ᠵᠤᠬᠢᠶᠠᠭᠴᠢ:
ᠴᠠᠭ:2025-01-24
ᠥᠵᠡᠭᠰᠡᠨ : ℃
ᠢᠷᠡᠯᠲᠡ: ᠦᠬᠠᠢ ᠬᠤᠲᠠ ᠶᠢᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ
ᠠᠶᠠᠭᠠ
ᠮᠣᠩᠭᠤᠯ ᠬᠦᠮᠦᠨ ᠠᠶᠠᠭᠠ ᠦᠭᠡᠢ ᠪᠣᠯ ᠠᠮᠣ ᠦᠭᠡᠢ ᠲᠠᠢ ᠠᠳᠠᠯᠢ ᠭᠡᠳᠡᠭ᠃ ᠠᠯᠳᠠ ᠳᠡᠯᠢᠮ ᠬᠠᠳᠠᠭ ᠤᠨ ᠳᠡᠭᠡᠷᠡ ᠮᠦᠩᠭᠦᠨ ᠠᠶᠠᠭᠠ ᠲᠠᠢ ᠰᠦ ᠮᠡᠯᠳᠡᠯᠵᠡᠬᠦᠯᠦᠨ ᠪᠠᠷᠢᠵᠣ ᠪᠠᠶᠢᠭᠠᠳ᠂ ᠰᠠᠶᠢᠨ ᠰᠠᠶᠢᠬᠠᠨ ᠢ ᠢᠷᠦᠬᠡᠵᠦ ᠮᠠᠭᠳᠠᠨᠠ᠃《ᠠᠶᠠᠭᠠᠨ ᠤ ᠬᠠᠷᠢᠭᠤ ᠡᠳᠦᠷ ᠲᠡᠭᠡᠨ᠂ ᠠᠭᠳᠠᠨ ᠤ ᠬᠠᠷᠢᠭᠤ ᠵᠢᠯ ᠳᠡᠭᠡᠨ》ᠬᠡᠵᠦ ᠢᠷᠡᠭᠡᠳ ᠯᠡ ᠪᠢᠳᠡ ᠬᠤᠶᠢᠳᠣ ᠣᠷᠢᠳ ᠤᠨ ᠢᠶᠠᠨ ᠪᠣᠳᠣᠵᠣ᠂ ᠨᠢᠬᠡ ᠨᠢᠬᠡᠨ ᠳᠡᠭᠡᠨ ᠳᠣᠰᠠ ᠳᠡᠮ ᠪᠣᠯᠣᠨᠠ᠃《ᠠᠶᠠᠭᠠᠨ ᠤ ᠠᠯᠠᠭ ᠮᠠᠭᠤᠬᠠᠢ᠂ ᠠᠭᠳᠠᠨ ᠤ ᠠᠯᠠᠭ ᠰᠠᠶᠢᠬᠠᠨ》ᠭᠡᠳ ᠶᠡᠭᠡ ᠪᠠᠭᠠ᠂ ᠡᠷᠡ ᠡᠮᠡ᠂ ᠡᠷᠳᠡᠮ ᠨᠣᠮ ᠲᠠᠢ ᠬᠡᠨ ᠪᠣᠯᠭᠠᠨ ᠢ ᠠᠳᠠᠯᠢᠬᠠᠨ ᠦᠵᠡᠵᠦ᠂ ᠬᠦᠮᠦᠨ ᠤ ᠮᠦᠰᠦ ᠲᠠᠢ ᠵᠠᠩ ᠭᠠᠷᠭᠠᠵᠣ ᠪᠠᠶᠢᠬᠤ ᠶᠢ ᠵᠠᠬᠢᠵᠣ ᠰᠣᠷᠭᠠᠳᠠᠭ᠃ ᠦᠬᠢᠨ ᠢ ᠨᠢ ᠮᠣᠷᠳᠠᠭᠤᠯᠵᠣ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠬᠦᠷᠬᠡᠨ ᠬᠦᠦ ᠳᠡᠭᠡᠨ ᠬᠠᠳᠠᠮ ᠡᠵᠢ ᠨᠢ᠂ ᠴᠠᠭᠠᠨ ᠰᠦ ᠶᠢᠨ ᠦᠩᠭᠡᠳᠡᠢ ᠴᠠᠮᠴᠠ ᠡᠮᠦᠰᠭᠡᠵᠦ《ᠦᠪᠡᠷ ᠤᠨ ᠬᠦᠮᠦᠨ ᠪᠣᠯᠭᠠᠵᠣ ᠠᠪᠣᠭᠠᠳ》ᠠᠮᠢᠳᠣᠷᠠᠯ ᠤᠨ ᠬᠢᠨᠢ ᠠᠶᠠᠨ ᠵᠠᠮ ᠳᠤ ᠠᠵᠠ ᠵᠢᠷᠭᠠᠯ ᠢᠷᠦᠭᠡᠵᠦ᠂ ᠠᠶᠠᠭᠠ ᠲᠠᠢ ᠰᠦ᠂ ᠬᠠᠳᠠᠭ ᠲᠠᠢ ᠪᠠᠷᠢᠳᠠᠭ᠃ ᠢᠩᠭᠢᠬᠦ ᠳᠤ ᠬᠦᠷᠬᠡᠨ ᠬᠦᠦ᠂ ᠡᠬᠡᠨᠡᠷ ᠪᠣᠯᠬᠤ ᠪᠦᠰᠡᠬᠦᠢ ᠲᠠᠢ ᠪᠠᠨ ᠬᠤᠪᠢᠶᠠᠵᠣ ᠣᠣᠭᠤᠭᠠᠳ᠂ ᠠᠶᠠᠭᠠ ᠶᠢ ᠨᠢ ᠡᠪᠦᠷᠳᠦᠯᠡᠨ《ᠴᠠᠭᠠᠨ ᠴᠣᠬᠤᠷ》 ᠤᠨ ᠲᠦᠷᠡᠯᠬᠡ ᠪᠠᠷ᠂ ᠡᠬᠡᠨᠡᠷ ᠢᠶᠠᠨ ᠣᠷᠣ ᠳᠡᠷᠡ᠂ ᠠᠪᠳᠠᠷᠠ ᠰᠠᠪᠠ ᠲᠠᠢ ᠨᠢ ᠠᠪᠣᠭᠠᠳ ᠬᠤᠷᠢᠮ ᠢᠶᠠᠨ ᠡᠬᠢᠯᠡᠬᠦ ᠪᠠᠷ ᠭᠠᠷᠳᠠᠭ᠃ ᠠᠯᠤᠰ ᠬᠤᠯᠠ ᠶᠠᠪᠣᠬᠤ ᠬᠦᠮᠦᠨ ᠦᠳᠡᠨ ᠮᠣᠷᠳᠠᠭᠤᠯᠤᠭᠰᠠᠳ ᠲᠠᠭᠠᠨ᠂ ᠲᠦᠬᠦᠷᠡᠩ ᠵᠢᠷᠭᠠᠯ ᠲᠠᠢ᠂ ᠲᠦᠪᠰᠢᠨ ᠪᠠᠶᠠᠷ ᠲᠠᠢ ᠪᠠᠶᠢᠵᠠᠭᠠᠬᠤ ᠶᠢ ᠪᠡᠯᠭᠡᠳᠡᠨ᠂ ᠠᠶᠠᠭᠠᠨ ᠳᠠᠭᠠᠨ ᠴᠠᠢ ᠲᠦᠬᠦᠷᠡᠩ ᠪᠣᠷᠬᠠᠨ ᠳᠠᠭᠠᠨ ᠵᠠᠯᠠᠵᠣ ᠣᠷᠬᠢᠭᠠᠳ ᠮᠣᠷᠳᠠᠨᠠ᠃ ᠳᠠᠷᠠᠭᠠ ᠨᠢ ᠭᠡᠷ ᠤᠨ ᠬᠢᠨ ᠨᠢ ᠬᠤᠪᠢᠶᠠᠵᠣ ᠣᠣᠭᠤᠨᠠ᠃ ᠵᠣᠴᠢᠨ ᠳᠤ ᠰᠡᠳᠡᠷᠬᠡᠢ ᠪᠣᠯᠣᠨ ᠬᠤᠭᠤᠰᠣᠨ ᠠᠶᠠᠭᠠ ᠬᠠᠨᠳᠣᠭᠤᠯᠬᠤ ᠦᠭᠡᠢ᠂ ᠴᠠᠢ ᠬᠤᠭᠤᠯᠠ ᠪᠠᠨ ᠵᠠᠪᠠᠯ ᠠᠶᠠᠭᠠᠯᠠᠵᠣ ᠦᠭᠬᠦᠨᠡ᠃ ᠠᠶᠠᠭᠠᠯᠠᠬᠤ ᠳᠠᠭᠠᠨ ᠴᠠᠢ ᠶᠢᠨ ᠡᠷᠬᠢᠬᠦᠯᠬᠡ ᠶᠢ ᠨᠠᠷᠠ ᠵᠦᠪ ᠳᠣᠭᠤᠷᠢᠭᠤᠯᠵᠣ ᠬᠢᠨᠡ᠃ ᠦᠭᠬᠦ ᠳᠡᠭᠡᠨ ᠦᠷᠦᠭᠡᠰᠦᠨ ᠪᠣᠶᠣ ᠰᠣᠯᠣᠭᠠᠢ ᠭᠠᠷ ᠢᠶᠠᠷ ᠢᠶᠠᠨ ᠦᠭᠬᠦ᠂ ᠠᠮᠰᠠᠷᠳᠠᠨ ᠪᠠᠷᠢᠵᠣ ᠦᠭᠬᠦ ᠶᠢ ᠴᠡᠭᠡᠷᠯᠡᠨᠡ᠃ ᠮᠦᠨ ᠪᠠᠭᠠᠨᠠ ᠶᠢᠨ ᠬᠤᠭᠤᠷᠤᠨᠳᠤᠭᠤᠷ ᠴᠠᠢ ᠬᠤᠭᠤᠯᠠ ᠦᠭᠬᠦ ᠬᠤᠷᠢᠭᠠ ᠴᠡᠭᠡᠷ ᠲᠠᠢ ᠪᠠᠶᠢᠳᠠᠭ᠃ ᠠᠶᠠᠭᠠᠨ ᠳᠤ ᠰᠢᠭᠠᠷᠣ ᠦᠯᠡᠳᠡᠭᠡᠳᠡᠭ ᠦᠭᠡᠢ᠂ ᠴᠠᠭᠠᠨ ᠢᠳᠡᠭᠡ ᠤᠤᠭᠤᠵᠣ ᠢᠳᠡᠭᠰᠡᠨ ᠪᠣᠯ ᠠᠶᠠᠭᠠ ᠪᠠᠨ ᠳᠣᠯᠢᠶᠠᠵᠣ ᠳᠠᠯᠪᠢᠨᠠ᠃ ᠠᠶᠠᠭᠠ ᠶᠢ ᠬᠦᠮᠦᠷᠢᠵᠣ ᠳᠠᠯᠪᠢᠳᠠᠭ ᠦᠭᠡᠢ᠂ ᠠᠶᠠᠭᠠᠨ ᠳᠡᠭᠡᠬᠦᠷ ᠠᠯᠬᠤᠳᠠᠭ ᠦᠭᠡᠢ᠂ ᠠᠯᠢ ᠳᠠᠭᠠᠷᠠᠯᠳᠣᠭᠰᠠᠨ ᠭᠠᠵᠠᠷ ᠢᠶᠠᠨ ᠬᠤᠷᠢᠶᠠᠳᠠᠭ ᠦᠭᠡᠢ᠂ ᠠᠶᠠᠭᠠᠨ ᠤ ᠰᠢᠷᠡᠭᠡ ᠭᠡᠵᠦ ᠰᠢᠷᠭᠤᠭᠤᠯ ᠲᠠᠢ ᠰᠢᠷᠡᠭᠡ ᠳᠣᠰ ᠲᠠᠭᠠᠨ ᠪᠠᠶᠢᠨᠠ᠃ ᠬᠦᠮᠦᠨ ᠪᠣᠯᠭᠠᠨ ᠴᠥᠮ ᠦᠪᠡᠷ ᠤᠨ ᠠᠶᠠᠭᠠ ᠲᠠᠢ᠂ ᠬᠡᠤᠬᠡᠨ ᠬᠦᠷᠲᠡᠯᠡ ᠦᠮᠴᠢᠯᠡᠭᠰᠡᠨ ᠠᠶᠠᠭᠠ ᠲᠠᠢ᠂ ᠦᠪᠡᠷ ᠤᠨ ᠢᠶᠠᠨ ᠠᠶᠠᠭᠠᠨ ᠳᠤ ᠣᠣᠭᠤᠨᠠ᠂ ᠬᠦᠮᠦᠨ ᠤ ᠠᠶᠠᠭᠠᠨ ᠳᠤ ᠣᠣᠭᠤᠬᠤ ᠦᠭᠡᠢ᠃ ᠠᠯᠣᠰ ᠬᠤᠯᠠ ᠶᠠᠪᠣᠪᠠᠯ ᠵᠠᠪᠠᠯ ᠠᠶᠠᠭᠠ ᠪᠠᠨ ᠪᠡᠶᠡ ᠳᠡᠭᠡᠨ ᠠᠪᠴᠣ ᠶᠠᠪᠤᠨᠠ᠃ ᠠᠯᠴᠢᠭᠤᠷ ᠲᠤ ᠣᠷᠢᠶᠠᠵᠣ ᠭᠤᠶᠣᠮᠰᠤᠭ ᠭᠡ ᠲᠠᠢ ᠳᠠᠯᠢᠩ ᠳᠤ ᠬᠢᠵᠦ ᠪᠦᠰᠡᠨ ᠳᠡᠭᠡᠨ ᠬᠠᠪᠴᠢᠭᠤᠯᠵᠣ ᠭᠤᠶᠣᠨᠠ᠃ ᠠᠶᠠᠭᠠ ᠪᠠᠷ ᠣᠯᠠᠨ ᠶᠠᠭᠤᠮᠠ ᠪᠡᠯᠭᠡᠳᠡᠵᠦ ᠰᠢᠨᠵᠢᠨᠡ᠃ ᠠᠶᠠᠭᠠ ᠴᠣᠪᠣᠷᠠᠵᠣ ᠳᠠᠯᠪᠢᠭᠳᠠᠭᠰᠠᠨ ᠪᠠᠶᠢᠪᠠᠯ ᠳᠣᠳᠣᠷᠠ ᠨᠡᠬᠦᠳᠡᠯ ᠬᠢᠬᠦ ᠨᠢ ᠭᠡᠨᠡ᠂ ᠠᠶᠠᠭᠠᠨ ᠳᠠᠬᠢ ᠪᠠᠷ ᠨᠢ ᠠᠶᠢᠯ ᠤᠨ ᠪᠡᠯᠡ ᠪᠠᠨᠴᠢᠩ ᠢ ᠦᠨᠡᠯᠡᠨᠡ᠂ ᠠᠶᠠᠭᠠᠯᠠᠭᠰᠠᠨ ᠢᠶᠠᠷ ᠨᠢ ᠠᠶᠢᠯ ᠤᠨ ᠠᠪᠠᠭᠠᠢ ᠶᠢ ᠳᠠᠨᠢᠨᠠ᠃ ᠠᠶᠠᠭᠠ ᠭᠡᠭᠴᠢ ᠠᠯᠠᠭᠠᠨ ᠳᠤ ᠳᠣᠭᠳᠠᠳᠠᠭ ᠦᠴᠦᠬᠡᠨ ᠵᠦᠢᠯ ᠳᠤ ᠪᠢᠳᠡᠨ ᠤ ᠡᠪᠦᠭᠡ ᠲᠠᠢ᠃
