᠪᠠᠨ ᠤᠨᠤᠭᠠ ᠪᠤᠯᠬᠤ ᠨᠢ ᠲᠡᠮᠡᠭᠡᠨ ᠳᠤ ᠠᠪᠴᠤ ᠬᠡᠯᠡᠪᠡᠯ ᠮᠠᠰᠢ ᠥᠩᠭᠡ ᠭᠡᠷᠡᠯᠲᠡᠢ ᠡᠭᠦᠷᠭᠡ ᠪᠣᠯᠣᠨᠠ᠃ ᠡᠵᠡᠨ ᠨᠢ ᠲᠡᠮᠡᠭᠡᠨ ᠪ᠊ ᠪᠠᠨ ᠬᠦᠵᠦᠭᠦᠦ ᠮᠠᠩᠨᠠᠢ ᠶᠢ ᠨᠢ ᠲᠠᠪᠰᠢᠨ ᠢᠯᠢᠵᠦ ᠲᠡᠮᠡᠭᠡᠨ ᠳᠡᠭᠡᠨ ᠢᠲᠡᠭᠡᠯ ᠤᠷᠮᠠ ᠬᠠᠶᠢᠷᠠᠯᠠᠳᠠᠭ᠃ ᠲᠡᠮᠡᠭᠡ ᠨᠢ ᠡᠵᠡᠨ ᠪ᠊ ᠪᠠᠨ ᠰᠠᠨᠠᠭᠠ ᠶᠢ ᠣᠶᠢᠯᠠᠭᠠᠵᠤ᠂ ᠬᠤᠷᠳᠤ ᠨᠡᠮᠡᠨ ᠳᠣᠪᠲᠣᠯᠭᠠᠬᠤ ᠴᠢᠨᠠᠭᠰᠢᠯᠠᠨ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠡᠵᠡᠨ ᠢᠶᠠᠨ ᠠᠴᠢᠵᠤ ᠠᠮᠤᠷ ᠮᠡᠨᠳᠦ ᠪᠠᠷ ᠭᠡᠷ ᠲᠡᠭᠡᠨ ᠪᠤᠴᠠᠳᠠᠭ ᠨᠢ ᠴᠤ ᠪᠤᠢ᠃ ᠡᠳᠡᠭᠡᠷ ᠨᠢ ᠪᠦᠷ ᠲᠡᠮᠡᠭᠡ ᠪᠠᠨ ᠬᠢᠷᠢ ᠰᠠᠶᠢᠨ ᠰᠤᠷᠭᠠᠭᠰᠠᠨ᠂ ᠬᠡᠴᠢᠨᠡᠨ ᠬᠠᠶᠢᠷᠠᠯᠠᠵᠤ ᠳᠣᠳᠣᠮᠳᠠᠭᠰᠠᠨ ᠲᠠᠢ ᠰᠠᠯᠤᠰᠢ ᠦᠭᠡᠢ ᠬᠤᠯᠪᠤᠭᠠ ᠲᠠᠢ᠃ ᠡᠶᠢᠮᠦ ᠠᠴᠠ ᠠᠯᠠᠱᠠ ᠨᠤᠲᠤᠭ ᠤᠨ ᠵᠢᠩᠬᠢᠨᠢ ᠲᠡᠮᠡᠭᠡᠴᠢᠨ ᠲᠡᠮᠡᠭᠡ ᠪᠠᠨ ᠶᠡᠷᠦ ᠠᠳᠤᠭᠤᠰᠤ ᠠᠮᠢᠳᠠᠨ ᠭᠡᠵᠦ ᠦᠵᠡᠳᠡᠭ ᠦᠭᠡᠢ ᠬᠠᠷᠢᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠨᠢᠭᠡᠨ ᠪᠦᠷᠢᠯᠳᠦᠭᠦᠨ ᠢᠶᠠᠷ ᠦᠵᠡᠳᠡᠭ ᠪᠢᠯᠡ᠃
