ᠬᠣᠲᠠ ᠶᠢᠨ ᠲᠣᠬᠤᠢ ᠡᠷᠲᠡᠨ ᠦ ᠬᠣᠲᠠ ᠶᠢᠨ ᠪᠠᠭᠤᠷᠢ ᠬᠥᠯᠥᠨ ᠪᠣᠶᠢᠷ ᠬᠣᠲᠠ ᠶᠢᠨ ᠬᠠᠶᠢᠯᠠᠷ ᠲᠣᠭᠣᠷᠢᠭ ᠡᠴᠡ ᠪᠠᠷᠠᠭᠤᠨ ᠬᠣᠶᠢᠰᠢ 15 ᠺᠢᠯᠣᠮᠧᠲ᠋ᠷ ᠣᠷᠴᠢᠮ ᠬᠠᠶᠢᠯᠠᠷ ᠭᠣᠣᠯ ᠤᠨ ᠪᠠᠷᠠᠭᠤᠨ ᠡᠷᠭᠢ ᠳᠦ ᠪᠠᠶᠢᠷᠢᠯᠠᠵᠤ ᠂ ᠪᠠᠷᠠᠭᠤᠨ ᠬᠣᠶᠢᠲᠤ ᠲᠠᠯ᠎ᠠ ᠨᠢ ᠬᠠᠭᠤᠴᠢᠨ ᠪᠠᠷᠭᠤ ᠬᠣᠰᠢᠭᠤᠨ ᠤ ᠪᠠᠶᠠᠨᠬᠦ᠋ᠷᠢᠶ᠎ᠡ ᠪᠠᠯᠭᠠᠰᠤ ᠠᠴᠠ 13 ᠺᠢᠯᠣᠮᠧᠲ᠋ᠷ ᠵᠠᠶᠢᠲᠠᠶ ᠂ ᠡᠮᠦᠨ᠎ᠡ ᠲᠠᠯ᠎ᠠ ᠨᠢ ᠬᠠᠶᠢᠯᠠᠷ ᠭᠣᠣᠯ ᠠᠴᠠ ᠪᠠᠷᠤᠭ 200 ᠮᠧᠲ᠋ᠷ ᠵᠠᠶᠢᠲᠠᠶ ᠪᠠᠶᠢᠵᠤ ᠂ ᠵᠡᠭᠦᠨ ᠲᠠᠯ᠎ᠠ ᠨᠢ ᠬᠣᠲᠠ  ᠶᠢᠨ ᠲᠣᠬᠤᠢ ᠮᠠᠯᠵᠢᠯ ᠤᠨ ᠲᠠᠯᠠᠪᠠᠢ ᠶᠢᠨ ᠪᠠᠶᠢᠭ᠎ᠠ ᠭᠠᠵᠠᠷ ᠂ ᠬᠣᠲᠠ ᠶᠢᠨ ᠳᠣᠲᠣᠷ᠎ᠠ ᠨᠢ ᠣᠳᠣ  ᠲᠣᠬᠤᠢ ᠮᠠᠯᠵᠢᠯ ᠤᠨ ᠲᠠᠯᠠᠪᠠᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠶᠢᠨ᠎ᠠ ᠃

ᠡᠷᠲᠡᠨ ᠦ ᠬᠣᠲᠠ  ᠶᠢ ᠰᠢᠷᠣᠶ  ᠪᠠᠷ ᠪᠠᠷᠢᠵᠤ ᠂ ᠦᠨᠳᠦᠰᠦᠨ ᠳᠡᠭᠡᠨ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠲᠡᠶ ᠂  ᠤᠮᠠᠷ᠎ᠠ ᠠᠴᠠ ᠵᠡᠭᠦᠨᠰᠢ 10 ᠭᠷᠠᠳᠦ᠋ᠰ ᠬᠡᠯᠪᠡᠶᠢᠭᠰᠡᠨ ᠴᠢᠭᠯᠡᠯ ᠲᠠᠢ ᠃ ᠵᠡᠭᠦᠨ ᠬᠡᠷᠡᠮ ᠨᠢ 485 ᠮᠧᠲ᠋ᠷ ᠂ ᠡᠮᠦᠨ᠎ᠡ ᠬᠡᠷᠡᠮ ᠨᠢ 478 ᠮᠧᠲ᠋ᠷ ᠂ ᠪᠠᠷᠠᠭᠤᠨ ᠬᠡᠷᠡᠮ ᠨᠢ 530 ᠮᠧᠲ᠋ᠷ ᠂ ᠬᠣᠶᠢᠲᠤ ᠬᠡᠷᠡᠮ ᠨᠢ 448 ᠮᠧᠲ᠋ᠷ ᠃ ᠬᠣᠲᠠ ᠶᠢᠨ ᠬᠡᠷᠡᠮ ᠦᠨ ᠥᠨᠳᠥᠷ ᠨᠢ 3 ~ 4 ᠮᠧᠲ᠋ᠷ ᠂ ᠢᠷᠣᠭᠠᠷ ᠤᠨ ᠥᠷᠭᠡᠨ ᠨᠢ 12 ᠮᠧᠲ᠋ᠷ ᠂ ᠳᠡᠭᠡᠷ᠎ᠡ ᠲᠠᠯ᠎ᠠ ᠶᠢᠨ ᠥᠷᠭᠡᠨ ᠨᠢ 2 ᠮᠧᠲ᠋ᠷ ᠃ ᠬᠣᠲᠠ ᠶᠢᠨ ᠳᠥᠷᠪᠡᠨ ᠥᠨᠴᠥᠭ ᠲᠦ ᠥᠨᠳᠥᠷ  ᠲᠣᠮᠣ ᠥᠨᠴᠥᠭ ᠦᠨ ᠠᠰᠠᠷ ᠲᠠᠶ ᠂ ᠬᠣᠲᠠ ᠶᠢᠨ ᠬᠡᠷᠡᠮ ᠦᠨ ᠳᠡᠭᠡᠷ᠎ᠡ ᠭᠦᠳᠦᠶᠢᠵᠦ ᠭᠠᠷᠭᠠᠭᠰᠠᠨ ᠨᠢ ᠨᠢᠭᠲᠠ ᠂ ᠳᠤᠮᠳᠠᠴᠢ ᠪᠠᠷ 40 ᠮᠧᠲ᠋ᠷ ᠠᠯᠤᠰᠯᠠᠬᠤ ᠪᠦᠷᠢ ᠨᠢᠭᠡ ᠭᠦᠳᠦᠭᠦᠷ ᠬᠡᠷᠡᠮ ᠲᠠᠶ ᠃ ᠡᠮᠦᠨ᠎ᠡ ᠬᠣᠶᠢᠨ᠎ᠠ ᠪᠠᠨ ᠲᠤᠰ ᠪᠦᠷᠢ ᠨᠢᠭᠡ ᠡᠭᠦᠳᠡ ᠲᠠᠢ ᠂ ᠢᠷᠣᠭᠠᠷ ᠤᠨ ᠥᠷᠭᠡᠨ ᠨᠢ 8 ᠮᠧᠲ᠋ᠷ ᠂ ᠳᠡᠭᠡᠷ᠎ᠡ ᠲᠠᠯ᠎ᠠ ᠶᠢᠨ ᠥᠷᠭᠡᠨ ᠨᠢ 24 ᠮᠧᠲ᠋ᠷ ᠂ ᠡᠭᠦᠳᠡᠨ ᠭᠠᠳᠠᠨ᠎ᠠ ᠨᠢ ᠬᠠᠯᠬᠠᠭ᠎ᠠ ᠬᠣᠲᠠ  ᠲᠠᠶ ᠂ ᠬᠠᠯᠬᠠᠭ᠎ᠠ ᠬᠣᠲᠠ ᠶᠢᠨ ᠤᠷᠲᠤ ᠨᠢ 12 ᠮᠧᠲ᠋ᠷ ᠂ ᠥᠷᠭᠡᠨ ᠨᠢ 20 ᠮᠧᠲ᠋ᠷ ᠪᠠᠶᠢᠳᠠᠭ ᠃

ᠵᠡᠭᠦᠨ ᠬᠡᠷᠡᠮ ᠦᠨ ᠲᠡᠭ ᠳᠤᠮᠳᠠ ᠨᠢ ᠣᠳᠣ ᠦᠶ᠎ᠡ ᠶᠢᠨ ᠮᠣᠷᠢᠨ ᠲᠡᠷᠭᠡᠨ ᠦ ᠵᠠᠮ ᠥᠩᠭᠡᠷᠡᠵᠦ ᠂ ᠡᠮᠦᠨ᠎ᠡ ᠬᠡᠷᠡᠮ ᠦᠨ 100 ᠭᠠᠷᠤᠶ ᠮᠧᠲ᠋ᠷ ᠦᠨ ᠬᠡᠰᠡᠭ ᠨᠢ ᠡᠪᠳᠡᠭᠳᠡᠵᠡᠶ ᠃ ᠬᠣᠲᠠ ᠳᠣᠲᠣᠷ᠎ᠠ ᠬᠣᠶᠢᠲᠤ ᠲᠠᠯ᠎ᠠ ᠳᠤ ᠪᠡᠨ ᠬᠣᠶᠠᠷ ᠪᠠᠷᠢᠯᠭ᠎ᠠ ᠶᠢᠨ ᠰᠠᠭᠤᠷᠢ ᠲᠠᠶ᠂ ᠪᠠᠷᠠᠭᠤᠨ ᠡᠮᠦᠨ᠎ᠡ ᠥᠨᠴᠥᠭ ᠲᠦ ᠪᠠᠨ ᠨᠢᠭᠡ ᠤᠷᠲᠤ ᠳᠥᠷᠪᠡᠯᠵᠢᠨ ᠪᠠᠷᠢᠯᠭ᠎ᠠ ᠶᠢᠨ ᠰᠠᠭᠤᠷᠢ ᠲᠠᠶ᠂ ᠲᠡᠭ ᠳᠤᠮᠳᠠ ᠨᠢ ᠨᠢᠭᠡ ᠳᠥᠷᠪᠡᠯᠵᠢᠨ ᠰᠢᠷᠣᠢ ᠶᠢᠨ ᠲᠠᠶᠢᠰᠠ ᠲᠠᠶ᠂ ᠰᠢᠷᠣᠢ ᠶᠢᠨ ᠲᠠᠶᠢᠰᠠ  ᠶᠢᠨ ᠵᠠᠬ᠎ᠠ ᠶᠢᠨ ᠣᠷᠳᠣ ᠨᠢ 24 ᠮᠧᠲ᠋ᠷ᠂ ᠥᠨᠳᠥᠷ ᠨᠢ 1.5 ᠮᠧᠲ᠋ᠷ᠃

ᠡᠷᠲᠡᠨ ᠦ ᠬᠣᠲᠠ ᠶᠢᠨ ᠪᠠᠭᠤᠷᠢ ᠡᠴᠡ ᠶᠡᠬᠡ ᠬᠡᠮᠵᠢᠶᠡᠨ ᠦ ᠠᠯᠠᠭ ᠬᠡ ᠤᠭᠠᠯᠵᠠ ᠲᠠᠶ ᠱᠠᠭᠠᠵᠠᠩ  ᠬᠡᠯᠲᠡᠷᠬᠡᠢ᠂ ᠲᠡᠮᠦᠷ ᠵᠡᠷᠭᠡ ᠶᠢ ᠣᠯᠳᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠷᠲᠡᠨ ᠦ ᠬᠣᠲᠠ ᠶᠢᠨ ᠬᠡᠯᠪᠡᠷᠢ ᠳᠦᠷᠰᠦ ᠪᠠ ᠮᠠᠯᠲᠠᠵᠤ ᠭᠠᠷᠭᠠᠭᠰᠠᠨ ᠠᠯᠠᠭ ᠤᠭᠠᠯᠵᠠ ᠲᠠᠶ ᠱᠠᠭᠠᠵᠠᠩ ᠬᠡᠯᠲᠡᠷᠬᠡᠢ ᠵᠡᠷᠭᠡ ᠶᠢ ᠰᠢᠯᠭᠠᠨ ᠲᠣᠭᠲᠠᠭᠠᠭᠰᠠᠨ ᠦᠨᠳᠦᠰᠦᠯᠡᠪᠡᠯ ᠲᠤᠰ ᠡᠷᠲᠡᠨ ᠦ ᠬᠣᠲᠠ ᠨᠢ ᠯᠢᠶᠣᠤ ᠤᠯᠤᠰ ᠤᠨ ᠡᠷᠲᠡᠨ ᠦ ᠬᠣᠲᠠ ᠪᠣᠯᠤᠨ᠎ᠠ ᠃