ᠵᠤᠬᠢᠶᠠᠭᠴᠢ:
ᠴᠠᠭ:2025-02-07
ᠥᠵᠡᠭᠰᠡᠨ : ℃
ᠢᠷᠡᠯᠲᠡ: ᠬᠠᠭᠤᠴᠢᠨ ᠪᠠᠷᠭᠤ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ
ᠮᠤᠩᠭᠤᠯ ᠳᠡᠪᠡᠯ ᠤᠨ ᠨᠡᠷᠡᠶᠢᠳᠦᠯ
ᠮᠤᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠠᠵᠤ ᠠᠮᠢᠳᠤᠷᠠᠯ᠂ ᠤᠷᠴᠢᠨ ᠲᠤᠭᠤᠷᠢᠨ ᠳᠤ ᠲᠤᠬᠢᠷᠠᠬᠤ ᠡᠨᠡ ᠬᠦ ᠬᠤᠪᠴᠠᠰᠤ ᠶᠢ ᠮᠤᠩᠭᠤᠯᠴᠤᠳ ᠡᠭᠦᠳᠴᠦ᠂ ᠡᠮᠦᠰᠴᠦ ᠡᠳ᠋ᠯᠡᠳᠡᠭ ᠪᠤᠯᠬᠤᠷ ᠦᠭᠡᠷᠡ ᠬᠤᠪᠴᠠᠰᠤ ᠠᠴᠠ ᠢᠯᠭᠠᠭᠳᠠᠬᠤ ᠢᠷᠡᠯ ᠭᠠᠷᠤᠯ ᠢᠶᠠᠷ ᠨᠢ ᠮᠤᠩᠭᠤᠯ ᠳᠡᠪᠡᠯ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠮᠤᠩᠭᠤᠯ ᠳᠡᠪᠡᠯ ᠢ ᠳᠠᠶᠠᠭᠠᠷ ᠮᠤᠩᠭᠤᠯᠴᠤᠳ ᠤᠨ ᠬᠡᠪᠰᠢᠭᠰᠡᠨ ᠬᠡᠯᠡᠯᠭᠡ ᠪᠠᠷ ᠪᠤᠯ ᠪᠦᠳᠦᠭᠦᠨ ᠬᠤᠨᠢᠨ ᠠᠷᠠᠰᠤ ᠪᠠᠷ ᠦᠩᠭᠡ ᠴᠠᠭᠠᠨ ᠬᠢᠭᠰᠡᠨ ᠪᠤᠶᠤ ᠪᠦᠳᠦᠭᠦᠨ ᠬᠤᠨᠢᠨ ᠤ ᠠᠷᠠᠰᠤ ᠪᠠᠷ ᠳᠤᠲᠤᠷᠯᠠᠵᠤ ᠬᠢᠭᠰᠡᠨ ᠢ ᠳᠡᠪᠡᠯ ᠭᠡᠵᠦ᠂ ᠲᠤᠷᠭᠠ ᠪᠤᠶᠤ ᠪᠦᠰ ᠢᠶᠠᠷ ᠬᠦᠪᠦᠩ ᠲᠠᠢ ᠪᠤᠶᠤ ᠬᠠᠪᠰᠤᠮᠠᠯ ᠬᠢᠭᠰᠡᠨ ᠢ ᠲᠡᠷᠯᠢᠭ ᠭᠡᠳᠡᠭ᠃ ᠲᠡᠪᠡᠯ ᠢ ᠭᠠᠳᠠᠷ ᠲᠠᠢ ᠲᠡᠪᠡᠯ ᠪᠠ ᠭᠠᠳᠠᠷ ᠦᠭᠡᠢ ᠲᠡᠪᠡᠯ ᠭᠡᠵᠦ ᠬᠤᠶᠡᠷ ᠵᠦᠢᠯ ᠬᠤᠪᠢᠶᠠᠳ᠋ᠠᠭ᠃ ᠭᠠᠳᠠᠷ ᠲᠠᠢ ᠳᠡᠪᠡᠯ ᠤᠨ ᠨᠢᠮᠭᠡᠨ ᠰᠢᠭ ᠦᠰᠦ ᠲᠠᠢ ᠶᠢ ᠨᠢ ᠪᠠᠰᠠ ᠵᠤᠪᠴᠠᠭᠠ ᠭᠡᠳᠡᠭ᠃ ᠵᠤᠪᠴᠠᠭᠠ ᠶᠢ ᠭᠤᠤᠯᠳᠠᠭᠤ ᠦᠰᠦ ᠬᠦᠷᠦᠰᠦ ᠨᠢᠮᠭᠡᠨ ᠠᠷᠠᠰᠤ ᠪᠠᠷ ᠬᠢᠵᠤ ᠭᠠᠳᠠᠷᠯᠠᠳᠠᠭ᠃ ᠭᠠᠳᠠᠷ ᠦᠭᠡᠢ ᠳᠡᠪᠡᠯ ᠢ ᠤᠯᠠᠩᠬᠢ ᠳᠤ ᠪᠠᠨ ᠠᠷᠠᠰᠤᠨ ᠳᠡᠪᠡᠯ ᠭᠡᠳᠡᠭ᠃ ᠠᠷᠠᠰᠤᠨ ᠳᠡᠪᠡᠯ ᠳᠤ ᠪᠠᠰᠠ ᠨᠡᠬᠡᠢ ᠳᠡᠪᠡᠯ᠂ ᠦᠵᠦᠭᠦᠷᠰᠡᠭ ᠳᠡᠪᠡᠯ᠂ ᠬᠠᠯᠴᠠᠭᠠᠢ ᠠᠷᠠᠰᠤᠨ ᠳᠡᠪᠡᠯ᠂ ᠢᠯᠬᠢᠨ ᠳᠡᠪᠡᠯ᠂ ᠬᠦᠳᠦᠰᠦᠨ ᠳᠡᠪᠡᠯ ᠭᠡᠵᠦ ᠪᠠᠶᠢᠳᠠᠭ᠃ ᠨᠡᠬᠡᠢ ᠠᠷᠠᠰᠤᠨ ᠳᠡᠪᠡᠯ ᠳᠤ ᠪᠠᠰᠠ ᠦᠩᠭᠡ ᠴᠠᠭᠠᠨ ᠪᠠ ᠤᠳᠤᠮᠠᠯ ᠭᠡᠵᠦ ᠪᠠᠶᠢᠳᠠᠭ᠃ ᠦᠩᠭᠡ ᠴᠠᠭᠠᠨ ᠳᠡᠪᠡᠯ ᠢ ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠴᠠᠭᠠᠮᠠᠯ ᠳᠡᠪᠡᠯ ᠭᠡᠳᠡᠭ᠃
ᠤᠲᠤᠭᠠ ᠪᠠᠷ ᠤᠳᠤᠵᠤ ᠰᠢᠷᠠᠯᠠᠭᠤᠯᠤᠭᠰᠠᠨ ᠢ ᠤᠲᠤᠮᠠᠯ ᠠᠷᠠᠰᠤᠨ ᠳᠡᠪᠡᠯ ᠭᠡᠳᠡᠭ᠃ ᠪᠦᠰ᠂ ᠲᠤᠷᠭᠠ ᠪᠠᠷ ᠳᠠᠩ ᠬᠢᠭᠰᠡᠨ ᠢ ᠨᠢ ᠴᠠᠮᠴᠠ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨᠠ ᠭᠠᠵᠠᠷ ᠨᠤᠲᠤᠭ ᠤᠨ ᠬᠡᠯᠡᠯᠭᠡ ᠶᠢᠨ ᠢᠯᠭᠠᠭᠠ ᠪᠠᠷ ᠨᠢ ᠳᠡᠪᠡᠯ᠂ ᠲᠡᠷᠯᠢᠭ᠂ ᠫᠠᠩᠬᠤ᠂ ᠯᠠᠪᠰᠢᠭ᠂ ᠦᠴᠢ᠂ ᠫᠢᠯᠠ ᠭᠡᠬᠦ ᠮᠡᠲᠦ ᠪᠠᠷ ᠨᠡᠷᠡᠯᠡᠳᠡᠭ᠃
ᠮᠤᠩᠭᠤᠯ ᠳᠡᠪᠡᠯ ᠳᠤ ᠪᠠᠰᠠ ᠬᠦᠨᠳᠦᠳᠭᠡᠯ ᠨᠡᠷᠡ ᠭᠡᠵᠦ ᠪᠠᠶᠢᠳᠠᠭ᠃ ᠬᠡᠤᠬᠡᠳ ᠤᠨ ᠳᠡᠪᠡᠯ ᠢ ᠪᠠᠷᠢᠨᠳᠠᠭ ᠪᠠᠷᠢᠨᠢᠶᠠ᠂ ᠵᠤᠨ ᠤ ᠡᠮᠦᠰᠬᠦ ᠳᠡᠪᠡᠯ ᠢ ᠵᠢᠷᠢᠭ᠃ ᠡᠮᠡᠭᠳᠡᠶᠢᠴᠦᠳ ᠤᠨ ᠳᠤᠲᠤᠷ ᠡᠮᠦᠰᠬᠦ ᠳᠠᠩ ᠴᠠᠮᠴᠠ ᠶᠢ ᠲᠤᠳᠤᠭᠤᠵᠢ᠃ ᠶᠡᠭᠡ ᠬᠦᠨᠳᠦᠲᠦ ᠬᠦᠮᠦᠰ ᠤᠨ ᠳᠡᠪᠡᠯ ᠢ ᠨᠠᠪᠰᠠ ᠭᠡᠬᠦ ᠮᠡᠲᠦ ᠪᠠᠷ ᠨᠡᠷᠡᠯᠡᠳᠡᠭ᠃ ᠮᠤᠩᠭᠤᠯ ᠳᠡᠪᠡᠯ ᠤᠨ ᠡᠭᠦᠰᠦᠯ ᠭᠠᠷᠤᠯ ᠤᠨ ᠲᠤᠬᠠᠢ《ᠮᠤᠩᠭᠤᠯ ᠤᠨ ᠵᠠᠩ ᠠᠭᠠᠯᠢ ᠶᠢᠨ ᠦᠢᠯᠡᠪᠦᠷᠢ》ᠭᠡᠬᠦ ᠨᠤᠮ ᠳᠤ《ᠡᠬᠢᠯᠡᠨ ᠨᠠᠮᠠ ᠬᠡᠮᠡᠬᠦ ᠶᠠᠭᠤᠮᠠ ᠪᠠᠷ ᠪᠡᠶᠡ ᠪᠠᠨ ᠤᠷᠢᠶᠠᠵᠤ ᠶᠠᠪᠤᠪᠠᠢ᠃ ᠲᠡᠭᠦᠨᠦ︵ᠲᠡᠭᠦᠨ ᠤ︶ᠬᠤᠵᠢᠮ ᠵᠠᠭᠠᠮᠠ ᠬᠢᠵᠦ ᠬᠤᠶᠠᠷ ᠡᠩᠭᠡᠷ ᠢ ᠤᠭᠤᠰᠤᠷ ᠢᠶᠠᠷ ᠬᠤᠯᠪᠤᠵᠤ ᠤᠶᠠᠭᠠᠳ ᠡᠮᠦᠰᠴᠦ ᠪᠠᠶᠢᠪᠠᠢ᠃
ᠲᠡᠭᠦᠨᠦ︵ᠲᠡᠭᠦᠨ ᠤ︶ᠬᠤᠵᠢᠮ ᠮᠡᠳᠡᠯ ᠨᠡᠭᠡᠭᠡᠭᠳᠡᠨ ᠳᠡᠪᠡᠯ ᠭᠡᠬᠦ ᠬᠦᠮᠦᠨ ᠤ ᠪᠡᠶᠡ ᠠᠳᠠᠯᠢ ᠮᠠᠶ᠋ᠢᠭᠲᠠᠢ ᠪᠤᠯᠭᠠᠵᠤ ᠵᠠᠭᠠᠮᠠ ᠬᠠᠨᠴᠤ︵ᠬᠠᠨᠴᠤᠢ︶᠂ ᠰᠤᠭᠤ᠂ ᠤᠨᠤᠭᠤ ᠭᠠᠷᠭᠠᠵᠤ ᠪᠠᠰᠠ ᠤᠭᠤᠰᠤᠷ ᠬᠠᠳᠠᠵᠤ ᠤᠶᠠᠭᠠᠳ ᠡᠮᠦᠰᠴᠦ ᠪᠠᠶᠢᠪᠠ᠃ ᠲᠡᠭᠦᠨ ᠤ ᠬᠤᠵᠢᠮ ᠤᠨ ᠴᠠᠭ ᠲᠦᠪᠡᠳ ᠤᠨ ᠰᠠᠷᠠᠩᠽᠠᠨ ᠺᠠᠮᠪᠤᠸᠠ ᠬᠠᠭᠠᠨ ᠤ ᠦᠶᠡ ᠠᠴᠠ ᠳᠡᠪᠡᠯ ᠬᠤᠪᠴᠠᠰᠤ ᠳᠡᠭᠡᠷᠡ ᠲᠤᠪᠴᠢ ᠰᠢᠯᠪᠢ ᠬᠠᠳᠠᠵᠤ ᠵᠠᠭᠠᠮᠠ ᠡᠩᠭᠡᠷ ᠢ ᠳᠠᠭᠠᠵᠤ ᠴᠦᠮ ᠲᠤᠪᠴᠢᠯᠠᠭᠤᠷ ᠲᠠᠢ ᠳᠡᠪᠡᠯ ᠬᠢᠵᠦ ᠡᠮᠦᠰᠴᠦ ᠪᠠᠶᠢᠪᠠ》ᠭᠡᠵᠦ ᠲᠡᠮᠲᠡᠭᠯᠡᠵᠡᠢ᠃
